ກວາງບິ່ງ ຊ່ວຍອຸປະກອນການແພດ 2 ແຂວງຕ້ານໂຄວິດ

   ພິທີມອບ-ຮັບການຊ່ວຍເຫຼືອ, ອຸປະກອນການແພດລະຫວ່າງ ແຂວງກວາງບິ່ງ ສສ ຫວຽດນາມ ໃຫ້ແຂວງສະຫວັນນະເຂດ ແລະແຂວງຈຳປາສັກ ສປປ ລາວ ເພື່ອຮັບໃຊ້ເຂົ້າໃນວຽກງານສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ມູນຄ່າ 2 ຕື້ດົງ ຫຼືເທົ່າກັບ 842 ລ້ານກວ່າກີບ ໄດ້ຈັດຂຶ້ນໃນວັນທີ 16 ພຶດສະພາ 2021 ທີ່ຫຼັກໝາຍຊາຍແດນ 528 ດ້ານສາກົນນາເພົ້າຈາລໍ ແຂວງຄຳມ່ວນ, ຝ່າຍແຂວງກວາງບິ່ງ ສສ ຫວຽດນາມ ນຳໂດຍ ທ່ານ ວູ້ ດ່າຍຖັງ ເຂລາພັກແຂວງ ແຂວງກວາງບິ່ງ, ແຂວງສະຫວັນນະເຂດ ສປປ ລາວ ນຳໂດຍ ທ່ານ ສັນຕິພາບ ພົມວິຫານ ເຂລາພັກແຂວງເຈົ້າແຂວງສະຫວັນນະເຂດພ້ອມຄະນະ ແລະ ແຂວງຈຳປາສັກ ແມ່ນນຳໂດຍທ່ານ ວິໄລວົງ ບຸດດາຄຳ ເຂລາພັກແຂວງ ເຈົ້າແຂວງຈຳປາສັກ ມີຄະນະຄຸ້ມຄອງດ່ານ,ຄະນະຜູ້ແທນ, ພະແນກການທີ່ກ່ຽວຂ້ອງຈາກແຂວງກວາງບິ່ງ, ແຂວງສະຫວັນນະເຂດ ແລະແຂວງຈຳປາສັກເຂົ້າຮ່ວມ.

 ໃນໂອກາດດັ່ງກ່າວທ່ານ ວູ້ ດ່າຍຖັງ ໄດ້ກ່າວຈຸດປະສົງ ແລະຄວາມຕັ້ງໃຈຂອງພັກ, ລັດຖະບານ ສສ ຫວຽດນາມ ເວົ້າສະເພາະກໍ່ຄືຄະນະພັກ, ອົງການປົກຄອງ ແລະປະຊາຊົນແຂວງກວາງບິ່ງທີ່ເຫັນໄດ້ຄວາມສຳຄັນລະຫ່ວາງສອງປະເທດທີ່ມີສາຍພົວພັນອັນສະ ໜິດແໜ້ນ ຊ່ວຍເຫຼືອເຊິ່ງກັນ ແລະ ກັນໃນຍາມທຸກຍາກເຖິງແມ່ນວ່າ ສສ ຫວຽດນາມ ຈະມີຜູ້ຕິດເຊື້ອພະຍາດໂຄວິດກໍ່ຕາມ ແຕ່ກໍ່ບໍ່ໄດ້ປະຖິ້ມບັນດາເພື່ອນມິດສະຫາຍ.

  ໂອກາດນີ້ທ່ານ ວິໄລວົງ ບຸດດາຄຳ ຕາງໜ້າໃຫ້ອົງຄະນະພັກ, ອົງການປົກຄອງ ແລະປະຊາຊົນບັນດາເຜົ່າຊາວ ແຂວງຈຳປາສັກ ສະແດງຄວາມຂອບໃຈ ແລະຕີລາຄາສູງຕໍ່ນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຂອງອົງຄະນະພັກ, ອົງການປົກຄອງ ແລະປະຊາຊົນແຂວງກວາງບິ່ງທີ່ມີໃຫ້ແກ່ແຂວງຈຳປາສັກໃນຄັ້ງນີ້. ພິເສດແມ່ນການປະກອບສ່ວນຊ່ວຍເຫຼືອແບ່ງເບົາໃນຍາມປະສົບຄວາມຫຍຸ້ງຍາກລຳບາກ ແລະທ້າທາຍ. ເຊິ່ງປະທານໂຮຈີມິນໄດ້ສັ່ງສອນພວກເຮົາວ່າ “ຊ່ວຍເພື່ອນກໍຄືຊ່ວຍຕົນ”, ແຂວງຈໍາປາສັກພວກຂ້າເຈົ້າຂໍໃຫ້ຄຳໝັ້ນສັນຍາວ່າຈະຄຸ້ມຄອງນຳໃຊ້ອຸປະກອນ, ເຄື່ອງມືການແພດດັ່ງກ່າວເຂົ້າໃນວຽກງານການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ທີ່ແຂວງຈຳປາສັກໃຫ້ຖືກຕາມຈຸດປະສົງເປົ້າໝາຍ ແລະ ມີປະສິດທິຜົນສູງສຸດເພື່ອພື້ນຟູສະພາບເສດຖະກິດ-ສັງຄົມ ແລະຊີວິດການເປັນຢູ່ຂອງປະຊາຊົນໃຫ້ກັບສູ່ສະພາບປົກກະຕິໄດ້ໂດຍໄວ.

ການຊ່ວຍເຫຼືອ, ອຸປະກອນການແພດທີ່ນຳມາມອບໃນຄັ້ງນີ້ ມີຜ້າອັດປາກ-ດັງ, ຊຸດແພດປ້ອງກັນ ແລະຄວບຄຸມພະຍາດລະບາດ,ນໍ້າຢາລ້າງມືຂ້າເຊື້ອ. ແຂວງສະຫວັນນະເຂດ ແລະແຂວງຈຳປາສັກ ແມ່ນໄດ້ຮັບການຊ່ວຍເຫຼືອມູນຄ່າແຂວງລະ 1 ຕື້ດົງ ຫຼືເທົ່າກັບ 421 ລ້ານກວ່າກີບ.

ຂ່າວ: ທັດຊະນະ

แชร์