ຫຼາຍພາກສ່ວນມອບເງິນ ແລະເຄື່ອງຊ່ວຍເຫຼືອລັດຖະບານຕ້ານໂຄວິດ

  ບ່າຍວັນທີ 13 ພຶດສະພາ 2021 ຢູ່ຫ້ອງວ່າການສໍານັກງານນາຍົກລັດຖະມົນຕີ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີໄດ້ໃຫ້ກຽດຮັບເຄື່ອງຊ່ວຍເຫຼືອຈາກຫຼາຍພາກສ່ວນເພື່ອປະກອບສ່ວນເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ ໂຄວິດ-19 ຮອບໃໝ່ຢູ່ ສປປ ລາວ. 

   ໃນນີ້ປະກອບມີ ບໍລິສັດ ເທີນຫີນບູນ ພາວເວີ ຈໍາກັດ ມອບວັກແຊງ 6.000 ໂດສ ລວມມູນຄ່າ 150.000 ໂດລາ, ບໍລິສັດ ກຸ່ມຄໍາໄພ ຊະນະ ຈໍາກັດຜູ້ດຽວ ມອບເງິນ 200 ລ້ານກີບ, ສະມາຄົມຊາວຈີນ ພົ້ນທະເລ ມອບເງິນ 100 ລ້ານກີບ ແລະທະນາຄານ ແຄນນາ ດຽນລາວ ຈໍາກັດ ມອບເງິນ 50 ລ້ານກີບ.

  ໂອກາດນີ້, ທ່ານຮອງນາຍົກລັດຖະມົນຕີໄດ້ຕາງໜ້າພັກ ແລະ ລັດຖະບານກໍຄືຄະນະສະເພາະກິດໄດ້ສະແດງຄວາມຂອບອົກຂອບໃຈມາຍັງບັນດາບໍລິສັດທີ່ໄດ້ມາຊ່ວຍ ເຫຼືອໃນຄັ້ງນີ້ຊຶ່ງເປັນການສະແດງເຖິງຄວາມມີນໍ້າໃຈໃນຍາມທີ່ປະເທດພົບກັບວິກິດໄພພິບັດແບບນີ້ ແລະຄວາມເຂົ້າໃຈຂອງພາກເອກະຊົນຕໍ່ຄວາມອັນຕະລາຍຮ້າຍແຮງຂອງການລະບາດພະຍາດໂຄວິດ-19 ຮອບໃໝ່ຢູ່ປະເທດເຮົາກໍຄືສະພາບຄວາມຫຍຸ້ງຍາກທາງດ້ານງົບປະມານລວມເຖິງເຄື່ອງມືອຸປະກອນຮັບໃຊ້ຕ່າງໆໃນການຕອບຕ້ານກັບພະຍາດດັ່ງກ່າວທີ່ລັດຖະບານມີຈໍາກັດ.

  ພ້ອມນີ້, ທ່ານຮອງນາຍົກລັດຖະມົນຕີຍັງໄດ້ຢືນຢັນວ່າຈະນໍາເງິນ ແລະວັກແຊງທີ່ໄດ້ຮັບໃນຄັ້ງນີ້ໄປໝູນໃຊ້ໃຫ້ເກີດປະໂຫຍດສູງສຸດເພື່ອຕ້ານ ແລະສະກັດກັ້ນພະຍາດໂຄວິດ-19 ທີ່ພວມລະບາດ ສປປ ລາວ ໃຫ້ຫຼຸດລົງ ແລະກັບຄືນສູ່ສະພາບປົກກະຕິໂດຍໄວ.

แชร์