ໂຄວິດ ເຮັດໃຫ້ການດໍາເນີນທຸລະກິດຢູ່ແຂວງບໍ່ແກ້ວຢຸດຊົ່ວຄາວ.

   ໂຄວິດເຮັດໃຫ້ການດໍາເນີນທຸລະກິດຕ່າງໆ ຂອງຜູ້ປະກອບການຢູ່ແຂວງບໍ່ແກ້ວໄດ້ຖືກປິດຊົ່ວຄາວຍ້ອນການອອກມາດຕະການຕ່າງໆຂອງສູນກາງ ແລະແຂວງເພື່ອປ້ອງກັນ, ຄວບຄຸມ ແລະແກ້ໄຂຕ້ານການແຜ່ລະບາດຂອງພະຍາດໂຄວິດ-19 ໃນການຍົກສູງສະຕິລະວັງຕົວຂອງສັງຄົມໃນການດຳລົງຊີວິດປົກກະຕິແບບໃໝ່ ແລະເປັນເຈົ້າການປະຕິບັດມາດຕະການຢ່າງເຄັ່ງຄັດ ແລະ ເຂັ້ມງວດກວ່າເກົ່າ, ເນື່ອງຈາກວ່າແຂວງບໍ່ແກ້ວແມ່ນແຂວງໜຶ່ງທີ່ກວດພົບກໍລະນີຜູ້ທີ່ຕິດເຊື້ອພະຍາດໂຄວິດ-19, ເລີ່ມແຕ່ກາງເດືອນເມສາ 2021 ຈົນຮອດປະຈຸບັນນີ້ຍັງມີຜູ້ທີ່ຕິດເຊື້ອໃໝ່ໄດ້ເພີ່ມຂຶ້ນໃນແຕ່ລະວັນຈໍາເປັນຕ້ອງໄດ້ມີການປິດການເຂົ້າ-ອອກຊົ່ວຄາວລະຫວ່າງແຂວງ- ເມືອງຂອບເຂດບ້ານທີ່ມິການລະບາດຄົນໃນບໍ່ໃຫ້ອອກ ແລະ ຄົນນອກບໍ່ໃຫ້ເຂົ້າເວັ້ນແຕ່ຜູ້ທີ່ມີຄວາມຈໍາເປັນໄປປິ່ນປົວສຸຂະພາບຢູ່ໂຮງໝໍ ແລະ ໄປຊື້ເຄື່ອງອຸປະໂພກບໍລິ ໂພກແຕ່ຕ້ອງໄດ້ຮັບອະນຸຍາດຈາກເຈົ້າໜ້າທີ່ໆກ່ຽວຂ້ອງຈິງໄປໄດ້.

 ບັນດາໂຮງງານອຸດສາຫະກຳປຸງແຕ່ງ 98 ຫົວໜ່ວຍ ເຊັນວ່າ: ໂຮງງານອຸດສາຫະກຳ ແລະຫັດຖະກຳ 11 ແຫ່ງ, ໂຮງງານເພີນີເຈີ 22 ແຫ່ງ ແລະໂຮງງານອື່ນໆລວມທັງໝົດ 23 ກວ່າແຫ່ງແມ່ນໄດ້ປິດກິດຈະການຊົ່ວຄາວມີກຳມະກອນເຮັດວຽກຢູ່ໂຮງງານແຕ່ລະແຫ່ງເກືອບ 700 ກວ່າຄົນ, ໄດ້ຢຸດການເຮັດວຽກ, ສ່ວນໂຮງ ງານນໍ້າດື່ມ 52 ແຫ່ງຍັງມີບາງແຫ່ງດຳເນີນການຜະລິດເປັນປົກກະຕິເພື່ອສະໜອງນໍ້າໃຫ້ແກ່ສັງຄົມທີ່ຈໍາເປັນແຕ່ກຳມະກອນຢູ່ໂຮງງານຕ້ອງໄດ້ປະຕິບັດມາດຕະການປ້ອງກັນຕົນເອງຢ່າງເຂັ້ມງວດ, ບັນດາຕະຫຼາດທຸກໆແຫ່ງພາຍໃນເທສະບານເມືອງຫ້ວຍຊາຍ ແລະ ເມືອງອື່ນໆ ທົ່ວແຂວງບໍ່ແກ້ວແມ່ນຖືກປິດເປັນທີ່ຮຽບຮ້ອຍໂດຍສະ ເພາະແມ່ນຕະຫຼາດວັງວີວເປັນຕະຫຼາດໃຫຍ່ເປັນບ່ອນຊື່ຂາຍແລກປ່ຽນສິນຄ້າຂອງປະຊາຊົນແຂວງບໍ່ແກ້ວ ແລະຕ່າງແຂວງ,ຕະຫຼາດສີດອນມີ ແລະຕະຫຼາດແຫ່ງອື່ນໆໄດ້ຖືກປິດ. 

