ເຈົ້າແຂວງສະຫວັນນະເຂດ ຕິດຕາມຊົນລະກະເສດຢູ່ຈຳພອນ

  ໃນວັນທີ 6 ພຶດສະພາ 2021 ນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມດ້ວຍພະແນກກະສິກໍາ ແລະປ່າໄມ້ແຂວງ, ພະແນກການກ່ຽວຂ້ອງ ແລະຂະແໜງການໄດ້ລົງເບິ່ງຄວາມຄືບໜ້າໂຄງການພັດທະນາຊົນລະກະເສດ ແລະຊົນນະບົດຮອບດ້ານທີ່ເມືອງຈໍາພອນ; ຈຸດທີ່ລົງເບິ່ງກໍມີເຂດກໍ່ສ້າງຫ້ອງການຂອງໂຄງການແມ່ນຕັ້ງຢູ່ບ້ານໂພນສະອາດ ຫຼືຈຸດສຸມໄຊສໍາພັນເກົ່າ ແລະຈຸດຕັ້ງຫົວງານ ຫຼືຈຸດຕັ້ງຈັກສູບນໍ້າແມ່ນຢູ່ຝາຍສູບເຂດບ້ານດອນແຍງ.

   ໂຄງການພັດທະນາຊົນລະກະເສດ ແລະຊົນນະບົດຮອບດ້ານແມ່ນຈັດຕັ້ງປະຕິບັດຢູ່ 2 ເມືອງ ຂອງແຂວງສະຫວັນນະເຂດຄື: ຢູ່ເມືອງສອງຄອນຊຶ່ງຄວາມຄືບໜ້າການກໍ່ສ້າງໂຄງການແມ່ນໄດ້ 13,7%, ສ່ວນເມືອງຈໍາພອນແມ່ນໄດ້ 5,97% ໂຄງການນີ້ແມ່ນໄດ້ຮັບທຶນກູ້ຢືມຈາກທະນາຄານຂາອອກ-ຂາເຂົ້າ ປະເທດເກົາຫຼີ ມູນຄ່າ 46 ລ້ານໂດລາສະຫະລັດ ຊຶ່ງເຈົ້າຂອງໂຄງການແມ່ນກົມຊົນລະປະທານກະຊວງກະສິກໍາ ແລະປ່າໄມ້, ໂດຍມີບໍລິສັດຮ່ວມດາຊານ-ໂຍຊິນ ຈາກປະເທດເກົາຫຼີເປັນທີ່ປຶກສາໂຄງການ, ມີມູນຄ່າສັນຍາກໍ່ສ້າງ 25 ລ້ານກວ່າໂດລາສະຫະລັດ, ຊຶ່ງມີໄລຍະເວລາຂອງການກໍ່ສ້າງໂຄງການແຕ່ປີ 2020 ຫາ 2023 ຂະນະທີ່ມີການສຶກສາຄວາມເປັນໄປໄດ້ຂອງໂຄງການແຕ່ສົກປີ 2011-2012.

   ກິດຈະກໍາຫຼັກຂອງໂຄງການແມ່ນຟື້ນຟູປັບປຸງອ່າງເກັບນໍ້າສຸຍ 6 ປະຕູ, ຟື້ນຟູລະບົບຫົວງານຈັກສູບນໍ້າ 2 ແຫ່ງ, ກໍ່ສ້າງລະບົບສົ່ງນໍ້າພ້ອມດ້ວຍອາຄານຕາມຄອງເໝືອງຍາວ 22,3 ກິໂລແມັດ, ມີການກໍ່ສ້າງເສັ້ນທາງຂົນສົ່ງສິນຄ້າກະສິກໍາຍາວ 55,4 ກິໂລແມັດ, ເບີກເບີກເປັນພື້ນທີ່ນາໄຮ່ໃຫຍ່ເນື້ອທີ່ 53 ເຮັກຕາ, ຈະມີການປັບປຸງເສັ້ນທາງຊົນນະບົດຍາວ 34 ກິໂລແມັດ, ກໍ່ສ້າງສູນພັດທະນາເຕັກນິກກະສິກໍາຊຸມຊົນ 2 ແຫ່ງ, ພ້ອມນີ້ກໍຈະກໍ່ສ້າງໂຮງສີທັນສະໄໝ 1 ແຫ່ງ ສາມາດສີໄດ້ 3 ໂຕນເຄິ່ງຕໍ່ຊົ່ວໂມງ, ກໍາລັງການຜະລິດ 3 ໂຕນຕໍ່ຊົ່ວໂມງ, ສ້າງສາງອົບແຫ້ງເມັດ.

   ທັງນີ້, ກໍ່ເພື່ອສະໜອງນໍ້າໃຫ້ແກ່ການຜະລິດລະດູແລ້ງ ແລະລະດູຝົນໃຫ້ກຸ້ມຊາວນາແຕ່ລະເຂດໃນແຂວງສະຫວັນນະເຂດໂດຍສະເພາະເມືອງຈໍາພອນ ແລະເມືອງສອງຄອນ, ເນື່ອງຈາກເມືອງຈໍາພອນເປັນເຂດຜະລິດເຂົ້ານາແຊງຫຼາຍກວ່າໝູ່ຂອງແຂວງສະຫວັນນະເຂດຊຶ່ງມີເນື້ອທີ່ຜະລິດເຂົ້ານາແຊງປີ 2020 ຜ່ານມາ ສາມາດຜະລິດໄດ້ 12 ພັນ 800 ເຮັກຕາ ຊຶ່ງເນື້ອທີ່ຜະລິດເຂົ້ານາແຊງທົ່ວແຂວງມີ 30 ພັນ 600 ເຮັກຕາ, ສ່ວນເນື້ອທີ່ນາປີທົ່ວແຂວງມີ 2 ແສນ 12 ພັນເຮັກຕາ ຫຼາຍກວ່າໝູ່ແມ່ນເມືອງສອງຄອນມີເຖິງ 33 ພັນກວ່າເຮັກຕາ.

  ການທີ່ລັດຖະບານ ສປປ ລາວ ຍາດແຍ່ງໂຄງການພັດທະນາຊົນລະກະເສດ ແລະ ຊົນນະບົດຮອບດ້ານມາຈັດຕັງປະຕິບັດທີ່ເມືອງຈໍາພອນ ແລະ ສອງຄອນກໍ່ເພື່ອຍົກສູງສະມັດຕະພາບການຜະລິດເນື່ອງຈາກທັງສອງເມືອງເປັນອູ່ເຂົ້າຂອງປະເທດທີ່ສາມາດຜະລິດໄດ້ຫຼາຍກວ່າໝູ່ທັງນາປີ ແລະນາແຊງ ສະນັ້ນການສ້າງພື້ນຖານໃຫ້ແກ່ລະບົບການຜະລິດຈຶ່ງເປັນທ່າແຮງສໍາຄັນໃຫ້ແກ່ກຸ່ມການຜະລິດກໍ່ຄືຊາວນາເຂດໂຄງການເພື່ອພັດທະນາສີມືຕົນເອງ.

แชร์