5 ບ້ານ ເມືອງປະທຸມພອນຖືກກະທົບໜັກຈາກພາຍຸ

   ໃນວັນທີ 5 ພຶດສະພາ 2021, ທ່ານ ວຽງສິໄໝ ສີລິພອນພັນ ເຈົ້າເມືອງໆປະທຸມພອນ ພ້ອມດ້ວຍຄະນະກຳມະການຄວບຄຸມໄຟພິບັດຂັ້ນເມືອງໄດ້ລົງເຄື່ອນໄຫວຕິດຕາມຊີວິດການເປັນຢູ່ຂອງປະຊາຊົນທີ່ຖືກຜົນກະທົບຈາກໄພພິບັດລົມພາຍຸລະດູຮ້ອນພັດເຮືອນທີ່ຢູ່ອາໄສກຸ່ມສະໜິງ ແລະກຸ່ມພະໂພ ເມືອງປະທຸມພອນ ແຂວງຈຳປາສັກ.

   ຄະນະກໍາມະການຄວບຄຸມໄພພິບັດຂັ້ນເມືອງໄດ້ລາຍງານໃຫ້ຮູ້ວ່າ: ໃນວັນທີ 4 ພຶດສະພາ 2021, ເວລາປະມານ 23:10 ໂມງ ໄດ້ເກີດມີລົມພາຍຸລະດູຮ້ອນພັດເຂົ້າໃສ່ເຮືອນຂອງປະຊາຊົນໃນ 2 ກຸ່ມຄື: ກຸ່ມພະໂພມີ: ບ້ານໜອງໝາກເອກ, ບ້ານພະລາຍ, ບ້ານຜັກຂະ, ກຸ່ມສະໜິງມີ: ບ້ານແກແລ, ບ້ານຄອນທູດ ເມືອງປະທຸມພອນ ແຂວງຈຳປາສັກ,ໄດ້ສ້າງຜົນເສຍຫາຍເຮັດໃຫ້ເຮືອນຊານທີ່ຢູ່ອາໄສຂອງປະຊາຊົນໃນ 2 ກຸ່ມ ດັ່ງກ່າວເປ້ເພລວມມີ 5 ບ້ານ 97 ຫຼັງຄາເຮືອນ,ປະເມີນຜົນເສຍ ຫາຍ 60% ຂຶ້ນໄປມີ 2 ຫຼັງ ແລະເສຍຫາຍ 50% ມີ 3 ຫຼັງ,30% ລົງມາມີ 92 ຫຼັງຄາເຮືອນນອກຈາກນີ້ຍັງມີໂຮງຮຽນ 3 ຫຼັງ, ສຸກສາລາ 1 ຫຼັງ, ວັດ 1 ຫຼັງ ແລະເລົ້າເຂົ້າ 1 ຫຼັງບໍ່ມີຕົວເລກບາດເຈັບ ຫຼືເສຍຊີວິດ. ປະເມີນມູນຄ່າເສຍຫາຍທັງໝົດເບື້ອງຕົ້ນ 108,18 ລ້ານກີບ, ໃນນັ້ນ: ບ້ານໜອງໝາກເອກ 4,22 ລ້ານກີບ, ບ້ານພະລາຍ 2,5 ລ້ານກີບ, ບ້ານຜັກຂະ 11,74 ລ້ານກີບ, ບ້ານແກແລ 61,3 ລ້ານກີບ, ບ້ານຄອນທູດ 28,33 ລ້ານກີບ.

   ໂອກາດນີ້, ທ່ານ ວຽງສະໄໝ ສີລິພອນພັນ ກໍ່ໄດ້ໂອ້ລົມການຈັດຕັ້ງ, ອຳນາດການປົກຄອງ ແລະພໍ່ແມ່ປະຊາຊົນໃນ 2 ກຸ່ມ ດັ່ງກ່າວທີ່ຖືກຜົນກະທົບຈາກໄພພິບັດລົມພະຍຸລະດູຮ້ອນພັດໃນເທື້ອນີ້ໃຫ້ມີຄວາມອຸ່ນອ່ຽນທຸ່ນທ່ຽງໃນການດຳລົງຊີວິດຢ່າງມີສະຕິ, ພ້ອມກັນນັ້ນກໍໃຫ້ພ້ອມກັນປົກປັກຮັກສາສິ່ງແວດລ້ອມ, ຮັກສາພື້ນທີ່ປ່າກໍຄື ປ່າສະຫງວນເຊປຽນໃຫ້ມີຄວາມອຸດົມສົມບູນ ແລະການລົງເຄື່ອນໄຫວຄັ້ງນີ້ກໍ່ເພື່ອຕິດຕາມສະຖານະການຢ່າງໃກ້ຊິດ, ທັງເປັນການອົບອຸ່ນໃຫ້ກຳລັງໃຈສະແດງໃຫ້ເຫັນເຖິງຄວາມເປັນຫ່ວງເປັນໄຍຂອງຄະນະພັກ-ອົງການປົກຄອງຕໍ່ກັບຊີວິດການເປັນຢູ່ຂອງປະຊາຊົນ.

ຂ່າວ: ຖວທ ປະທຸມພອນ.

แชร์