ລະວັງ! ຂ່າວປ່ວນ

  ປະຈຸບັນ ສື່ສານມວນຊົນມີບົດບາດສໍາຄັນຕໍ່ກັບການດໍາລົງຊີວິດຂອງມະນຸດກາຍເປັນອາຫານ, ເປັນສານກະຕຸ້ນ, ເປັນອາວຸດເພື່ອສະທ້ອນທັດສະນະ ຫຼືສະເໜີບັນຫາຕ່າງໆໃນສັງຄົມມີທັງອັນບວກ ແລະລົບ; ດັ່ງນັ້ນ, ຄວນເສບຂ່າວ ຢ່າງມີສະຕິ, ມີການກັ່ນກ່ອງ ແລະບໍລິໂພກຂ່າວຢ່າງຖືກຕ້ອງ, ຢ່າຕົກເປັນເຄື່ອງມືຂອງກຸ່ມຄົນບໍ່ດີ ໂດຍໃນຂະນະນີ້ສື່ສັງຄົມອອນລາຍ ຫຼືສື່ໂຊຊຽວມີເດຍມີບົດບາດປະຈັນບານໃນແນວຮົບສື່ມວນຊົນຂອງໂລກສາມາດອອກໄວທັນເຫດການ ແລະໃຫ້ຂໍ້ມູນ 2 ດ້ານ ທັງອັນດີ-ບໍ່ດີ ທີ່ສາມາດຄອບງໍາຈິດໃຈຄົນໄວທີ່ສຸດແຕ່ກໍ່ມີເບື້ອງລົບຄື: ການຫຼອກລວງ, ບິດເບືອນໂດຍຄົນໃນໂລກໂຊຊຽວເອີ້ນວ່າ: “ສື່ປ່ວນ ຫຼືສື່ປ່ວຍ”,ສະນັ້ນຄວນແຍກແຍະໃຫ້ດີວ່າ: ໂຕໃດຂ່າວແທ້-ໂຕໃດຂ່າວປອມ.

   ເມື່ອເປັນເຊັ່ນນັ້ນໃນຜ່ານມາມີຫຼາຍປະເທດໃນກໍລະນີເກີດມີເຫດການບໍ່ປົກກະຕິເປັນຕົ້ນພະຍາດລະບາດ, ໄພພິບັດທາງທໍາມະຊາດ, ອັກຄີໄພ, ວິກິດເສດຖະກິດ... ແລະອື່ນໆທີ່ຮ້າຍແຮງລັດຖະບານ ຫຼືທາງການຂອງປະເທດນັ້ນໆກໍ່ຈະອອກຖະແຫຼງຂ່າວ ຫຼື ໃຫ້ຂໍ້ມູນທີ່ຖືກຕ້ອງ ແລະ ຊັດເຈນດັ່ງຢູ່ ສປປ ລາວ ກໍລະນີເຫດການສັນ ເຂື່ອນແຕກຢູ່ເຊປຽນ-ເຊນໍ້ານ້ອຍ (ເມືອງສະໜາມໄຊ ແຂວງອັດຕະປື ປີ 2018) ເຫດການການ ແຜ່ລະບາດພະຍາດໂຄວິດ-19 ຮອບ 1 (2020) ແລະຮອບ 2 (2021) ຊຶ່ງໃນຮອບ 2 ແມ່ນພວມ ແຜ່ລະບາດບໍລິເວນກ້ວາງ ດັ່ງນັ້ນ ລັດຖະບານຈຶ່ງອອກຄໍາສັ່ງ ເລກທີ 15/ນຍ, ລົງວັນທີ 21.ເມສາ.2021 ວ່າດ້ວຍການປິດ (Lockdown) ນະຄອນຫຼວງວຽງຈັນ(ນວ) ນັບແຕ່ວັນທີ 22. ເມສາຫາວັນທີ 05.ພຶດສະພາ. 2021 ແລະກໍ່ໄດ້ຂະຫຍາຍເວລາການປິດ ນວ ຕື່ມອີກຈົນເຖິງ ວັນທີ 20.ພຶດສະພາ.2021 ສໍາລັບການແຜ່ລະບາດພະຍາດໂຄວິດ-19 ຮອບ 2, ລັດຖະບານ, ອົງການປົກຄອງທ້ອງຖິ່ນ, ປະຊາຊົນເຮົາໄດ້ພ້ອມກັນຕໍ່ສູ້ຕ້ານກັບພະຍາດດັ່ງກ່າວຢ່າງຕັ້ງໜ້າ ແລະແຂງແຮງຊຶ່ງສູນກາງພັກໃນຖານະອົງການນໍາພາໄດ້ວາງມະຕິ, ຄໍາສັ່ງເດັດຂາດໂດຍກົງຮອບດ້ານຄືໃນພາວະສົງຄາມໂດຍມອບໃຫ້ລັດຖະບານທີ່ເປັນອົງການບໍລິຫານປະເທດສືບຕໍ່ບັນຊາການຢູ່ສະໝໍລະພູມຮົບຄັ້ງນີ້ ແລະກໍ່ໄດ້ຮັບການສະໜັບສະໜູນ,ເປັນກໍາລັງໃຈ-ກຳລັງວັດຖຸ ແລະໃຫ້ການຮ່ວມມືເປັນຢ່າງດີຈາກປະຊາຊົນລາວບັນດາເຜົ່າໃນທົ່ວປະເທດລວມທັງບັນດາປະເທດມະຫາມິດຄື: ສສ.ຫວຽດນາມ, ສປ ຈີນ ແລະເພື່ອນມິດໃນໂລກ-ອົງການຈັດຕັ້ງສາກົນ ແລະພາກສ່ວນຕ່າງໆ ຈຶ່ງເຮັດໃຫ້ການຮັບມື, ເຝົ້າລະວັງພະຍາດດັ່ງກ່າວໄດ້ຮັບການແກ້ໄຂດ້ວຍດີສະເໝີມາ.

