ລັດໃຫ້ທະນາຄານທຸລະກິດ-ການເງິນຈຸລະພາກເລື່ອນໜີ້ລູກຄ້າ 3 ເດືອນ ຍ້ອນໂຄວິດ

  ນັບແຕ່ການລະບາດຂອງພະຍາດໂຄວິດ-19 ໃນຕົ້ນປີ 2020, ລັດຖະບານກໍຄືທະນາຄານແຫ່ງ ສປປ ລາວ (ທຫລ) ໄດ້ປະຕິບັດບັນດານະໂຍບາຍຈຳນວນໜຶ່ງເພື່ອແກ້ໄຂຜົນກະທົບຈາກການລະບາດຂອງພະຍາດດັ່ງກ່າວໄດ້ແກ່ການປັບຫຼຸດອັດຕາດອກເບ້ຍພື້ນຖານຂອງ ທຫລ ແລະອັດຕາສ່ວນເງິນແຮຝາກບັງຄັບຂອງທະນາຄານທຸລະກິດ; ປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດໂຄວິດຕາມຂໍ້ຕົກລົງສະບັບເລກທີ 238/ ທຫລ, ວັນທີ 26 ມີນາ 2020;ດຳເນີນໂຄງການສິນເຊື່ອເພື່ອຊຸກຍູ້ການຜະລິດ ແລະແກ້ໄຂຜົນກະທົບຈາກການລະບາດດັ່ງກ່າວ ສະບັບເລກທີ 318/ທຫລ, ວັນທີ 19.05.2020; ຊຸກຍູ້ ແລະຕິດຕາມການສະໜອງແຫຼ່ງທຶນຂອງກອງທຶນສົ່ງເສີມວິສາຫະກິດຂະໜາດນ້ອຍ ແລະກາງຮ່ວມກັບກະຊວງອຸດສາຫະກຳ ແລະການຄ້າໂດຍສຸມໃສ່ສະໜອງແຫຼ່ງທຶນໃຫ້ຫົວໜ່ວຍວິສາຫະກິດຂະໜາດນ້ອຍ ແລະກາງໃນຂົງເຂດທີ່ຮັບຜົນກະທົບຈາກການລະບາດພະຍາດດັ່ງກ່າວ.

   ຜ່ານການຈັດຕັ້ງປະຕິບັດນະໂຍບາຍຜ່ອນຜັນດ້ານສິນເຊື່ອໃນໄລຍະຜ່ານມາຮອດເດືອນ 03.20 21 ທະນາຄານທຸລະກິດ (ທທກ) ໄດ້ປະຕິບັດນະໂຍບາຍສິນເຊື່ອໃຫ້ແກ່ລູກຄ້າທັງໝົດ 4.846 ລາຍລວມມູນຄ່າ 9.565,24 ຕື້ກີບ. ສຳລັບສະຖາບັນການເງິນທີ່ບໍ່ແມ່ນທະນາຄານປະຕິບັດນະໂຍບາຍສິນເຊື່ອໃຫ້ແກ່ລູກຄ້າທັງໝົດ 454. 163 ລາຍ ລວມມູນຄ່າ 263,63 ຕື້ກີບ. ນະໂຍບາຍສິນເຊື່ອທີ່ທະ ນາຄານ ແລະສະຖາບັນການເງິນ ປະຕິບັດສ່ວນໃຫຍ່ແມ່ນນະໂຍບາຍການປັບຫຼຸດອັດຕາດອກເບ້ຍ, ຮອງລົງມາແມ່ນນະໂຍບາຍເລື່ອນຊຳລະໜີ້ທັງຕົ້ນທຶນ ແລະດອກເບ້ຍ, ປະຕິບັດນະໂຍບາຍປ່ອຍກູ້ໃໝ່ເພື່ອຟື້ນຟູການຜະລິດ ຫຼືທຸລະກິດ, ນະໂຍບາຍປັບຫຼຸດຄ່າທໍານຽມ ແລະນະໂຍບາຍອື່ນໆ. ການສະໜອງສິນເຊື່ອໃໝ່ໃຫ້ແກ່ລູກຄ້າທີ່ໄດ້ຮັບຜົນກະທົບພາຍໃຕ້ໂຄງການສິນເຊື່ອຊຸກຍູ້ການຜະລິດ ແລະແກ້ໄຂຜົນກະທົບຈາກພະຍາດໂຄວິດ-19 ຕາມຂໍ້ຕົກລົງເລກທີ 318/ທຫລ ໄດ້ສະໜອງເງິນກູ້ໃຫ້ແກ່ລູກຄ້າທີ່ໄດ້ຮັບຜົນກະທົບຜ່ານທະນາຄານທຸລະກິດທີ່ເຂົ້າຮ່ວມໂຄງການ ທັງໝົດ 1.652,57 ຕື້ກີບ ຈໍານວນລູກຄ້າ 477 ລາຍ ແລະ ຖອນນໍາໃຊ້ແລ້ວ 1.369,44 ຕື້ກີບ. ສໍາລັບການສະໜອງສິນເຊື່ອໃຫ້ແກ່ ວນກ ໂດຍກອງທຶນສົ່ງເສີມວິສາ ຫະກິດຂະໜາດນ້ອຍ ແລະກາງໄດ້ປ່ອຍກູ້ແລ້ວປະມານ 165,06 ຕື້ກີບ (ມີຈໍານວນ 116 ຫົວໜ່ວຍ ວນກ, ມີ 143 ສັນຍາເງິນກູ້ມາຈາກ 14 ແຂວງ).

