ບໍລິຄຳໄຊ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ

   ໃນວັນທີ 12 ພຶດສະພາ ຜ່ານມາຢູ່ສະໂມສອນໃຫຍ່ຂອງ ແຂວງບໍລິຄຳໄຊ ໄດ້ຈັດກອງ​ປະ​ຊຸມເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວໃຫ້ແກ່ຂົງເຂດ ປກຊ-ປກສ ໂດຍການ​ເຂົ້າ​ຮ່ວມ ແລະເຜີຍແຜ່ເອກະສານຂອງທ່ານ ກອງແກ້ວ ໄຊສົງຄາມ ເລຂາພັກແຂວງ ເຈົ້າແຂວງບໍລິຄຳໄຊ, ມີບັນດາເລຂາ, ຮອງເລຂາຄະນະພັກຫົວໜ້າກອງບັນຊາການທະຫານແຂວງ ແລະເລຂາ, ຮອງເລຂາຄະນະພັກຫົວໜ້າປ້ອງກັນຄວາມສະຫງົບແຂວງພ້ອມດ້ວຍສະມາຊິກພັກໃນຂົງເຂດ ປກຊ-ປກສ ແຂວງເຂົ້າຮ່ວມ.

   ທ່ານ ກອງແກ້ວ ໄຊສົງຄາມ ໄດ້ຜ່ານເອກະສານບົດລາຍງານການເມືອງ ຂອງຄະນະບໍລິຫານງານສູນກາງພັກສະໄໝທີ X ຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວເຫັນວ່າສູນກາງພັກ ແລະຄະນະພັກທຸກຂັ້ນໄດ້ເຊີດຊູຄວາມຮັບຜິດຊອບຕໍ່ປະເທດຊາດ ແລະປະຊາຊົນ, ນຳເອົາເນື້ອໃນຈິດ ໃຈຂອງກອງປະຊຸມໃຫຍ່ ແລະບັນດາເປົ້າໝາຍສູ້ຊົນໃນການພັດທະນາເສດຖະກິດ-ສັງຄົມ ສຳລັບໄລຍະ 2018-2020 ທີ່ໄດ້ຮັບຮອງໃນກອງປະຊຸມໃຫຍ່ ຄັ້ງທີ X ຂອງພັກ ໄປຈັດຕັ້ງຄົ້ນຄວ້າ, ເຊື່ອມຊຶມຢ່າງກວ້າງຂວາງ ແລະ ປຸກລະດົມທົ່ວປວງຊົນ ເຂົ້າຮ່ວມຈັດຕັ້ງປະຕິບັດຢ່າງຕໍ່ເນື່ອງ ແລະສາມາດຍາດໄດ້ຜົນສຳເລັດທີ່ສຳຄັນຫຼາຍດ້ານ ເປັນຕົ້ນແມ່ນສາ ມາດຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານສືບຕໍ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ດ້ານເສດຖະກິດສາມາດຮັກສາການເຕີບໂຕໂດຍສະເລ່ຍ 5,8%, ລາຍຮັບສະເລ່ຍຕໍ່ຫົວຄົນບັນລຸ 2.664 ໂດລາຕໍ່​ປີ, ທຽບໃສ່ປີ 2015 ເພີ່ມຂຶ້ນ 694 ໂດລາ, ບັນດາໂຄງການລົງທຶນຂະໜາດໃຫຍ່ຍັງສືບຕໍ່ໄດ້ຮັບການຈັດຕັ້ງປະຕິບັດ ແລະກາຍເປັນແຮງຊຸກດັນຫຼັກໃຫ້ແກ່ການພັດທະນາພື້ນຖານເສດຖະກິດ.  

  ນອກນັ້ນ, ທ່ານ ກອງແກ້ວ ໄຊສົງຄາມ ຍັງໄດ້ຍົກໃຫ້ເຫັນບັນດາວຽກງານໃນບົດລາຍງານການເມືອງທີ່ຈະຕ້ອງສືບຕໍ່ຈັດຕັ້ງປະຕິບັດຢ່າງແຂງແຮງຄື: ສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ສົມບູນຍິ່ງຂຶ້ນ, ສ້າງການຫັນປ່ຽນແຂງແຮງ, ເລິກເຊິ່ງ ແລະຮອບດ້ານ ເພື່ອກ້າວເດີນສູ່ຈຸດໝາຍສັງຄົມນິຍົມ, ຍົກລະດັບຄວາມສາມາດໃນການປົກປ້ອງອະທິປະໄຕ, ຮັກສາສະຖຽນລະພາບດ້ານການເມືອງ ແລະຄວາມສະຫງົບສຸກຂອງສັງຄົມ, ເສີມຂະຫຍາຍທຸກຄວາມອາດສາມາດ ແລະທ່າແຮງບົ່ມຊ້ອນ, ສ້າງຖານການຜະລິດ ແລະບໍລິການໃຫ້ເຂັ້ມແຂງ,ຮັບປະກັນການພັດທະນາແບບຍືນຍົງ ແລະເປັນເຈົ້າຕົນເອງ, ພັດທະນາຊັບພະຍາກອນມະນຸດຢ່າງແຂງ ແຮງ, ສ້າງສັງຄົມທີ່ປະຊາຊົນເປັນເຈົ້າ, ມີປະຊາທິປະໄຕ, ສະເໝີພາບ ແລະຍຸຕິທຳ, ປັບປຸງລະບົບການຈັດຕັ້ງ, ກົງຈັກ ແລະ ກົນໄກເຄື່ອນໄຫວຂອງບັນດາອົງການອຳນາດລັດໃຫ້ແຂງແຮງ ແລະມີປະສິດທິພາບ, ເພີ່ມທະວີວຽກງານແນວໂຮມ ແລະວຽກງານມະຫາຊົນຂອງພັກ, ເພີ່ມທະວີຄວາມເປັນເຈົ້າການປະຕິບັດການພົວພັນກັບຕ່າງປະເທດ, ສ້າງເງື່ອນໄຂສະດວກ ແລະນຳຜົນປະໂຫຍດຕົວຈິງໃຫ້ແກ່ການພັດທະນາປະເທດຊາດ, ເດັດດ່ຽວແກ້ໄຂຈຸດອ່ອນ-ຄົງຄ້າງພາຍໃນພັກ, ຮັບປະກັນບົດບາດການເຄື່ອນໄຫວນຳພາຕົວຈິງທີ່ເຂັ້ມແຂງຂອງການຈັດຕັ້ງທຸກຂັ້ນ, ສ້າງການຫັນປ່ຽນຢ່າງແຂງແຮງ ແລະເລິກເຊິ່ງໃນວຽກງານພະນັກງານ.​ 

ຂ່າວ: ບໍລິຄຳໄຊ

แชร์