ແຂວງເຊກອງ ໄດ້ຮັບເງິນຊ່ວຍເຫຼືອຕ້ານພະຍາດໂຄວິດ-19 ຢ່າງຕໍ່ເນື່ອງ

(ເຊກອງ,ວັນທີ 11/05/2021) * ໃນວັນທີ 11 ພຶດສະພາ 2021 ທີ່ຫ້ອງວ່າການແຂວງເຊກອງ, ຫຼາຍພາກສ່ວນໄດ້ມອບເຄື່ອງອຸປະໂພກ-ບໍລິໂພກ ແລະເງິນສະໜັບສະໜູນ ເພື່ອຮັບໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ  COVID-19 ຢູ່ແຂວງເຊກອງ.

ການສະໜັບສະໜູນຄັ້ງນີ້, ປະກອບມີ 3 ພາກສ່ວນຄື: ພະແນກແຜນການ-ການລົງທຶນແຂວງມອບເງິນສົດ 3ລ້ານກີບ; ພະແນກພະລັງງານ ແລະບໍໍ່ແຮ່ແຂວງມອບເງິນສົດ 2 ລ້ານກີບ, ນໍ້າດື່ມຈຳນວນ 20 ແກັດມູນຄ່າ 5 ແສນກີບ ແລະລັດວິສາຫະກິດໄຟຟ້າລາວສາຂາແຂວງເຊກອງເງິນສົດ 1 ລ້ານກີບ, ເປັນກຽດກ່າວໂດຍທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ, ມີທ່ານຮອງເຈົ້າແຂວງ, ຄະນະສະເພາະກິດຂັ້ນແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

ສໍາລັບການລະດົມເງິນ ແລະເຄື່ອງອຸປະໂພກ-ບໍລິໂພກ ເພື່ອຮັບໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ແຂວງເຊກອງ ເຊິ່ງນັບແຕ່ວັນທີ 30 ເມສາ-10 ພຶດສະພາ 2021 ບັນດາອົງການຈັດຕັ້ງພັກ-ລັດ, ຫົວໜ່ວຍທຸລະກິດ, ຜູ້ປະກອບ ແລະອົງການຈັດຕັ້ງສາກົນໄດ້ສົມທົບທຶນປະກອບສ່ວນຊ່ວຍເຫຼືອ ລວມມູນຄ່າທັງໝົດ 1 ຕື້ກວ່າກີບ, ໃນນັ້ນເປັນເງິນ 650 ລ້ານກວ່າກີບ, ເຄື່ອງອຸປະໂພກ-ບໍລິໂພກມູນຄ່າ97 ລ້ານກວ່າກີບ ແລະອຸປະກອນການແພດມູນຄ່າ 276 ລ້ານກີບ.

(ຂ່າວ-ພາບ: ບູ້ສຸວັນ)

แชร์