ຊັບສິນ ພຣັອບເພີຕີ້ ມອບອຸປະກອນການແພດໃຫ້ໂຮງໝໍ 150 ຕຽງ

   ເພື່ອເປັນການປະກອບສວນເຂົ້າໃນການຊ່ວຍເຫຼືອວຽກງານຕ້ານການແຜ່ລະບາດຂອງພະຍາດໂຄວິດ-19 ຢູ່ລາວ ໃນວັນທີ10 ພຶດສະພາ ຜ່ານມາທາງບໍລິສັດ ຊັບສິນ ພຣັອບເພີຕີ້ ຈຳກັດຜູ້ດຽວ ໄດ້ນຳເອົາເຄື່ອງຊຸດປ້ອງກັນໂຄວິດ PPE ຈຳນວນ 100 ຊຸດ ໄປມອບໃຫ້ແພດໝໍທີ່ກຳລັງປະຕິບັດໜ້າທີ່ຢູ່ໂຮງໝໍມິດຕະພາບ (150 ຕຽງ) ໂດຍຕາງໜ້າມອບຂອງທ່ານ ນາງ ສັບພະສິນ ພອນສະຫວັນ ຜູ້ອຳນວຍການບໍລິສັດຊັບ ສິນພຣັອບເພີຕີ້ ຈຳກັດ ແລະຮັບໂດຍ ທ່ານ ດຣ ສະໜອງ ທອງສະນະ ອຳນວຍການໂຮງໝໍມິດຕະພາບພ້ອມດ້ວຍພະນັກງານສອງພາກສ່ວນເຂົ້າຮ່ວມ.

  ທ່ານ ນາງ ສັບພະສິນ ພອນສະຫວັນ ກ່າວວ່າ: ເພື່ອເປັນການຊ່ວຍເຫຼືອເພື່ອນມະນຸດຮ່ວມຊາດໂດຍສະເພາະໃນຊ່ວງສັງຄົມກຳລັງປະເຊີນການແຜ່ລະບາດພະຍາດໂຄວິດເຮັດໃຫ້ປະຈຸບັນພໍ່ແມ່ປະຊາຊົນພົບບັນຫາຄວາມຫຍຸ້ງຍາກລວມເຖິງການປະຕິບັດຂອງເຈົ້າໜ້າທີ່ຕໍາຫຼວດ, ທະຫານ ແລະແພດໝໍຕ່າງໆ ສະນັ້ນເພື່ອເປັນການຊ່ວຍແບ່ງເບົາບໍລິສັດໄດ້ຈັດຊື້ເຄື່ອງອຸປະກອນການແພດ ແລະ ອາຫານໃຫ້ແພດໝໍສຳລັບເຄື່ອງນຳໄປມອບໃຫ້ແມ່ນມີໂຮງໝໍມິດຕະພາບມີຈຳນວນ 50 ຊຸດ ແລະ ສູນແຍກປ່ຽວໂຄວິດ ຫຼັກ 19 ແລະຫຼັກ 21 ຈຳນວນ 50 ຊຸດ.

   ແນວໃດກໍ່ຕາມໃນຍາມວິກິດນອກຈາກຊ່ວຍເບື້ອງລັດແລ້ວທາງບໍລິສັດຍັງມີນະໂຍບາຍການຜ່ອນຜັນໜີ້ໃຫ້ລູກຄ້າຂອງບໍລິສັດໃນຊ່ວງໂຄວິດ-19 ເພື່ອເປັນການຊ່ວຍ ເຫຼືອຫຼຸດພາລະໃນການໃຊ້ຈ່າຍໃນຊ່ວງໂຄວິດ-19 ບໍລິສັດ ຊັບສິນພຣັອບເພີຕີ້ ຈຳກັດ ມີນະໂຍບາຍໃຫ້ແກ່ລູກຄ້າຜູ້ທີ່ບໍ່ສາມາດຊໍາລະຄ່າງວດໄດ້ຕາມປົກກະຕິຄື: ລູກຄ້າສາມາດຊໍາລະຄ່າງວດໄດ້ພຽງ 50% ຂອງມູນຄ່າງວດທີ່ລູກຄ້າຕ້ອງຊໍາລະເທົ່ານັ້ນ. ສ່ວນອີກ 50% ແມ່ນລູກຄ້າສາມາດເກັບເອົາໄປຊໍາລະໃນງວດສຸດທ້າຍໄດ້ໂດຍທີ່ບໍລິສັດຈະບໍ່ຄິດໄລ່ດອກເບ້ຍ.

แชร์