  ທຫລ ຈະສືບຕໍ່ປະຕິບັດນະໂຍບາຍ ແລະມາດຕະການທີ່ ທຫລ ໄດ້ປະຕິບັດຜ່ານມາຂ້າງເທິງນັ້ນໃນການແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ໂດຍສືບຕໍ່ປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກໂຄວິດ-19 ຕາມຂໍ້ຕົກລົງສະບັບ ເລກທີ 238/ທຫລ, ລົງວັນທີ 26 ມີນາ 2020 ໂດຍການອອກແຈ້ງການເພີ່ມຕື່ມໃຫ້ທະນາຄານທຸລະກິດ ແລະສະຖາບັນການເງິນເພີ່ມທະວີການປະຕິບັດນະໂຍບາຍສິນເຊື່ອແກ້ໄຂຜົນກະທົບຕາມຂໍ້ຕົກລົງດັ່ງກ່າວໃຫ້ວ່ອງໄວ, ທັນສະພາບການ ແລະທົ່ວເຖິງຕາມສະພາບເງື່ອນໄຂຂອງລູກຄ້າທີ່ໄດ້ຮັບຜົນກະທົບຕົວຈິງ; ສືບຕໍ່ດຳເນີນ ໂຄງການສິນເຊື່ອເພື່ອສະໜອງເງິນກູ້ໃໝ່ໃຫ້ແກ່ບຸກຄົນ, ຈຸນລະວິສາຫະກິດ ແລະ ວນກ ທີ່ໄດ້ຮັບຜົນກະທົບຜ່ານທະນາຄານທຸລະກິດທີ່ເຂົ້າຮ່ວມໂຄງການຈຳນວນ 16 ທະນາຄານ; ຈັດຕັ້ງປະຕິບັດໂຄງການສິນເຊື່ອເພື່ອກະຕຸ້ນເສດ ຖະກິດຂອງ ສປປ ລາວ ໄດ້ແກ່ນະໂຍບາຍສິນເຊື່ອສົ່ງເສີມການຜະລິດໄຟຟ້າເພື່ອການສົ່ງອອກ, ສິນເຊື່ອເພື່ອສົ່ງເສີມການຜະລິດສິນຄ້າທົດແທນການນຳເຂົ້າ ແລະສິນເຊື່ອເພື່ອຊຸກຍູ້ການຜະລິດກະສິກຳເປັນສິນຄ້າສົ່ງອອກ.

