ຕົ້ນເຜິ້ງ ເຂັ້ມງວດກວດໄລຍະຫ່າງຊາວຄ້າຂາຍ

 ວັນທີ 16 ພຶດສະພາ 2021 ນີ້ ຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການແຜ່ລະບາດຂອງພະຍາດໂຄວິດ-19 ເມືອງຕົ້ນເຜິ້ງ ແຂວງບໍ່ແກ້ວ ສົມທົບກັບກຳລັງທະຫານ-ຕຳຫຼວດ, ປກສ-ກອງຫຼອນບ້ານ ໄດ້ລົງກວດກາຄວາມເປັນລະບຽບຮຽບຮ້ອຍໃນການຕັ້ງໂຕະຂາຍເຄື່ອງອຸປະໂພກ-ບໍລິໂພກຕາມສອງຂ້າງທາງຂອງປະຊາຊົນຊາວຄ້າຂາຍນັບແຕ່ເຂດບ້ານໂພນໂຮມຈົນເຖິງເຂດສາມແຍກທາງເຂົ້າບ້ານໃຫຍ່ຕົ້ນເຜິ້ງໂດຍສະເພາະແມ່ນໄລຍະຫ່າງໃນການຕັ້ງໂຕະຂາຍເຄື່ອງເພື່ອຫຼີກລ່ຽງຄວາມແອອັດໃນການຊື້-ຂາຍເຊິ່ງສ່ຽງຕໍ່ການຮັບ ແລະແຜ່ເຊື້ອພະຍາດ ໂຄວິດ-19 ອອກເປັນວົງກວ້າງ.

   ທັງນີ້ແມ່ນເນື່ອງຈາກປະຈຸບັນນີ້ໄດ້ມີການປິດບັນດາຕະຫຼາດພາຍໃນເມືອງຊົ່ວຄາວເພື່ອເພີ່ມທະວີມາດຕະການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດການແຜ່ລະບາດຂອງພະຍາດໂຄວິດ-19 ຍ້ອນຕະຫຼາດເປັນສະຖານທີ່ທີ່ມີຄວາມແອອັດຍາກຕໍ່ການຮັກສາໄລຍະຫ່າງແຕ່ຍ້ອນມີຄວາມຈຳເປັນໃນການດຳລົງຊີວິດຈໍາວັນ ບັນດາຊາວຄ້າຂາຍພາຍໃນເມືອງຈໍານວນໜຶ່ງຈຶ່ງໄດ້ນໍາເອົາສິນຄ້າເຄື່ອງອຸປະໂພກ-ບໍລິໂພກຂອງຕົນມາວາງຂາຍຕາມສອງຂ້າງທາງ.

  ເຖິງວ່າການນໍາເອົາສິນຄ້າວາງຂາຍນັ້ນຈະມີຄວາມສ່ຽງຕໍ່ການຮັບ ແລະແຜ່ເຊື້ອພະຍາດໂຄວິດ-19 ແຕ່ຍ້ອນຄະນະສະເພາະກິດຂັ້ນເທິງມີຄວາມເຫັນໃຈຕໍ່ການດຳລົງຊີວິດຂອງປະຊາຊົນດັ່ງທີ່ກ່າວໄປນັ້ນຈຶ່ງໄດ້ມີການຜ່ອນຜັນໃຫ້ປະຊາຊົນຊາວຄ້າຂາຍນໍາເອົາສິນຄ້າວາງຂາຍໄດ້ພ້ອມທັງມອບໃຫ້ອຳນາດການປົກຄອງບ້ານແຈ້ງໃຫ້ໃຫ້ປະຊາຊົນທີ່ນໍາເອົາສິນຄ້າມາວາງຂາຍຈັດໄລຍະຫ່າງລະຫວ່າງໂຕະຕໍ່ໂຕະໃຫ້ຫ່າງກັນໃນໄລຍະ 15-20 ແມັດ ພ້ອມທັງຮັກສາໄລຍະຫ່າງກັບຜູ້ມາຊື້ເຄື່ອງຢ່າງໜ້ອຍ 2 ແມັດ ແຕ່ມາເຖິງປະຈຸບັນເຫັນວ່າປະຊາຊົນທັງຜູ້ຊື້ ແລະຜູ້ຂາຍສ່ວນໃຫຍ່ຍັງບໍ່ມີຄວາມຕື່ນຕົວຕໍ່ການຮັກສາໄລຍະຫ່າດັ່ງນັ້ນທາງຄະນະສະເພາະກິດ ແລະເຈົ້າໜ້າທີ່ກ່ຽວຂ້ອງຈຶ່ງໄດ້ລົງກວດກາອີກຄັ້ງພ້ອມທັງປຸກລະດົມໃຫ້ປະຊາຊົນຊາວຄ້າຂາຍຮັກສາໄລຍະຫ່າງຕາມມາດຕະການທີ່ວາງອອກ.

  ຕໍ່ບັນຫາດັ່ງກ່າວຈຶ່ງຂໍຮຽກຮ້ອງມາຍັງປະຊາຊົນຊາວຄ້າຂາຍກໍ່ຄືທຸກພາກສ່ວນໃນສັງຄົມໃຫ້ປະຕິບັດມາດຕະການຕ່າງໆ ທີ່ຄະນະສະເພາະຂັ້ນເທິງວາງອອກຢ່າງເຂັ້ມງວດ ເພາະເຖິງວ່າການຄ້າຂາຍທຳມາຫາກິນໃນຊີວິດປະຈຳວັນຈະມີຄວາມຈຳເປັນແຕ່ບັນຫາສຸຂະພາບ ແລະ ຊີວິດຂອງພວກເຮົາກໍ່ຍິ່ງມິຄວາມສຳຄັນທີ່ສຸດທີ່ຕ້ອງໄດ້ຮັກສາໃຫ້ປອດໄພດັ່ງທີ່ພວກເຮົາຮູ້ນໍາກັນແລ້ວວ່າປະຈຸບັນເມືອງຕົ້ນເຜິ້ງຍັງມີການແຜ່ລະບາດຂອງພະຍາດໂຄວິດ-19 ແລະມີຄວາມສ່ຽງທີ່ສຸດທີ່ຈະມີການແຜ່ລະບາດຂອງພະຍາດດັ່ງກ່າວຈາກເຂດທີ່ມີຄວາມສ່ຽງເຂົ້າມາແຜ່ລະບາດເປັນວົງກວ້າງໃນຊຸມຊຸມພາຍໃນເມືອງຂອງພວກເຮົາຖ້າທຸກຄົນໃນສັງຄົມຍັງປະໝາດຖືເບົາຕໍ່ການຮັກ ສາໄລຍະຫ່າງກໍ່ຄືມາດຕະການອື່ນໆຕາມວິຖີດຳລົງຊີວິດປົກກະຕິແບບໃໝ່.

ພາບ: ມີໄຊ ເພັດດາວົງ.

ຂ່າວ: ອຸໄທ ພູມມາ

แชร์