  ແຕ່ໃນໄລຍະດຽວກັນນີ້ກໍ່ມີກຸ່ມຄົນບໍ່ດີຈໍານວນໜຶ່ງມີຄວາມອິດສາຕາຮ້ອນ, ເກີດມີແນວຄິດອະຄະຕິຕາມແບບສະບັບຝືນປະຕິວັດໄດ້ດູຖູກ ແລະໃສ່ຮ້າຍປ້າຍສີຕໍ່ຜົນງານອັນພົ້ນເດັ່ນຂອງລັດຖະບານ ແລະປະຊາຊົນລາວທີ່ຍາດມາໄດ້ໃນມະຫາສາມັກຄີຕໍ່ສູ້ຕ້ານສົງຄາມໂຄວິດລວມທັງນໍ້າໃຈທີ່ເຕັມໄປດ້ວຍມະນຸດສະທໍາຂອງປະຊາຊົນບັນ ດາປະເທດເພື່ອນມິດສາກົນ, ອົງການຈັດຕັ້ງສາກົນ ແລະອົງການຈັດຕັ້ງຕ່າງໆທີ່ມີຄວາມຈິງໃຈໃຫ້ການຊ່ວຍເຫຼືອປະຊາຊົນລາວພວກກຸ່ມຄົນບໍ່ດີເຫຼົ່ານີ້ໄດ້ອອກ ແຮງເຄື່ອນໄຫວໂຈມຕີແນວທາງອັນຖືກຕ້ອງເປັນທຳຂອງພັກ ແລະລັດຖະບານເຮົາດ້ວຍສົງຄາມດອກມະລິ ຫຼືສີສົ້ມໃນທຸກຮູບແບບໂດຍຜ່ານສື່ໂຊຊຽວທີ່ຫວ່ານຖ້ອຍຄໍາບິດເບືອນ, ຕົວະຍົວະ, ຫຼອກລວງ, ປີ້ນໜ້າມືເປັນຫຼັງມືກ່າວຫາຕ່າງໆນາໆຕໍ່ການຊ່ວຍເຫຼືອອັນລໍ້າຄ່າຂອງບັນດາປະເທດເພື່ອນມິດແນໃສ່ເຮັດໃຫ້ປະຊາຊົນລາວຖືກໂດດ ດ່ຽວຈາກປະຊາຄົມໂລກ.