  ເພື່ອຈັດຕັ້ງຜັນຂະຫຍາຍຄໍາສັ່ງ ເລກທີ 15/ນຍ, ລົງວັນທີ 21 ເມສາ 2021 ກໍ່ຄືການສືບຕໍ່ປະຕິບັດຂໍ້ຕົກລົງວ່າດ້ວຍນະໂຍບາຍສິນເຊື່ອເພື່ອແກ້ໄຂຜົນກະທົບຈາກ ການລະບາດພະຍາດດັ່ງກ່າວສະບັບ ເລກທີ 238/ທຫລ, ລົງວັນທີ 26.03.2020 ແລະສະພາບການລະບາດຂອງພະຍາດດັ່ງກ່າວຮອບທີ 2 ເລີ່ມແຕ່ເດືອນ ເມສາ 2021 ເປັນຕົ້ນມາ. ທ່ານ ສອນໄຊ ສິດພະໄຊ ຜູ້ວ່າການ ທຫລ ໄດ້ອອກຂໍ້ຕົກລົງເພີ່ມຕື່ມ ເລກທີ 256/ ທຫລ, ລົງວັນທີ 13 ພຶດສະພາ 2021 ວ່າດ້ວຍການປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດໂຄວິດ-19 ຊຶ່ງຂໍ້ຕົກລົງສະບັບນີ້ໄດ້ກໍານົດນະໂຍບາຍສິນເຊື່ອເພີ່ມຕື່ມເພື່ອແກ້ ໄຂຜົນກະທົບຈາກສະພາບການລະບາດຂອງພະຍາດດັ່ງກ່າວໃຫ້ແກ່ລູກຄ້າເງິນກູ້ຂອງທະນາຄານທຸລະກິດ ແລະສະຖາບັນການເງິນທີ່ເປັນພະນັກງານ ຫຼືລູກຈ້າງຂອງຫົວໜ່ວຍທຸລະກິດ ຫຼືການຈັດຕັ້ງໃດໜຶ່ງທີ່ຕ້ອງໄດ້ຢຸດກິດຈະການທັງໝົດຫຼືບາງສ່ວນລວມທັງແຮງງານອິດສະຫຼະທີ່ບໍ່ສາມາດສ້າງລາຍຮັບເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດດັ່ງກ່າວພາໃຫ້ບໍ່ໄດ້ຮັບເງິນເດືອນຫຼືໄດ້ຮັບເງິນເດືອນສ່ວນໃດໜຶ່ງຊຶ່ງບໍ່ສາມາດຊໍາລະໜີ້ຂອງຕົນໃຫ້ແກ່ທະນາຄານ ແລະສະຖາບັນການເງິນໄດ້ຕາມສັນຍາ. 

   ໃຫ້ທະນາຄານທຸລະກິດ ແລະສະຖາບັນການເງິນປະຕິບັດນະໂຍບາຍເພີ່ມຕື່ມຕໍ່ລູກຄ້າຂອງຕົນໂດຍໃຫ້ທະນາຄານທຸລະກິດ, ສະຖາບັນການເງິນຈຸລະພາກທີ່ຮັບເງິນ ຝາກ ແລະ ບໍ່ຮັບເງິນຝາກເລື່ອນເວລາຊໍາລະໜີ້ທັງຕົ້ນທຶນ ແລະ ດອກເບ້ຍໃຫ້ແກ່ລູກຄ້າເງິນກູ້ (ປະເພດເງິນກູ້ເພື່ອການຊົມໃຊ້) ເປັນເວລາ 3 ເດືອນ ນັບແຕ່ເດືອນພຶດສະພາ ຫາ ເດືອນກໍລະກົດ 2021 ໂດຍ ໃຫ້ບໍລິສັດເຊົ່າສິນເຊື່ອ ແລະໂຮງຊວດຈໍາເລື່ອນກໍານົດເວລາໃນການຈ່າຍຄ່າງວດໃນການເຊົ່າຊື້ຫຼືກໍານົດເວລາການໄຖ່ຖອນຊັບຊວດຈໍາເປັນເວລາ 3 ເດືອນ ນັບແຕ່ເດືອນ ພຶດສະພາ ຫາ ເດືອນກໍລະກົດ 2021 ພາຍໃຕ້ເງື່ອນໄຂໃນການພິຈາລະນາການເລື່ອນກໍານົດເວລາຊໍາລະໜີ້ໂດຍລູກ ຄ້າທີ່ຈະໄດ້ຮັບນະໂຍບາຍເລື່ອນເວລາຊໍາລະໜີ້ຕ້ອງແມ່ນຜູ້ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ພາໃຫ້ບໍ່ໄດ້ຮັບເງິນເດືອນ ຫຼືຄ່າແຮງງານ ຫຼືໄດ້ ຮັບພຽງສ່ວນໃດໜຶ່ງທີ່ພາໃຫ້ບໍ່ສາມາດຊໍາລະໜີ້ ຫຼືຄ່າງວດໄດ້ໂດຍມີການຢັ້ງຢືນຈາກບ່ອນເຮັດວຽກດັ່ງກ່າວ; ສໍາລັບລູກຄ້າທີ່ມີແຫຼ່ງລາຍຮັບຈາກການດໍາເນີນທຸ ລະກິດທີ່ຮັບຜົນກະທົບຈາກພະຍາດໂຄວິດ-19 ແມ່ນໃຫ້ພິຈາລະນາຕາມຖານະການເງິນ ແລະສະພາບຕົວຈິງ.

