2 ຕະຫຼາດໃຫຍ່ ຢູ່ຫຼວງພະບາງມີນະໂຍບາຍລູກຄ້າ

   ແມ່ຄ້າພໍ່ຄ້າຍິ້ມໄດ້ທີ່ເຈົ້າຂອງຕະຫຼາດໃຫຍ່ 2 ແຫ່ງຄືຕະຫຼາດໂພສີ ແລະຕະຫຼາດມະໂນລັກມີນະໂຍບາຍໃຫ້ໃນໄລຍະການແຜ່ລະບາດໂຄວິດ-19 ເພື່ອເປັນການຫຼຸດຜ່ອນລາຍຈ່າຍຂອງຊາວຄ້າຂາຍເພາະວ່າຜູ້ຄົນທີ່ເຂົ້າຊຶ້ເຄື່ອງໃນຕະຫຼາດໃນໄລຍະນີ້ແມ່ນມີຈໍານວນຫຼຸດລົງຫຼາຍຂາຍບໍ່ຄ່ອຍດີ.

   ທ່ານ ປອ ສຸລິໄຊ ຫົງສາຄອນ ຮອງຫົວໜ້າພະແນກອຸດສາຫະກໍາ ແລະການຄ້າແຂວງໄດ້ລາຍງານຕໍ່ນັກຂ່າວພວກເຮົາໃນວັນທີ 6 ພຶດສະພາ 2021 ນີ້ວ່າ: ຫຼັງ ຈາກທີ່ເຈົ້າຂອງຕະຫຼາດໄດ້ຮັບໜັງສືສະເໜີຂອງພະແນກອຸດສາຫະກໍາ ແລະການຄ້າແຂວງໃຫ້ເຈົ້າຂອງຕະຫຼາດແຕ່ລະແຫ່ງນັບແຕ່ຂະໜາດນ້ອຍ, ກາງ ແລະ ຂະ ໜາດໃຫຍ່ໃນທົ່ວແຂວງຫຼວງພະບາງເພື່ອໃຫ້ຄົ້ນຄວ້າຜ່ອນຜັນຫຼຸດຄ່າບໍລິການເກັບຈ່າຍລາຍວັນໃຫ້ແມ່ຄ້າໃນໄລຍະການແຜ່ລະບາດໂຄວິດ-19 ຫຼ້າສຸດເຈົ້າຂອງຕະ ຫຼາດໃຫຍ່ 2 ແຫ່ງ ໃນນະຄອນຫຼວງພະບາງແມ່ນໄດ້ອອກແຈ້ງການໃຫ້ຊາວຄ້າ-ຂາຍ ຜູ້ທີ່ມາໃຊ້ບໍລິການຢູ່ພາຍໃນຕະຫຼາດເລື່ອງການຫຼຸດລາຄາເກັບຈ່າຍປະຈໍາວັນ ແລະເລື່ອນເວລາການຊໍາລະຄ່າເຊົ່າຫ້ອງໃຫ້ແມ່ຄ້າໃນໄລຍະການແຜ່ລະບາດໂຄວິດ-19.

  ສໍາລັບຕະຫຼາດໂພສີ ແມ່ນນັບແຕ່ວັນທີ 8 ພຶດສະພາ 2021 ນີ້ທາງຕະຫຼາດຈະໄດ້ຫຼຸດຄ່າເກັບຈ່າຍປະຈໍາວັນໃຫ້ເຖິງ 50% ປະກອບມີຄ່ານັ່ງຕາດ, ຄ່າຝາກລົດ, ຄ່າຫ້ອງນໍ້າ ແລະຄ່າເຊົ່າຫ້ອງທາງຕະຫຼາດໂພສີໄດ້ເລື່ອນກໍານົດເວລາການຊໍາລະຄ່າເຊົ່າໃຫ້ 1 ເດືອນຕື່ມອີກ, ສ່ວນຕະຫຼາດມະໂນລັກແມ່ນໄດ້ເລີ່ມມີນະໂຍບາຍໃຫ້ແມ່ຄ້ານັບແຕ່ວັນທີ 3 ພຶດສະພາ 2021 ເປັນຕົ້ນມາລູກຄ້າທີ່ມານັ່ງຂາຍພັກ ແລະອາຫານແມ່ນບໍ່ໃຫ້ເສຍຄ່າເກັບຈ່າຍ, ບໍ່ເກັບຄ່າບໍລິການຝາກລົດທຸກປະເພດ, ບໍ່ກັບຄ່າໃຊ້ບໍລິການຫ້ອງນໍ້າ. ດ້ານແມ່ຄ້າພໍ່ຄ້າທີ່ມາໃຊ້ບໍລິການຕະຫຼາດຕ່າງກໍເວົ້າເປັນສຽງດຽວກັນວ່າມີຄວາມດີໃຈຫຼາຍທີ່ທາງຂັ້ນເຖິງໄດ້ເຫັນ ຄວາມສໍາຄັນ, ຄວາມຈໍາເປັນຕໍ່ການຄ້າຂາຍໃນໄລຍະການລະບາດໂຄວິດ-19 ນີ້ ແລະໄດ້ໃຫ້ເຈົ້າຂອງຕະຫຼາດແຕ່ລະແຫ່ງໃນທົ່ວແຂວງຫຼວງພະບາງຫຼຸດຄ່າເກັບຈ່າຍໃຫ້ເປັນພິເສດ ແລະຂອບໃຈເຈົ້າຂອງຕະຫຼາດເຫັນໃຈເນື່ອງຈາກການຂາຍກໍບໍ່ໄດ້, ຄົນຊື້ກະຫຼຸດລົງ.

  ສໍາລັບເຈົ້າຂອງຕະຫຼາດມີການເປີດໃຫ້ບໍລິການແມ່ນຍັງຄຸມເຂັ້ມມາດຕະການປ້ອງກັນການແຜ່ລະບາດໂຄວິດ-19 ຈົນກວ່າຈະມີຄໍາສັ່ງປ່ຽນແປງຈາກຂັ້ນເທິງ.

ຂ່າວ: ສີສຸວັນ

แชร์