   ດັ່ງນັ້ນເພື່ອໃຫ້ປະຊາຊົນລາວບັນດາເຜົ່າລວມທັງບັນດາປະເທດເພື່ອນມິດສາກົນ ແລະພາກສ່ວນກ່ຽວຂ້ອງມີຄວາມເຂົ້າໃຈແຈ້ງຕໍ່ແນວທາງການຈັດຕັ້ງການແກ້ບັນ ຫາພະຍາດໂຄວິດ-19 ຂອງ ສປປ ລາວ ລັດຖະບານແຫ່ງ ສປປ ລາວ ໄດ້ອອກຖະແຫຼງການໃນແຕ່ລະໄລຍະຢ່າງຕໍ່ເນື່ອງຕໍ່ກັບການເຝົ້າລະວັງ,ມາດຕະການ, ນະໂຍ ບາຍຕ່າງໆຢ່າງຄົບຖ້ວນໂດຍສະເພາະຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 (ຄະນະສະເພາະກິດ COVID-19) ໄດ້ຖະແຫຼງຂ່າວລາຍວັນກ່ຽວກັບບັນຫາການແກ້ໄຂພະຍາດດັ່ງກ່າວຜ່ານສື່ຕ່າງໆຂອງລັດຖະບານນອກນີ້ບັນດາສໍານັກຂ່າວເຫຼົ່ານີ້ໄດ້ເປັນຜູ້ຜະລິດ ແລະສົ່ງ ຫຼືແລກປ່ຽນຂໍ້ຄວາມຮູບພາບຜ່ານສື່ທາງການສະນັ້ນຂໍໃຫ້ຕິດຕາມຮັບຂ່າວສານທີ່ຖືກຕ້ອງຕາມຄວາມເປັນຈິງໂດຍມີໜັງສືພິມ, ວິທະຍຸ ແລະໂທລະພາບລາຍງານຂ່າວເປັນປະຈໍາໂດຍຜ່ານ Facebook, YouTube ແລະອື່ນໆອີກ.

   ຕໍ່ກັບ 2 ກໍລະນີດັ່ງກ່າວເກີດຂຶ້ນພວກສື່ສັງຄົມອອນລາຍ ແລະ ບຸກຄົນບໍ່ດີຈໍານວນໜຶ່ງທີ່ຢູ່ພາຍໃນ ແລະ ນອກປະເທດກໍ່ໄດ້ຕີແຜ່ຂ່າວທີ່ບໍ່ຖືກຕ້ອງກັບຄວາມເປັນຈິງ ພວກເຂົາໄດ້ປ່ອຍຂ່າວບິດເບືອນ, ໂຈມຕີທາງການຂອງພວກເຮົາ ດ້ວຍຖ້ວຍທໍານອງເປັນປໍລະປັກ, ໃສ່ຮ້າຍປ້າຍສີຕໍ່ການນໍາພາຂອງພັກ ແລະລັດຖະບານໃນການແກ້ໄຂບັນຫາດັ່ງກ່າວພ້ອມນັ້ນຍັງນໍາເອົາຂໍ້ຄົງຄ້າງທີ່ເປັນຊົ່ວຄາວສ້າງເປັນຂ່າວຄຶກໂຄມ, ສ້າງເລື່ອງນ້ອຍເປັນເລື່ອງໃຫຍ່ສ້າງຄວາມລະແວງສົງໃສ, ແບ່ງແຍກຊົນເຜົ່າຊັ້ນຄົນໃຫ້ກຽດຊັງກັນ ແລະ ບັນຫາອື່ນໆ ຕາມສົງຄາມການຫັນປ່ຽນໂດຍສັນຕິແນໃສ່ເຮັດໃຫ້ອໍານາດລັດອ່ອນເພຍທຸກການກະທໍານັ້ນໆລ້ວນແຕ່ເປັນການລ່ວງລະເມີດກົດ ໝາຍ ແລະ ລະບຽບການຂອງ ສປປ ລາວ ເປັນຕົ້ນກົດໝາຍອາຍາ, ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກໍາທາງລະບົບຄອມພິວເຕີມາດຕາ 13 ວ່າດ້ວຍການສ້າງຄວາມເສຍຫາຍຜ່ານສື່ສັງຄົມອອນລາຍ ແລະດໍາລັດວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນເຕິເນັດ ມາດຕາ 10 ວ່າດ້ວຍເນື້ອໃນທີ່ບໍ່ອະນຸຍາດເຜີຍແຜ່ຜ່ານອິນເຕິເນັດ....ໃນຂະນະດຽວກັນນັ້ນ, ທຸກສຳນັກງານ-ອົງການຄວນຄວບຄຸມ-ຄຸ້ມຄອງພະນັກງານຕົ້ນສັງກັດຂອງຕົນເອງໃຫ້ແໜ້ນ, ສາມາດເອົາຜິດໄດ້ທັນການຕໍ່ການເຜີຍແຜ່ເອກະສານທາງການທີ່ສຳຄັນໄປຍັງສື່ໂຊຊຽວທີ່ບໍ່ໄດ້ຮັບອະນຸຍາດຈາກເຈົ້າອົງການປົກຄອງທ້ອງຖິ່ນ-ຂະແໜງການນັ້ນໆ.

