ທຫລ ຜ່ອນຜັນນະໂຍບາຍສິນເຊື່ອຕໍ່ຜູ້ຮັບຜົນກະທົບຈາກໂຄວິດຮອບໃໝ່

   ທ່ານ ພຸດທະໄຊ ສີວິໄລ ຮອງຜູ້ວ່າການທະນາຄານແຫ່ງ ສປປ ລາວ (ທຫລ), ຫົວໜ້າໜ່ວຍງານນະໂຍບາຍດ້ານເງິນຕາຂອງຄະນະສະເພາະກິດ COVID-19 ໄດ້ຖະແຫຼງຂ່າວກ່ຽວກັບບັນດານະໂຍບາຍຂອງຂະແໜງທະນາຄານເພື່ອແກ້ໄຂຜົນກະທົບຈາກສະພາບການລະບາດຂອງພະຍາດດັ່ງກ່າວໃນວັນທີ 8 ພຶດສະພາ 2021 ທີ່ນະຄອນຫຼວງວຽງຈັນ ໂດຍຢືນຢັນວ່າ: ຈະສືບຕໍ່ບັນດານະໂຍບາຍດ້ານເງິນຕາດັ່ງທີ່ໄດ້ປະຕິບັດຜ່ານມາເພື່ອແກ້ໄຂຜົນກະທົບຈາກການລະບາດຂອງພະຍາດ COVID-19.

   ທ່ານຮອງຜູ້ວ່າການ ທຫລ ໄດ້ກ່າວວ່າ: ນັບແຕ່ການລະບາດຂອງພະຍາດ COVID-19 ໃນຕົ້ນປີ 2020, ທຫລ ໄດ້ປະຕິບັດບັນດານະໂຍບາຍຈຳນວນໜຶ່ງເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດດັ່ງກ່າວໄດ້ແກ່ການປັບຫຼຸດອັດຕາດອກເບ້ຍພື້ນຖານຂອງ ທຫລ ແລະອັດຕາສ່ວນເງິນແຮຝາກບັງຄັບຂອງທະນາ ຄານທຸລະກິດ; ປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດໂຄວິດຕາມຂໍ້ຕົກລົງ ສະບັບເລກທີ 238/ທຫລ, ລົງວັນທີ 26 ມີນາ 2020; ດຳເນີນໂຄງການສິນເຊື່ອເພື່ອຊຸກຍູ້ການຜະລິດ ແລະແກ້ໄຂຜົນກະທົບຈາກການລະບາດດັ່ງກ່າວ ສະບັບ ເລກທີ 318/ທຫລ, ລົງວັນທີ 19 ພຶດ ສະພາ 2020; ຊຸກຍູ້ ແລະຕິດຕາມການສະໜອງແຫຼ່ງທຶນຂອງກອງທຶນສົ່ງເສີມວິສາຫະກິດຂະໜາດນ້ອຍ ແລະກາງຮ່ວມກັບກະຊວງອຸດສະຫະກຳ ແລະການຄ້າໂດຍສຸມໃສ່ສະໜອງແຫຼ່ງທຶນໃຫ້ຫົວໜ່ວຍວິສາຫະກິດຂະໜາດນ້ອຍ ແລະກາງໃນຂົງເຂດທີ່ຮັບຜົນກະທົບຈາກການລະບາດຂອງ COVID-19.