  ບັນດາຫົວໜ່ວຍທຸລະກິດບໍລິການໃນຂະແໜງການທ່ອງທ່ຽວ 180 ຫົວໜ່ວຍໃນນິ້, ມີບໍລິສັດທ່ອງທ່ຽວ 17 ແຫ່ງ ແລະ 1 ສາຂາ, ໂຮງແຮມ 20 ແຫ່ງ, ເຮືອນ ພັກ 63 ແຫ່ງ, ຮ້ານອາຫານ-ກິນດື່ມ, ຄາລາໂອເກະ, ຮ້ານບັນເທີງ 97 ແຫ່ງ, ການຂົນສົ່ງທາງບົກ-ທາງນໍ້າຖືກປິດ, ບໍ່ສາມາດຈະສັນຈອນ ໄປມາໄດ້ນອກນິ້, ຍັງມີແຮງງານ ລາວທີ່ກັບມາຈາກຕ່າງປະເທດ ແລະ ແຮງງານຕ່າງປະເທດທີ່ເຂົ້າມາເຮັດວຽກຢູ່ແຂວງບໍ່ແກ້ວຈໍານວນ 252 ຄົນ ຍິງ 108 ຄົນ ກໍໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດເຮັດໃຫ້ຜູ້ປະກອບການຕ່າງໆ ແລະພໍ່ຄ້າຊາວຂາຍກໍຄືປະຊາຊົນລາວບັນດາເຜົ່າໄດ້ພົບຄວາມຫຍຸ້ງຍາກບໍ່ມີວຽກເຮັດຂາດລາຍຮັບປະ ຈໍາວັນໃນການລ້ຽງຊີບຂອງຄອບຄົວຖ້າພະຍາດໂຄວິດຍັງສີບຕໍ່ແຜ່ລະບາດເປັນໄລຍະຍາວຈະເຮັດໃຫ້ການສັນຈອນໄປ-ມາ ແລະ ການທໍາມາຫາກິນໃນການດໍາລົງຊີວິດຂອງພະນັກງານທະຫານຕໍາຫຼວດ ແລະປະຊາຊົນຍິ່ງຈະພົບຄວາມຫຍຸ້ງຫຼາຍກວ່າເກົ່າ.  

   ເມື່ອພົບບັນຫາແບບນີ້ທຸກຄົນໃນສັງຄົມຕ້ອງໄດ້ເພີ່ມທະວີຄວາມສາມັກຄີ ແລະ ຮ່ວມແຮງຮ່ວມໃຈຢ່າຖືເບົາຈົ່ງເປັນເຈົ້າການປະຕິບັດບັນດາມາດຕະການຕ່າງໆຂອງຄະນະສະເພາະກິດວາງອອກຢ່າງເຂັ້ມງວດເພື່ອໂຕ້ຕອບປ້ອງກັນຄວບຄຸມ ແລະແກ້ໄຂໃນການຕ້ານການແຜ່ລະບາດຂອງພະຍາດໂຄວິດ-19 ຢູ່ແຂວງບໍ່ແກ້ວເຮັດໃຫ້ຜູ້ຕິດເຊື້ອພະຍາດແຕ່ລະວັນນັບມື້ຫຼຸດລົງ ແລະສາມາດຄວບຄຸມໄດ້ໄວທີ່ຈະໄວໄດ້ເພື່ອຄືນສູ່ສະພາບການດຳລົງຊີວິດເປັນປົກກະຕິເຮັດໃຫ້ຜູ້ປະກອບການຕ່າງໆພໍ່ຄ້າຊາວຂາຍໄດ້ສືບຕໍ່ດຳເນີນທຸລະກິດຂອງຕົນໃຫ້ມີການພັດທະນາ ແລະຂະຫຍາຍຕົວຂຶ້ນເລື້ອຍໆ ເພື່ອສ້າງລາຍຮັບໃຫ້ແກ່ຄອບຄົວເຮັດໃຫ້ຊີວິດການເປັນຢູ່ດີຂຶ້ນຫຼຸດພົ້ນອອກຈາກຄວາມທຸກຍາກໄປເທື່ອລະກ່າວ. 

ຂ່າວ: ເງິນຫຼົງ ຈິດພູວົງ

แชร์