  ສະເພາະການຈັດຕັ້ງປະຕິບັດແມ່ນກົມຄຸ້ມຄອງທະນາຄານທຸລະກິດ ແລະກົມຄຸ້ມຄອງສະຖາບັນການເງິນ ທຫລ ມີໜ້າທີ່ຕິດຕາມກວດກາການຈັດຕັ້ງປະຕິບັດນະໂຍ ບາຍທີ່ກໍານົດໃນຂໍ້ຕົກລົງສະບັບນີ້ຂອງທະນາຄານທຸລະກິດ ແລະສະຖາບັນການເງິນທີ່ຢູ່ພາຍໃຕ້ການຄຸ້ມຄອງຂອງຕົນ; ສັງລວມລາຍງານສະພາບການຈັດຕັ້ງປະຕິບັດດັ່ງກ່າວ ໃຫ້ແກ່ຄະນະຜູ້ວ່າການ ທຫລ ຊາບເປັນແຕ່ລະເດືອນຢ່າງເປັນປົກກະຕິ; ສໍາລັບ, ທະນາຄານທຸລະກິດ ແລະສະຖາບັນການເງິນຕ້ອງປະຕິບັດນະໂຍບາຍສິນເຊື່ອຕໍ່ລູກຄ້າເງິນກູ້. ລູກຄ້າເງິນກູ້ທີ່ມີເງື່ອນໄຂສາມາດແຈ້ງຂໍຮັບນະໂຍບາຍສິນເຊື່ອຈາກທະນາຄານທຸລະກິດ ແລະສະຖາບັນການເງິນທີ່ເປັນເຈົ້າໜີ້ຂອງຕົນໂດຍເຮັດໜັງສືສະເໜີຂໍນະໂຍບາຍເປັນລາຍລັກອັກສອນ ຫຼືຜ່ານຊ່ອງທາງອື່ນຕາມການກໍານົດຂອງທະນາຄານທຸລະກິດ ແລະສະຖາບັນການເງິນພ້ອມທັງປະກອບເອກະສານຢັ້ງຢືນກ່ຽວກັບການເລີກຈ້າງ, ການຢຸດເຊົາການຈ່າຍເງິນເດືອນຊົ່ວຄາວ ຫຼືການຈ່າຍເງິນເດືອນບາງສ່ວນເພື່ອເປັນຂໍ້ມູນໃນການພິຈາລະນາປະຕິບັດນະໂຍບາຍ,ຫ້າມທະນາຄານທຸລະກິດ ແລະສະຖາບັນການເງິນຍຶດຫຼັກຊັບຄໍ້າປະກັນ, ປັບໃໝ ແລະເກັບຄ່າທໍານຽມຕ່າງໆໃນການປະຕິບັດນະໂຍບາຍ. ທະນາຄານທຸລະກິດ ແລະສະຖາ ບັນການເງິນຕ້ອງແຈ້ງໃຫ້ລູກຄ້າຂອງຕົນຊາບຢ່າງທົ່ວເຖິງຜ່ານເວັບໄຊ ຫຼືຊ່ອງທາງອື່ນທີ່ເໝາະສົມກ່ຽວກັບການປະຕິບັດນະໂຍບາຍຕາມຂໍ້ຕົກລົງສະບັບນີ້, ພ້ອມທັງເອົາໃຈໃສ່ໃນການຕິດຕາມກວດກາສິນເຊື່ອທີ່ໄດ້ຮັບນະໂຍບາຍດັ່ງກ່າວຢ່າງໃກ້ຊິດ ແລະລາຍງານມາຍັງກົມຄຸ້ມຄອງທະນາຄານທຸລະກິດ ແລະກົມຄຸ້ມຄອງສະຖາບັນການເງິນ ທຫລ ພາຍໃນວັນທີ 10 ຂອງແຕ່ລະເດືອນ

   ຕາມແບບຟອມທີ່ກໍານົດ, ກໍລະນີລູກຄ້າຕ້ອງການຂໍ້ມູນເພີ່ມຕື່ມກ່ຽວກັບການປະຕິບັດນະໂຍບາຍສິນເຊື່ອຕາມທີ່ກໍານົດໃນຂໍ້ຕົກລົງ ສະບັບນີ້ ຫຼືຂໍ້ຕົກລົງວ່າດ້ວຍນະ ໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດໂຄວິດ-19 ສະບັບເລກທີ 238/ທຫລ, ລົງວັນທີ 26 ມີນາ 2020 ສາມາດຕິດຕໍ່ມາຍັງກົມຄຸ້ມຄອງທະນາຄານທຸລະກິດໝາຍເລກໂທລະສັບ 021 219825 ແລະກົມຄຸ້ມຄອງສະຖາບັນການເງິນໝາຍເລກໂທລະສັບ 021 244 355.

ຂ່າວ: ຣັດສະໝີ ດວງສັດຈະ

แชร์