ຊາວຫຼວງພະບາງສັກວັກແຊງແລ້ວ 6,8 ພັນຄົນ

    ມາຮອດປະຈຸບັນຊາວແຂວງຫຼວງພະບາງໄດ້ສັກວັກແຊງໄປແລ້ວ 33.000 ກວ່າຄົນ, ໃນນີ້ມີຄົນຈີນປະມານ 2.500 ຄົນ ແລະ ໄດ້ສັກຄົບ 2 ເຂັມແລ້ວຈຳນວນ 6.780 ຄົນ.

  ທ່ານ ດຣ ຫຸມພັນ ຈີຣະສັກ ຫົວໜ້າຂະແໜງອະນາໄມ ແລະສົ່ງເສີມສຸຂະພາບຜູ້ຮັບຜິດຊອບວຽກງານໃຫ້ວັກແຊງຕ້ານໂຄວິດ-19 ແຂວງຫຼວງພະບາງໄດ້ລາຍງານຕໍ່ນັກຂ່າວພວກເຮົາວ່າງບໍ່ດົນນີ້ຮູ້ວ່າ: ສຳລັບການສັກວັກແຊງໃນປະຈຸບັນແຂວງຫຼວງພະບາງໄດ້ແບ່ງອອກເປັນ 16 ຈຸດໃນນີ້ຢູ່ເທສະບານແຂວງ ມີ 4 ຈຸດ, ສຳລັບຄົນຈີນ 1 ຈຸດ, ຢູ່ບັນດາເມືອງ 12 ຈຸດ. ແຂວງຫຼວງພະບາງໄດ້ຮັບວັກແຊງຈາກສູນກາງທັງໝົດ 3 ຄັ້ງ ຄື: ຄັ້ງ ທີ1 ໄດ້ຮັບຊີໂນຟາມ 23.000 ໂດສ, ຄັ້ງທີ 2 ໄດ້ຮັບແອສຕຣາຊີນີກາຈຳນວນ 6.000ໂດສ ແລະຄັ້ງທີ 3 ໄດ້ຮັບຊີໂນຟາມ 53.000 ໂດສ ລວມທັງໝົດແມ່ນ 72.600 ໂດສ.

 ຜູ້ທີ່ໄດ້ຮັບວັກແຊງເຂັມທີ 1 ຂອງຊີໂນຟາມທັງໝົດ 29.959 ຄົນ, ໃນນີ້ສັກຄົບ 2 ເຂັມແລ້ວຈຳນວນ 6.780 ຄົນ. ຈໍານວນ 3.000 ຄົນ ແລະຈະສືບຕໍ່ສັກເຂັມທີ 1 ຈົນຮອດວັນທີ 14 ພຶດສະພາ 2021 ນີ້ຈາກນັ້ນຈະຢຸດພັກກວດກາເບິ່ງວັກແຊງທີ່ຍັງເຫຼືອ, ຈາກນັ້ນຈະສືບຕໍ່ສັກເຂັມທີ 2 ໃນວັນທີ 24 ພຶດສະພາ ສຳລັບຊີໂນຟາມ ແລະສັກເຂັມທີ 2 ຂອງແອສຕຣາ ຊີນີກາ ໃນວັນທີ 5 ກໍລະກົດ 2021 ແລະໃຫ້ສຳເລັດໃນວັນທີ 10 ກໍລະກົດ 2021.

   ພ້ອມນີ້ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນພາຍໃນແຂວງຫຼວງພະບາງຈົ່ງພ້ອມໄປສັກວັກແຊງຕ້ານໂຄວິດ-19 ຢູ່ຕາມຈຸດຕ່າງໆທີ່ທາງການກຳນົດໄວ້ໃຫ້ທັງນີ້ກໍເພື່ອເປັນການຫຼຸດຜ່ອນການຕິດເຊື້ອພະຍາດໂຄວິດ-19.

ຂ່າວ: ສີສຸວັນ 

แชร์