JDB ມອບ 300 ລ້ານກີບ ຊ່ວຍກະຊວງປ້ອງກັນປະເທດຕ້ານໂຄວິດ

   ໃນວັນທີ 10 ພຶດສະພາ 2021 ທີ່ກະຊວງປ້ອງກັນປະເທດ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມພັດທະນາ (JDB) ພ້ອມດ້ວຍທ່ານ ປອ.ບົວວອນ ຈັນທະນີເລີດ ຫົວໜ້າຫ້ອງການທະນາຄານຮ່ວມພັດທະນາໄດ້ນໍາເອົາເງິນສົດຈໍານວນ 300 ລ້ານກີບ ໄປມອບໃຫ້ກະຊວງປ້ອງກັນປະເທດເພື່ອນໍາໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍສະເພາະແມ່ນຊຸກຍູ້ກໍາລັງປະກອບອາວຸດປ້ອງກັນຊາດທີ່ພວມປະຕິບັດໜ້າທີ່ຕາມພາລະບົດບາດຂອງຕົນໃນການປະກອບສ່ວນເຂົ້າໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຕາງໜ້າກະຊວງປ້ອງກັນປະເທດກ່າວຮັບໂດຍ ທ່ານ ພົນຕີ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດຫົວໜ້າສະເພາະກິດການປ້ອງກັນ.ຕ້ານ ແລະສະກັດກັ້ນພະຍາດໂຄວິດ-19 ຂອງກະຊວງປ້ອງກັນປະເທດພ້ອມດ້ວຍຄະນະກ່ຽວຂ້ອງທັງ 2 ຝ່າຍເຂົ້າຮ່ວມ.

   ໂອກາດນີ້, ທ່ານ ພົນຕີ ວົງຄໍາ ພົມມະກອນ ກໍ່ໄດ້ສະແດງຄວາມຂອບໃຈ ແລະຊົມເຊີຍຕໍ່ ທ່ານ ວິໄລ ສີພະພອນ ພ້ອມດ້ວຍຄະນະທີ່ໄດ້ມອບເງິນຊ່ວຍເຫຼືອກະຊວງປ້ອງ ກັນປະເທດໃນຄັ້ງນີ້ ເພື່ອນຳໃຊ້ ເຂົ້າໃນວຽກງານປ້ອງກັນ, ສະກັດ ກັ້ນ, ຄວບຄຸມ ແລະແກ້ໄຂການແຜ່ ລະບາດຂອງພະຍາດໂຄວິດ-19 ໃນຄັ້ງນີ້ໃນໂອກາດນີ້, ທ່ານຮອງລັດຖະມົນຕີກະຊວງປ້ອງກັນປະເທດຍັງໄດ້ຮຽກຮ້ອງມາຍັງຄະນະອຳນວຍການຕະຫຼອດຮອດພະນັກງານຂອງທະນາຄານດັ່ງກ່າວຈົ່ງພ້ອມກັນກັບທຸກພາກ ສ່ວນໃນສັງຄົມເພີ່ມທະວີຄວາມເປັນຈິດໜຶ່ງໃຈດຽວກັນໃນການເປັນເຈົ້າການປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ໂດຍເລີ່ມຈາກຄວາມເປັນເຈົ້າການ ຂອງຕົນເອງ, ຄອບຄົວ, ຊຸມຊົນ ແລະການຈັດຕັ້ງທຸກຂັ້ນເພື່ອປະກອບສ່ວນເຮັດໃຫ້ສາມາດຄວບຄຸມການແຜ່ລະບາດຂອງພະຍາດໂຄວິດ-19 ຄັ້ງນີ້ໄດ້ໂດຍໄວ ແລະທ່ານຍັງອວຍພອນໃຫ້ທຸລະກິດຂອງທະນາຄານຮ່ວມພັດທະນາໃຫ້ມີຄວາມຈະເລີນຮຸງເຮືອງຂຶ້ນ ໄປເລື້ອຍ.

ຂ່າວ: ຄໍາຕົ້ນ ວໍລະຈັກ

แชร์