ເຈົ້າເມືອງນອງ ຕິດຕາມຄວາມຄືບໜ້າການປູກກ້ວຍຂອງປະຊາຊົນ

  ການຫັນເອົາການປູກການລ້ຽງເປັນອາຊີບຕົ້ນຕໍເຫັນຜົນປະຈັກຕາເຮັດໃຫ້ປະຊາຊົນມີຢູ່ມີກິນ ແລະສ້າງສາພັດທະນາຄອບຄົວດີຂຶ້ນເປັນກ້າວໆ.

  ໃນວັນທີ 5 ພຶດສະພາ 2021 ທ່ານ ລຳແກ້ວ ແສງໜູທອງ ເຈົ້າເມືອງໆນອງພ້ອມດ້ວຍທ່ານ ສາຄຳ ກຽດຕະວົງສາ ຫົວໜ້າຫ້ອງການກະສິກຳ-ປ່າໄມ້ເມືອງ,ທ່ານ ແພງມາ ຈັນທິລະນອງ ຫົວໜ້າຫ້ອງວ່າການປົກຄອງເມືອງ ແລະພາກສ່ວນກ່ຽວຂ້ອງໄດ້ຮ່ວມລົງຕິດຕາມເບິ່ງຄວາມຄືບໜ້າໃນການປູກກ້ວຍຂອງພໍ່ແມ່ປະຊາຊົນຊາວ ບ້ານຕັງອາໄລເໜືອ ແລະບ້ານອະລາທີ່ຂຶ້ນກັບຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ.

  ໃນການລົງເຄື່ອນໄຫວຄັ້ງນີ້ແມ່ນມີຄວາມຫຍຸ້ງຍາກພໍສົມຄວນເນື່ອງຈາກວ່າບ້ານດັ່ງກ່າວແມ່ນຢູ່ ຟາກເຊລະນອງຈຶ່ງຈຳເປັນຕ້ອງໄດ້ຂີ່ແພຂ້າມ ແລະຍ່າງໄປອີກໄລຍະໜຶ່ງຈຶ່ງຮອດບ້ານເປົ້າໝາຍ ໂດຍທາງຄະນະການນຳຂອງເມືອງກໍ່ໄດ້ມີການຍ່າງເລາະເບິ່ງສວນກ້ວຍຂອງຄອບຄົວພໍ່ອາທອນ, ຄອບຄົວພໍ່ເຖິງ ແລະຄອບຄົວ ທ່ານ ລະວຽນ ຮອງນາຍບ້ານຕັງອາໄລເໜືອຊຶ່ງໃນການປູກກ້ວຍຄັ້ງນີ້ທາງຫ້ອງການກະສິກຳ ແລະປ່າໄມ້ເມືອງໄດ້ສົ່ງວິຊາການລົງຕິດຕາມໃນການປູກເພື່ອໃຫ້ຖືກຕ້ອງຕາມຫຼັກວິຊາການນອກນັ້ນທ່ານ ສາຄຳ ກຽດຕະວົງສາ ໄດ້ໃຫ້ຄຳແນະນຳຕື່ມອີກວ່າ: ສຳລັບດິນຢູ່ເຂດນີ້ແມ່ນເໝາະແກ່ການປູກຝັງເພາະເປັນດິນດຳຜຸຜຸ່ຍປະສົມກັບດິນຊາຍ, ການປູກພືດທີ່ເປັນຫົວກໍ່ຈະເຮັດໃຫ້ໄດ້ປະສິດທິພາບສູງເປັນຕົ້ນ: ມັນດ້າງ, ມັນເພົາ ແລະມັນປະເພດຕ່າງໆ ພ້ອມທັງໄດ້ແນະນຳເຖິງການບົວລະບັດຮັກສາຕື່ມອີກ.

   ໂອກາດນີ້ ທ່ານ ລຳແກ້ວ ແສງໜູທອງ ກໍ່ໄດ້ກ່າວໂອ້ລົມຕໍ່ກັບອຳນາດການປົກຄອງ ແລະຄອບຄົວເປົ້າໝາຍປູກກ້ວຍວ່າ: ເນື່ອງຈາກສະພາບໃນທົ່ວໂລກກໍ່ຄືປະເທດລາວ ເຮົາເວົ້າສະເພາະກໍ່ແມ່ນແຂວງສະຫວັນນະເຂດແມ່ນເກີດມີການແຜ່ລະບາດຂອງເຊື້ອພະຍາດໂຄວິດ-19 ດັ່ງນັ້ນທຸກຄົນຕ້ອງມີສະຕິລະວັງຕົວກັນຕື່ມ, ຄວນປະຕິບັດມາດຕະການຕາມຄຳສັ່ງ ແລະແຈ້ງການທີ່ຂັ້ນເທິງວາງອອກຢ່າງເຂັ້ມງວດຖ້າຫາກຈະເດີນທາງໄປຕາມສະຖານທີ່ຕ່າງໆ ຄວນໃສ່ຜ້າອັດປາກ, ໝັ່ນລ້າງມືດ້ວຍສະບູ, ເຈວເພາະເຊື້ອພະຍາດດັ່ງກ່າວແມ່ນຕິດຕໍ່ກັນດ້ວຍທາງເດີນຫາຍໃຈ,ຄວນຢູ່ຫ່າງກັນຢ່າງໜ້ອຍ1-2 ແມັດ, ເອົາໃຈໃສ່ຕິດຕາມຮັບຟັງທາງຄະນະທີມງານວິຊາ ການກໍ່ຄືຄະນະສະເພາະກິດລົງເຜີຍແຜ່ຂໍ້ມູນຂ່າວສານຕ່າງໆກ່ຽວກັບພະຍາດດັ່ງກ່າວ.

แชร์