ທຫລ ດຳເນີນກອງປະຊຸມ ຄົບຄະນະພັກ ແລະ ເຊື່ອມຊຶມມະຕິ 7

  ອົງຄະນະພັກທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງການດຳເນີນກອງປະຊຸມຄົບຄະນະບໍລິຫານງານພັກ ທຫລ ລະຫວ່າງວັນທີ 5–6 ມີນາ 2019 ທີ່ສະໂມສອນສະຖາບັນການທະນາຄານນະຄອນຫຼວງວຽງຈັນ ພາຍໃຕ້ການເປັນປະທານຂອງສະຫາຍ ສອນໄຊ ສິດພະໄຊ ກຳມະການສຳຮອງສູນກາງພັກ, ເລ ຂາຄະນະພັກ, ຜູ້ວ່າການ ທຫລ; ພ້ອມນີ້ຍັງມີບັນດາສະຫາຍຄະນະພັກ ທຫລ, ຄະນະໜ່ວຍພັກ, ຄະນະພັກຮາກຖານ ແລະພະນັກງານຫຼັກແຫຼ່ງນຳພາອ້ອມຂ້າງອົງຄະນະພັກ ທຫລ ເຂົ້າຮ່ວມ.

  ກອງປະຊຸມຄົບຄະນະບໍລິຫານງານ ພັກ ທຫລ ໃນຄັ້ງນີ້ ໄດ້ຮັບຟັງການເຜີຍແຜ່ ມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X ເຜີຍແຜ່ມະຕິວ່າ ດ້ວຍການປັບປຸງຮາກຖານການເມືອງ ຂອງລະບອບ ປະຊາທິປະໄຕ ປະຊາຊົນ ລາວ ໃຫ້ເຂັ້ມແຂງ ແລະໜັກແໜ້ນ; ເຜີຍ ແຜ່ມະຕິວ່າດ້ວຍການເພີ່ມທະວີການນຳ ພາແກ້ໄຂຄວາມຫຍຸ້ງຍາກດ້ານເສດຖະ ກິດ-ການເງິນ ແລະສ້າງຄວາມເຂັ້ມ ແຂງຂອງການຄຸ້ມຄອງມະຫາພາກ. ນອກຈາກນີ້ທີ່ປະຊຸມຍັງໄດ້ຜ່ານຮ່າງບົດສະຫຼຸບຕີລາຄາການຊີ້ນຳໆພາຂອງຄະນະບໍລິຫານງານພັກ ທຫລ ປະຈຳປີ 2018 ແລະທິດທາງແຜນການປີ 2019.

 ນອກນີ້ຍັງໄດ້ແນະນຳໃນການປະກອບຄຳເຫັນທີ່ກ່ຽວຂ້ອງກັບຄວາມຮັບຜິດຊອບຂອງແຕ່ລະຮາກຖານພັກທີ່ຕິດພັນກັບມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິ ປະໄຕ ປະຊາຊົນລາວ ໃຫ້ເຂັ້ມແຂງ ແລະ ໜັກແໜ້ນ ແລະມະຕິວ່າດ້ວຍການເພີ່ມ ທະວີການນຳພາແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະສ້າງ ຄວາມເຂັ້ມແຂງຂອງການຄຸ້ມຄອງມະຫາ ພາກ; ການປະຕິບັດຄຳສັ່ງ ເລກທີ 09/ນຍ, ລົງວັນທີ 19/05/2017 ວ່າດ້ວຍການປະຢັດລາຍຈ່າຍງົບປະມານຂອງ ລັດທີ່ຕິດພັນກັບຄວາມຮັບຜິດຊອບຂອງຮາກຖານພັກ ແລະກົມກອງຕົນໂດຍມີການປະກອບຄຳເຫັນຈາກບັນດາຄະນະພັກຮາກຖານມີ: ທະນາຄານນະໂຍບາຍ,ທະນາຄານພັດທະນາລາວ,ທະນາຄານການຄ້າຕ່າງປະເທດລາວມະຫາຊົນ, ທະນາຄານສົ່ງເສີມກະສິກຳ; ໜ່ວຍພັກຫ້ອງການ ທຫລ ແລະສາຂາ ທຫລ ພາກເໜືອແຂວງອຸດົມໄຊ, ສາຂາ ທຫລ ພາກໃຕ້ ແຂວງຈຳປາສັກ.