  ໃນຖານະສື່ມວນຊົນຂໍຮຽກຮ້ອງມາຍັງທຸກສໍານັກຂ່າວ-ຜູ້ສື່ຂ່າວສືບ ຕໍ່ເຊີດຊູຈັນຍາບັນວິຊາຊີບຂ່າວ, ເຊີດຊູນໍ້າໃຈປະຕິວັດບຸກກ້າຫານເຜີຍແຜ່ໂທດກໍາຂອງພວກເຂົາທີ່ມີແຜນທໍາລາຍປະເທດຂອງພວກເຮົາທີ່ກໍາລັງປະເຊີນກັບການແຜ່ລະບາດພະຍາດໂຄວິດ-19 ຕອບໂຕ້-ຕອບຕ້ານກຸ່ມຄົນບໍ່ດີດ້ວຍປາຍປາກກາທີ່ຄົມແຫຼມ,ເດັດດ່ຽວຕໍ່ສູ້ຕ້ານກັບພວກຝືນປະຕິວັດດ້ວຍທຸກຮູບແບບຂອງນັກຮົບແນວຄິດວັດທະນາທໍາ, ເປັນກະບອກສຽງໂຄສະນາແນວທາງ, ມາດຕະການນະໂຍບາຍຂອງພັກ ແລະລັດຖະ ບານໃນການແກ້ໄຂສະຖານະການການແຜ່ລະບາດຂອງພະຍາດໂຄວິດໃຫ້ຄ່ອຍໆຜ່ອນເບົາລົງ ແລະກັບຄືນສູ່ຄວາມເປັນປົກກະຕິໂດຍໄວສຳລັບ, ພວກຄົນບໍ່ດີທີ່ປັ່ນປ່ວນກໍ່ຄວາມວຸ້ນວາຍ, ຄວາມບໍ່ສະຫງົບທາງດ້ານຂໍ້ມູນໂດຍບິດເບືອນຄວາມເປັນຈິງ, ສ້າງຂ່າວລື-ຂ່າວປອມ ຫຼືຂ່າວອະກຸສົນນັ້ນຂໍໃຫ້ເຈົ້າໜ້າທີ່ໆກ່ຽວຂ້ອງເດັດດ່ຽວລົງໂທດພວກກະທໍາຜິດຢ່າງເດັດຂາດ ແລະວ່ອງໄວທັງນີ້ກໍ່ເພື່ອຮັກສາຄວາມສະຫງົບ, ປອດໄພຂອງປະເທດ ແລະປະຊາຊົນລາວພ້ອມກັນນັ້ນ, ກໍ່ສືບຕໍ່ຈັດຕັ້ງປະຕິບັດຕາມແນວທາງ, ລະບຽບກົດໝາຍກໍ່ຄືການຜັນຂະຫຍາຍການຊີ້ນໍາຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ນາຍົກລັດຖະມົນຕີສະໄໝທີ VIII ທີ່ກ່າວຢູ່ສູນຊ່ວຍເຫຼືອກະຊວງ ຮສສ (ວັນທີ 29 ກໍລະກົດ 2018) ໂດຍໃຫ້ພໍ່ແມ່ປະຊາຊົນຕ້ອງມີສະມາທິ, ມີຄວາມຕັ້ງໃຈຊ່ວຍເຫຼືອ ແລະຂໍໃຫ້ປະຊາຊົນຢູ່ໃນທ້ອງຖິ່ນຕ່າງໆ ຢ່າຫຼົງເຊື່ອຂ່າວລື, ໃຫ້ຕິດຕາມຂ່າວສະພາບການຕ່າງໆຈາກທາງລັດຖະບານໃນແຕ່ລະໄລຍະທີ່ທາງການອອກມາຖະແຫຼງ ຫຼືໃຫ້ຂໍ້ມູນທີ່ຖືກຕ້ອງ ແລະທັນເວລາ.

ໂດຍ: ຣັດສະໝີ ດວງສັດຈະ

แชร์