ບໍລິຄຳໄຊ ມອບກົນຈັກຜະລິດກະສິກຳ 3 ເມືອງ

   ພິທີມອບ-ຮັບເຄື່ອງກົນຈັກກະສິກຳໃຫ້ກຸ່ມຜະລິດກະສິກຳເປັນສິນຄ້າ 3 ເມືອງເປົ້າໝາຍໄດ້ຈັດຂຶ້ນໃນວັນທີ 7 ພຶດສະພາ ນີ້ຢູ່ພະແນກກະສິກຳ ແລະ ປ່າໄມ້ແຂວງລະຫວ່າງອົງການປົກຄອງແຂວງ ແລະກຸ່ມຜະລິດກະສິກຳສິນຄ້າ ແລະເປັນກຽດເຂົ້າຮ່ວມໃນພິທີມອບຄັ້ງນີ້ໂດຍທ່ານ ບຸນເສັງ ປະທຳມະວົງ ຮອງເຈົ້າແຂວງ, ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີຕາງໜ້າພະແນກອຸດສາຫະກຳ ແລະ ການຄ້າແຂວງ, ສະພາປະຊາຊົນແຂວງ ແລະ ພາກ ສ່ວນທີ່ກ່ຽວຂ້ອງເຂົ້າຮ່ວມ.

   ເຄື່ອງກົນຈັກກະສິກຳທີ່ນຳມາມອບໃນຄັ້ງນີ້ປະກອບມີລົດໄຖນາຫຍີ່ຫໍ້ຄູໂບຕ້າຈຳນວນ 8 ຄັນ, ລົດດໍານາ 1 ຄັນ ແລະ ລົດກ່ຽວເຂົ້າ 1 ຄັນ ລວມມູນຄ່າທັງໝົດ 1,6 ແສນໂດລາສະຫະລັດ ຊຶ່ງເປັນໂຄງການຮ່ວມມືລະຫວ່າງລັດຖະບານລາວ ກັບທະນາຄານໂລກຕາມແຜນຄໍ້າສະບຽງອາຫານ ແລະຜະລິດເປັນສິນຄ້າລະດັບຊາດ, ໂຄງການເງິນກູ້ຢືມຈາກທະນາຄານໂລກ ແລະໂຄງການຜະລິດກຳສິກຳເປັນສິນຄ້າຢູ່ ສປປ ລາວ. ເຄື່ອງກົນຈັກກະສິກຳດັ່ງກ່າວນີ້ໄດ້ມອບໃຫ້ກຸ່ມຜະລິດກະສິກຳເປັນສິນ ຄ້າທີ່ນອນຢູ່ໃນກຸ່ມເປົ້າໝາຍ 3 ເມືອງຄື: ເມືອງປາກຊັນມີ 7 ກຸ່ມຜະລິດເຂົ້າເປັນສິນຄ້າ ແລະກຸ່ມຜະລິດແນວພັນເຂົ້າໄດ້ຮັບລົດໄຖ 6 ຄັນ ແລະລົດກ່ຽວເຂົ້າ 1 ຄັນເມືອງທ່າພະບາດ ມີ 3 ກຸ່ມຄື: ກຸ່ມຜະລິດແນວພັນເຂົ້າ ແລະກຸ່ມຜະລິດເຂົ້າເປັນສິນຄ້າໄດ້ຮັບລົດໄຖ 2 ຄັນ ແລະລົດດຳນາ ແບບເດີນຕາມຈຳນວນ 1 ຄັນ ແລະ ກຸ່ມ ຜະລິດແນວພັນເຂົ້າເມືອງບໍລິຄັນ ໄດ້ຮັບ ລົດໄຖນາ 1 ຄັນ, ສະລັບການສະໜອງເຄື່ອງກົນຈັກກະສິກຳໃຫ້ກຸ່ມຊາວກະສິກອນຜະລິດກະສິກຳເປັນສິນຄ້າໃນຄັ້ງນີ້ແມ່ນທຶນສົມທົບຂອງລັດຖະບານກຸ່ມ 1 ມູນຄ່າ 16 ພັນໂດລາສະຫະລັດ ເພື່ອເປັນການຍົກລະດັບການຜະລິດກະສິກຳຂອງຊາວກະສິກອນພາຍໃນ 3 ເມືອງ ເປົ້າໝາຍຫັນເຂົ້າສູ່ການຜະລິດແບບທັນສະໄໝ, ການຜະລິດທີ່ມີຄຸນນະພາບ, ຍົກລະດັບຄຸນນະພາບຂອງການຜະລິດກະສິກຳທີ່ດີ.

ຂ່າວ: ວຽງສະຫວັນ

แชร์