ສັກວັກແຊງກັນໂຄວິດເສຍເງິນເປັນຂ່າວປອມ

   ຈາກຂໍ້ມູນທີ່ສື່ສັງຄົມອອນລາຍມີຊື່ວ່າ: ເພັດນ້ອຍ ໜໍ່ພູໄທ ໄດ້ນຳເອົາຮູບພາບ ແລະຄຣິບສຽງປະກອບເຂົ້າເປັນເນື້ອໃນຂ່າວວ່າ: ປະຊາຊົນຊາວເມືອງໂຂງໄປຮັບການສັກວັກແຊງປ້ອງກັນພະຍາດ ໂຄວິດ-19 ເສຍຄ່າບໍລິການຖ້າເປັນປະຊາຊົນແມ່ນເສຍຄົນລະ 600.000ກີບ ແລະຖ້າເປັນພະນັກງານລັດເສຍຄົນລະ 50.000ກີບ ໄດ້ແຜ່ອອກໄປກໍເຮັດໃຫ້ປະຊາຊົນທີ່ບໍ່ຮູ້ຫຼົງເຊື່ອ ແລະຄິດວ່າແມ່ນຄວາມຈິງ. ດັ່ງນັ້ນຄະນະສະເພາະກິດສະກັດກັ້ນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ເມືອງໂຂງຈຶ່ງໄດ້ເຮັດບົດລາຍງານ ເລກທີ 017/ ຈມຂ, ລົງວັນທີ 7 ພຶດສະພາ 2021 ເລື່ອງ: ການເຄື່ອນໄຫວວຽກງານສັກຢາວັກຊີນປ້ອງກັນພະຍາດໂຄ ວິດ-19.

  ກ່ຽວກັບການບໍລິການເຄື່ອນໄຫວສັກວັກຊີນປ້ອງກັນພະຍາດໂຄວິດ-19 ພາຍໃນເມືອງໂຂງຊຶ່ງທາງພະແນກສາທາລະນະສຸກແຂວງຈຳປາສັກໄດ້ລົງສົມທົບກັບຫ້ອງ ການສາທາລະນະສຸກເມືອງໂດຍມີການຈັດຕັ້ງຈຸດສັກຢາຢູ່ໂຮງໝໍເມືອງ; ໃນນັ້ນໄດ້ໃຊ້ທີມງານແພດເຄື່ອນທີ່ໄປບ່ອນຊຸມຊົນ 1 ທີມເປັນຕົ້ນ: ຈຸດໂຮງໝໍນ້ອຍນາກະສັງ, ໂຮງໝໍນ້ອຍຂີ້ນາກ, ໂຮງໝໍນ້ອຍໂພນສະອາດ ແລະຈຸດຕະຫຼາດເມືອງແສນ ຊຶ່ງການສັກຢາດັ່ງກ່າວແມ່ນບໍລິການຟຣີໃຫ້ກັບປະຊາຊົນ. ສຳລັບການເກັບເງິນຄ່າບໍລິການສັກຢາວັກຊີນປ້ອງກັນພະຍາດໂຄວິດ-19 ນຳປະຊາຊົນຊາວເມືອງໂຂງແມ່ນບໍ່ມີມູນຄວາມຈິງຕາມທີ່ສື່ສັງຄົມອອນລາຍໄດ້ກ່າວເພາະວ່າສະຖານທີ່ສັກຢາ, ແພດ ແລະຜູ້ທີ່ສັກວັກແຊງໃນຄຣິບດັ່ງກ່າວບໍ່ແມ່ນສະຖານທີ່ຂອງເມືອງ, ແພດ ແລະບຸກຄົນທີ່ມາຮັບວັກຊີນກໍບໍ່ແມ່ນຢູ່ບັນດາຈຸດຮັບບໍລິການສັກວັກຊີນຂອງເມືອງໂຂງ.

  ຂໍ້ມູນທີ່ລົງທາງສື່ສັງຄົມອອນລາຍນີ້ເປັນການສ້າງຄວາມປັ່ນປ່ວນ ແລະໃສ່ຮ້າຍປ້າຍສີ. ສະນັ້ນຄະນະສະເພາະກິດສະກັດກັ້ນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ເມືອງໂຂງຈຶ່ງຂໍຢັ້ງຢືນອີກຄັ້ງຂ່າວດັ່ງກ່າວເປັນພຽງ (ຂ່າວປອມ) ບໍ່ມີມູນຄວາມຈິງ.

ຂ່າວ: ພຸດທະສິນ ວົງວິໄລທອງ

แชร์