ຫຼາຍພາກສ່ວນສະໜັບສະໜູນຈຳປາສັກຕ້ານໂຄວິດ-19

  ວັນທີ 10 ພຶດສະພາ 2021, ທີ່ຫ້ອງວ່າການແຂວງຈຳປາສັກ, ຫຼາຍພາກ ສ່ວນໄດ້ມອບເຄື່ອງອຸປະໂພກ-ບໍລິໂພກ,ອຸປະກອນການແພດ ແລະເງິນສະໜັບສະໜູນເພື່ອຮັບໃຊ້ເຂົ້າໃນວຽກງານປ້ອງກັນ, ຄວບຄຸມ ແລະສະກັດກັ້ນການລະບາດພະຍາດໂຄວິດ-19 ຢູ່ແຂວງຈຳປາ ສັກໂດຍການສະໜັບ ສະໜູນໃນຄັ້ງນີ້, ປະກອບມີຫຼາຍພາກສ່ວນຄື: ບໍລິສັດ ເອັສທີ ກຣຸບ ແລະທະນາຄານ ເອັສທີ ຈຳກັດ ປະກອບສ່ວນເງິນຈຳນວນ 100 ລ້ານກີບ; ສະພາການຄ້າຈີນ ປະຈຳປາກເຊ ປະກອບສ່ວນເງິນ ຈຳນວນ 100 ລ້ານກີບ ແລະ ເຄື່ອງມືອຸປະກອນການແພດ ມູນຄ່າ 300 ລ້ານກວ່າກີບ, ລວມມູນຄ່າ ທັງໝົດ 400 ລ້ານກວ່າກີບ; ພະແນກອຸດສະຫະກຳ ແລະການຄ້າ ແຂວງຈຳປາສັກ ມອບຕຽງນອນຄົນເຈັບຈຳນວນ 10 ຊຸດ ມູນຄ່າ 33 ລ້ານກີບ; ສອງພາກສ່ວນມອບຕຽງ ນອນຄົນເຈັບ 25 ຊຸດ ແລະ ອຸປະກອນການແພດໂດຍຜ່ານພະແນກການເງິນແຂວງມີ: ບໍລິສັດ ຊະນະໄຊ ຜະລິດຕະພັນ ແລະອົບແຫ້ງສາລີ ຈຳກັດ ມອບຕຽງນອນຄົນເຈັບ 5 ຊຸດ ມູນຄ່າ 16 ລ້ານກວ່າກີບ ແລະບໍລິສັດ ຄູນຊັບ ຂາອອກ-ຂາເຂົ້າ ຈຳກັດ ຜູ້ດຽວ ມອບຕຽງນອນຄົນເຈັບ 20 ຊຸດ ແລະອຸປະກອນການແພດລວມມູນຄ່າ 85 ລ້ານກວ່າກີບ. ພະແນກແຜນການ ແລະການລົງທຶນ ແຂວງຈຳປາສັກ ໄດ້ຕາງໜ້າໃຫ້ 6 ບໍລິສັດ ລົງທຶນ ມອບຕຽງນອນຄົນເຈັບ 40 ຊຸດ ມູນຄ່າ 131 ລ້ານກວ່າກີບ ແລະບັນດາໂຄງການ, ບໍລິສັດ ລວມ 8 ພາກສ່ວນຂົງເຂດພະລັງງານ ແລະບໍ່ແຮ່ແຂວງຈຳປາສັກ ປະກອບສ່ວນ ເງິນຈຳນວນ 80 ລ້ານ ແລະປະກອບສ່ວນເປັນມູນຄ່າການສ້ອງແປງລະບົບໄຟຟ້າເທດສະບານນະຄອນປາກເຊ ແລະອຸປະກອນການແພດລວມມູນຄ່າ ທັງໝົດ 147 ລ້ານກວ່າກີບ, ເປັນກຽດກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກຜູ້ຊີ້ນຳຄະນະກຳມະການຜັນຂະຫຍາຍນະໂຍບາຍ, ມາດຕະການເພື່ອຫຼຸດຜ່ອນຜົນກະທົບທາງດ້ານເສດຖະກິດ ແລະລະດົມການປະກອບສ່ວນຈາກສັງຄົມ, ມີຄະນະສະເພາະກິດສະກັດກັ້ນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ແຂວງຈຳປາສັກ ແລະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  ໂອກາດນີ້, ທ່ານເຈົ້າແຂວງຈຳປາສັກ ກໍໄດ້ສະແດງຄວາມຂອບໃຈ ແລະ ຊົມເຊີຍມາຍັງທຸກພາກສ່ວນຮູ້ບຸນຄຸນໄປຍັງທ່ານປະທານ, ຜູ້ປະກອບການທຸກພາກສ່ວນທີ່ໄດ້ໃຫ້ການສະໜັບສະໜູນປະກອບສ່ວນເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ແຂວງຈຳປາສັກ. ພ້ອມນີ້, ທ່ານເຈົ້າແຂວງຈຳປາສັກ ໄດ້ແຈ້ງໃຫ້ຮູ້ເຖິງສະພາບລວມຂອງການລະບາດຢູ່ແຂວງຈຳປາສັກມີທ່າອຽງດີຂື້ນ, ຕົວເລກຜູ້ຕິດເຊື້ອແມ່ນຫຼຸດຜ່ອນລົງ ແລະສຳລັບການນໍາໃຊ້ເຄື່ອງອຸປະກອນ ແລະເງິນສະໜັບສະໜູນດັ່ງກ່າວອົງການປົກຄອງ ແຂວງຈຳປາສັກ ແມ່ນໄດ້ແຈກຢາຍໃຫ້ຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ເມືອງ ແລະ ນຳໃຊ້ຕາມຈຸດປະສົງ ແລະຄາດໝາຍຂອງການປະກອບສ່ວນ.

ຂ່າວ: ທັດຊະນະ

แชร์