  ກອງປະຊຸມໃນຄັ້ງນີ້ແມ່ນໄດ້ມີການຄົ້ນຄວ້າລົງເລິກ ແລະແລກປ່ຽນທັດສະນະຄວາມຄິດເຫັນຢ່າງກົງໄປກົງມາ,ກ້າສະເໜີບັນຫາ ແລະສະເໜີວິທີທາງແກ້ ໄຂທີ່ສ້າງສັນ, ເໝາະສົມ, ສອດຄ່ອງ ກັບສະພາບຈຸດພິເສດ ແລະບັນຫາຕົວຈິງ ບົນຈິດໃຈທີ່ເປັນເອກະພາບສູງຕໍ່ກັບ ເນື້ອໃນມະຕິ 7 ສະໄໝທີ X ຂອງພັກ ແລະພ້ອມນັ້ນ; ກໍ່ໄດ້ມີການຕີລາຄາບົດ ບາດການຊີ້ນຳໆພາຂອງຄະນະບໍລິຫານງານພັກໃນໜຶ່ງປີຜ່ານມາທີ່ສາມາດຍາດ ໄດ້ຜົນງານໃນຫຼາຍດ້ານ. ສັງລວມແລ້ວບັນດາເນື້ອໃນມະຕິດັ່ງກ່າວໄດ້ຊີ້ໃຫ້ເຫັນການແກ້ໄຂຄວາມຫຍຸ້ງຍາກດ້ານເສດຖະກິດມະຫາພາກທີ່ສະສົມມາດົນສົມຄວນໂດຍເຫັນໄດ້ໃນການແກ້ໄຂບັນ ຫາທີ່ເປັນຈຸດອ່ອນ ແລະຂໍ້ຄົງຄ້າງໃນຜ່ານມາ ທີ່ຍັງບໍ່ທັນສ້າງໄດ້ການຫັນປ່ຽນທີ່ຈະ ແຈ້ງເທົາທີ່ຄວນ; ນອກຈາກນີ້, ຍັງຊີ້ ໃຫ້ເຫັນເຖິງບັນຫາສາເຫດຊຶ່ງເປັນອັນ ພື້ນຖານ ແລະອັນເປັນຕົ້ນຕໍ ເພື່ອເປັນ ບ່ອນອີງໃນການວາງແກ້ໄຂ ພ້ອມທັງ ເປັນເອກະພາບກ່ຽວກັບບັນດາເນື້ອໃນ ທີ່ເປັນທັດສະນະ, ເປັນທິດທາງ ແລະມາດ ຕະການອັນເປັນພື້ນຖານ ເພື່ອດຳເນີນ ການແກ້ໄຂໃນຕໍ່ໜ້າ.

    ສະຫາຍ ສອນໄຊ ສິດພະໄຊ ໄດ້ຮຽກຮ້ອງໃຫ້ບັນດາສະຫາຍທີ່ເຂົ້າຮ່ວມກອງປະຊຸມຈົ່ງພ້ອມກັນຍົກສູງຄວາມຮັບຜິດຊອບ, ຄວາມເປັນແບບຢ່າງນຳໜ້າ, ຄວາມເດັດດ່ຽວກ້າຫານ ແລະມີຫົວຄິດປະດິດສ້າງໃນການຊີ້ນຳໆພາການຜັນຂະຫຍາຍ ແລະຈັດຕັ້ງປະຕິບັດເນື້ອໃນຈິດໃຈ ແລະຜົນສຳເລັດຂອງກອງປະຊຸມໃນຄັ້ງນີ້ໃຫ້ເປັນແຜນວຽກລະອຽດຢູ່ແຕ່ລະຮາກຖານພັກ ແລະກົມກອງ ຂອງຕົນ, ພ້ອມທັງຈັດຕັ້ງປະຕິບັດໃຫ້ປາກົດຜົນເປັນຈິງໃນແຕ່ລະດ້ານດ້ວຍຄວາມຮັບຜິດຊອບສູງ ແລະພາຍຫຼັງສຳເລັດແລ້ວ,ຄະນະພັກທຸກຂັ້ນຕ້ອງຮີບຮ້ອນນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຈັດຕັ້ງເຜີຍແຜ່ໃຫ້ຖັນແຖວສະມາ ຊິກພັກ-ພະນັກງານທີ່ຢູ່ໃນຄວາມຮັບຜິດຊອບຂອງຕົນໄດ້ກຳແໜ້ນຢ່າງເລິກເຊີ່ງເພື່ອໃຫ້ມີຄວາມເປັນເອກະພາບແລ້ວພ້ອມກັນຜັນຂະຫຍາຍສູ່ພາກປະຕິ ບັດຕົວຈິງໃຫ້ເປັນຮູບປະທຳດ້ວຍ ຈິດໃຈບຸກທະລຸ.

ຂ່າວ: ຣັດສະໝີ ດວງສັດຈະ   

แชร์