49 ຄົນຕິດໂຄວິດໃໝ່ 104 ປົວຫາຍດີອອກໂຮງໝໍ

ຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ຖະແຫຼງປະຈຳວັນທີ 18 ພຶດສະພາ ປີ 2021 ໃຫ້ຮູ້ວ່າ: ສະພາບການລະບາດຂອງພະຍາດ COVID-19 ຢູ່ໃນໂລກ, ຮອດປະຈຸບັນມີການລາຍງານຕົວເລກຜູ້ຕິດເຊື້ອສະສົມທັງໝົດ 164,25 ລ້ານຄົນ, ເສຍຊີວິດສະສົມ 3,4 ລ້ານຄົນ ແລະ ປິ່ນປົວຫາຍດີ 144,16 ລ້ານຄົນ, ປະເທດທີ່ຍັງມີຜູ້ຕິດເຊື້ອ ແລະ ເສຍຊີວິດຫຼາຍກວ່າໝູ່ໃນໂລກກໍ່ຍັງແມ່ນສະຫະລັດອາເມລິກາ, ອິນເດຍ, ບຣາຊິວ ແລະຝຣັ່ງຕາມລໍາດັບ.

   ສຳລັບ ສປປ ລາວ ໃນວັນທີ 17 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.967 ຕົວຢ່າງໃນນັ້ນນະຄອນຫຼວງ 1.199 ຕົວຢ່າງ,ບໍ່ແກ້ວ 29 ຕົວຢ່າງ ແລະທີ່ເຫຼືອແມ່ນແຂວງອື່ນໆ 739 ຕົວຢາງ, ພົບຜູ້ຕິດເຊື້ອໃໝ່ 49 ຄົນ ເຮັດໃຫ້ຜູ້ຕິດເຊື້ອສະສົມທັງໝົດເປັນ 1.687 ຄົນ ເສຍຊີວິດໃໝ່ບໍ່ມີ, ເສຍຊີວິດສະສົມທັງໝົດ 2 ຄົນ.

   ກ່ຽວກັບກໍລະນີຕິດເຊື້ອໃໝ່ 49 ຄົນ (ກໍລະນີຢັ້ງຢືນທີ 1.639-1.687) ຈາກນະຄອນຫຼວງ 8 ຄົນ (ທັງ 8 ຄົນນີ້ແມ່ນຕິດເຊື້ອຈາກຄົນເຈັບເກົ່າທີ່ຕິດເຊື້ອໃນ ຊຸມຊົນ); ແຂວງບໍ່ແກ້ວ 26 ຄົນ 1 ຄົນ ແມ່ນຕິດເຊື້ອໃນແຂວງບໍ່ແກ້ວທີ່ເປັນຜູ້ສຳຜັດໃກ້ຊິດກັບຜູ້ຕິດເຊື້ອເກົ່າ ແລະສ່ວນ 25 ຄົນທີ່ຕິດເຊື້ອຢູ່ເຂດເສດຖະກິດພິເສດແມ່ນຕິດເຊື້ອພາຍໃນຊຸມຊົນ; ສໍາລັບແຂວງຈໍາປາສັກ 15 ຄົນ ແມ່ນກໍລະນີນຳເຂົ້າຊຶ່ງກວດພົບເຊື້ອໃນແຮງງານລາວທີ່ກັບຄືນປະເທດຖືກກົດໝາຍ.

  ປະຈຸບັນມີຜູ້ຍັງຕິດຕາມປິ່ນປົວທົ່ວປະເທດທັງໝົດ 999 ຄົນໃນນັ້ນໄດ້ຮັບການປິ່ນປົວດີທັງໝົດ 686 ຄົນ(ໃໝ່ 104 ຄົນ) ແລະພວກກ່ຽວຈະຕ້ອງໄປສືບຕໍ່ຈຳກັດບໍລິເວນຢູ່ເຮືອນ ຫຼືສູນຈໍາກັດບໍລິເວນສໍາລັບຜູ້ທີ່ບໍ່ມີເງື່ອນໄຂ, ຈົນຄົບກຳນົດຕາມຄຳແນະນຳຂອງແພດຢ່າງເຄັ່ງຄັດ,ແຍກຕົນເອງອອກຈາກຄົນໃນຄອບຄົວ,ບໍ່ໃຊ້ສິ່ງຂອງຮ່ວມກັນ ແລະ ມອບໃຫ້ອໍານາດການປົກຄອງເມືອງ/ ບ້ານ ແລະ ເຈົ້າໜ້າທີ່ສູນລົງໄປຕິດຕາມກວດກາສຸຂະພາບຂອງພາກສ່ວນດັ່ງກ່າວເຊັ່ນ: ວັດແທກອຸນຫະພູມ, ສອບຖາມອາການຖ້າພົບເຫັນເປັນໄຂ້, ມີໄອ ແລະຈາມຕ້ອງຮີບຮ້ອນໄປພົບແພດຢູ່ສະຖານທີ່ບໍລິການໃກ້ບ້ານທ່ານ. ທັງໝົດນີ້ແມ່ນສ້າງຄວາມໝັ້ນໃຈໃຫ້ແກ່ສັງຄົມວ່າຄົນເຈັບທີ່ອອກຈາກໂຮງໝໍແມ່ນປະຕິບັດຕາມຄໍາແນະນໍາຢ່າງເຄັ່ງຄັດ ແລະບໍ່ອອກຈາກບ້ານຈົນໝົດກໍານົດ.

   ສໍາລັບການກວດພົບຜູ້ຕິດເຊື້ອໃໝ່, ຈະມີທີມງານລົງສອບສວນ, ສອບຖາມປະຫວັດການເຄື່ອນໄຫວໃນໄລຍະເວລາ 14 ວັນ ທີ່ຜ່ານມາວ່າບຸກຄົນໃດເປັນຜູ້ສຳຜັດໃກ້ ຊິດເພື່ອເກັບຕົວຢ່າງ ແລະເຂົ້າຈໍາກັດບໍລິເວນຕາມຄຳແນະນຳຂອງຄະນະສະເພາະກິດກຳນົດໄວ້.

   ປະຈຸບັນທົ່ວປະເທດມີສູນຈໍາກັດບໍລິເວນທີ່ເປີດນຳໃຊ້ຢູ່ທັງໝົດ 45 ສູນ, ມີຜູ້ຈຳກັດບໍລິເວນທັງໝົດ 3.154 ຄົນ ແລະທຸກຄົນທີ່ເຂົ້າມາສູນດັ່ງກ່າວແມ່ນໄດ້ເກັບຕົວ ຢ່າງມາກວດວິເຄາະຫາເຊື້ອພະຍາດ COVID-19.

แชร์