ຕະຫຼາດສາຍຊຸມຊົນຫຼຸດໃຫ້ລູກຄ້າ 20%

    ແມ່ຄ້າພໍ່ຄ້າທີ່ໄປໃຊ້ບໍລິການຕະຫຼາດສາຍຊຸມຊົນຈະໄດ້ຮັບນະໂຍບາຍຈາກການເກັບຈ່າຍລາຍວັນຊຶ່ງເຈົ້າຂອງຕະຫຼາດໄດ້ອອກແຈ້ງການໃນວັນທີ 11 ພຶດສະພາ 2021 ນີ້ຈະມີນະໂຍບາຍໃຫ້ແມ່ຄ້າໃນໄລຍະການແຜ່ລະບາດໂຄວິດ-19 ເພື່ອເປັນການຫຼຸດຜ່ອນລາຍຈ່າຍຂອງຊາວຄ້າຂາຍເພາະວ່າຜູ້ຄົນທີ່ເຂົ້າຊື້ເຄື່ອງໃນຕະຫຼາດໃນໄລຍະນີ້ແມ່ນມີຈໍານວນຫຼຸດລົງຫຼາຍແລະຂາຍບໍ່ຄ່ອຍດີ.

  ທ່ານ ປອ ສຸລິໄຊ ຫົງສາຄອນ ຮອງຫົວໜ້າພະແນກອຸດສາຫະກໍາ ແລະການຄ້າແຂວງໄດ້ລາຍງານຕໍ່ນັກຂ່າວພວກເຮົາໃນວັນທີ 11 ພຶດສະພາ 2021 ນີ້ວ່າ: ຫຼັງ ຈາກທີ່ເຈົ້າຂອງຕະຫຼາດໄດ້ຮັບໜັງສືສະເໜີຂອງພະແນກອຸດສາຫະກໍາ ແລະ ການຄ້າແຂວງໃຫ້ເຈົ້າຂອງຕະຫຼາດແຕ່ລະແຫ່ງນັບແຕ່ຂະໜາດນ້ອຍ, ກາງ ແລະຂະໜາດໃຫຍ່ໃນທົ່ວແຂວງຫຼວງພະບາງເພື່ອໃຫ້ຄົ້ນຄວ້າຜ່ອນຜັນຫຼຸດຄ່າບໍລິການ-ເກັບຈ່າຍລາຍວັນໃຫ້ແມ່ຄ້າໃນໄລຍະການແຜ່ລະບາດໂຄວິດ-19 ຫຼ້າສຸດເຈົ້າຂອງຕະຫຼາດສາຍຊຸມຊົນນະຄອນຫຼວງພະບາງແມ່ນໄດ້ອອກແຈ້ງການໃຫ້ຊາວຄ້າ-ຂາຍ ຜູ້ທີ່ມາໃຊ້ບໍລິການຢູ່ພາຍໃນຕະຫຼາດເລື່ອງການຫຼຸດລາຄາເກັບຈ່າຍປະຈໍາວັນ ແລະເລື່ອນເວລາການຊໍາລະຄ່າເຊົ່າຫ້ອງໃຫ້ແມ່ຄ້າໃນໄລຍະການແຜ່ລະບາດໂຄວິດ-19 ນັບແຕ່ວັນທີ 11 ພຶດສະພາ-10 ມິຖຸນາ 2021 ນີ້.

   ສໍາລັບຄ່າເກັບຈ່າຍປະຈໍາວັນຈະຫຼຸດໃຫ້ແມ່ຄ້າ 20% ປະກອບມີຄ່ານັ່ງຕາດ, ຄ່າຝາກລົດ, ຄ່າຫ້ອງນໍ້າ ແລະ ຈະຫຼຸດຄ່າເຊົ່າຫ້ອງໃຫ້ 1 ເດືອນຕື່ມອີກ, ມາຮອດ ປະຈຸບັນມີ 3 ແຫ່ງແລ້ວທີ່ມີນະໂຍບາຍຕໍ່ແມ່ຄ້າຜູ້ມາໃຊ້ບໍລິການຕະຫຼາດຂອງຕົນ.

  ດ້ານແມ່ຄ້າພໍ່ຄ້າທີ່ມາໃຊ້ບໍລິການຕະຫຼາດຫຼາຍຄົນມີຮອຍຍິ້ມຕ່າງກໍເວົ້າເປັນສຽງດຽວກັນວ່າມີຄວາມດີໃຈຫຼາຍທີ່ທາງຂັ້ນເຖິງໄດ້ເຫັນຄວາມສໍາຄັນ, ຄວາມຈໍາເປັນຕໍ່ການຄ້າຂາຍໃນໄລຍະການລະບາດໂຄວິດ-19 ນີ້ ແລະໄດ້ສະເໜີໃຫ້ເຈົ້າຂອງຕະຫຼາດແຕ່ລະແຫ່ງໃນທົ່ວແຂວງຫຼວງພະບາງຫຼຸດຄ່າເກັບຈ່າຍໃຫ້ເປັນພິເສດ ແລະຂອບ ໃຈເຈົ້າຂອງຕະຫຼາດທີ່ເຫັນໃຈເນື່ອງຈາກການຂາຍບໍ່ໄດ້ດີ, ຄົນຊື້ກະຫຼຸດລົງ.

  ສໍາລັບເຈົ້າຂອງຕະຫຼາດທີ່ມີການເປີດໃຫ້ບໍລິການແມ່ນຍັງຄຸມເຂັ້ມມາດຕະການປ້ອງກັນການແຜ່ລະບາດໂຄວິດ-19 ຢ່າງເຄັ່ງຂັດຈົນກວ່າຈະມີຄໍາສັ່ງປ່ຽນແປງຈາກຂັ້ນເທິງ.

ຂ່າວ: ສີສຸວັນ

แชร์