   ຜ່ານການຈັດຕັ້ງປະຕິບັດນະໂຍບາຍຜ່ອນຜັນດ້ານສິນເຊື່ອໃນໄລຍະຜ່ານມາຮອດເດືອນມີນາ 2021 ເຫັນວ່າ: ທະນາຄານທຸລະກິດໄດ້ມີການປະຕິບັດນະໂຍບາຍສິນເຊື່ອໃຫ້ແກ່ລູກຄ້າທັງໝົດ 4.846 ລາຍລວມມູນຄ່າ 9.565,24 ຕື້ກີບ, ສຳລັບເບື້ອງສະຖາບັນການເງິນທີ່ບໍ່ແມ່ນທະນາຄານໄດ້ມີການປະຕິບັດນະໂຍບາຍສິນເຊື່ອໃຫ້ແກ່ລູກຄ້າທັງໝົດ 454.163 ລາຍລວມມູນຄ່າ 263,63 ຕື້ກີບ, ນະໂຍບາຍສິນເຊື່ອທີ່ທະນາຄານ ແລະສະຖາບັນການເງິນປະຕິບັດສ່ວນໃຫຍ່ແມ່ນນະໂຍ ບາຍການປັບຫຼຸດອັດຕາດອກເບ້ຍ, ຮອງລົງມາແມ່ນນະໂຍບາຍເລື່ອນຊຳລະໜີ້ທັງຕົ້ນທຶນ ແລະ ດອກເບ້ຍ, ປະຕິບັດນະໂຍບາຍປ່ອຍກູ້ໃໝ່ເພື່ອຟື້ນຟູການຜະລິດ ຫຼື ທຸລະກິດ, ນະໂຍບາຍປັບຫຼຸດຄ່າທໍານຽມ ແລະນະໂຍບາຍອື່ນໆ, ການສະໜອງສິນເຊື່ອໃໝ່ໃຫ້ແກ່ລູກຄ້າ ທີ່ໄດ້ຮັບຜົນກະທົບພາຍໃຕ້ໂຄງການສິນເຊື່ອຊຸກຍູ້ການຜະລິດ ແລະແກ້ໄຂຜົນກະທົບຈາກພະຍາດ COVID-19 ຕາມຂໍ້ຕົກລົງເລກທີ 318/ທຫລ ແມ່ນໄດ້ມີການສະໜອງເງິນກູ້ໃຫ້ແກ່ລູກຄ້າທີ່ໄດ້ຮັບຜົນກະທົບຜ່ານທະນາ ຄານທຸລະກິດທີ່ເຂົ້າຮ່ວມໂຄງການທັງໝົດ 1.652,57 ຕື້ກີບ ຈໍານວນລູກຄ້າ 477 ລາຍ ແລະຖອນນໍາໃຊ້ແລ້ວ 1.369,44 ຕື້ກີບ, ສໍາລັບການສະໜອງສິນເຊື່ອໃຫ້ແກ່ ວນກ ໂດຍກອງທຶນສົ່ງເສີມວິສາຫະກິດຂະໜາດນ້ອຍ ແລະກາງໄດ້ປ່ອຍກູ້ແລ້ວປະມານ 165,06 ຕື້ກີບ (ມີຈໍານວນ 116 ຫົວໜ່ວຍ ວນກ, ມີ 143 ສັນຍາເງິນກູ້ມາຈາກ 14 ແຂວງ).

  ຕໍ່ກັບສະພາບການລະບາດຂອງພະຍາດ COVID-19 ໃນປະຈຸບັນ, ທຫລ ຈະສືບຕໍ່ປະຕິບັດນະໂຍບາຍ ແລະມາດຕະການທີ່ ທຫລ ໄດ້ປະຕິບັດຜ່ານມາຂ້າງເທິງນັ້ນໃນການແກ້ໄຂຜົນກະທົບຈາກການລະບາດຂອງພະຍາດ COVID-19 ໂດຍສືບຕໍ່ປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກ COVID-19 ຕາມຂໍ້ຕົກລົງສະບັບເລກທີ 238/ທຫລ. ລົງວັນທີ 26 ມີນາ 2020 ໂດຍການອອກແຈ້ງການເພີ່ມຕື່ມໃຫ້ທະນາຄານທຸລະກິດ ແລະສະຖາບັນການເງິນເພີ່ມທະວີການປະຕິບັດນະໂຍບາຍສິນເຊື່ອແກ້ໄຂຜົນກະທົບຕາມຂໍ້ຕົກລົງດັ່ງກ່າວໃຫ້ວ່ອງໄວ, ທັນສະພາບການ ແລະທົ່ວເຖິງຕາມສະພາບເງື່ອນໄຂຂອງລູກຄ້າທີ່ໄດ້ຮັບຜົນກະທົບຕົວຈິງ; ສືບຕໍ່ດຳເນີນໂຄງການສິນເຊື່ອເພື່ອສະໜອງເງິນກູ້ໃໝ່ໃຫ້ແກ່ບຸກຄົນ, ຈຸນລະວິສາຫະກິດ ແລະ ວນກ ທີ່ໄດ້ຮັບຜົນກະທົບຜ່ານທະນາຄານທຸລະກິດທີ່ເຂົ້າຮ່ວມໂຄງການຈຳນວນ 16 ທະນາຄານ ໄດ້ແກ່ທະນາຄານການຄ້າຕ່າງປະເທດລາວມະຫາຊົນ, ທະນາຄານຮ່ວມທຸລະກິດລາວຫວຽດ, ທະນາຄານລາວຈີນ ຈຳກັດ, ທະນາຄານຮ່ວມພັດທະນາ, ທະນາຄານມາຣູຮານເຈແປນລາວ ຈຳກັດ, ທະນາຄານບີໄອຊີລາວ ຈຳກັດ, ທະນາຄານ ເອັສທີ ຈຳກັດ, ທະນາຄານພັດທະນາລາວ, ທະນາຄານອາເຮັສບີລາວ ຈຳກັດ, ທະນາຄານໄຊງ່ອນເທືອງຕິ່ນ ຈຳກັດ, ທະນາຄານຫວຽດຕິນລາວ ຈຳກັດ, ທະນາຄານແຄນາເດຍລາວ ຈຳກັດ, ທະນາຄານການຄ້າຕ່າງປະເທດ ຫວຽດນາມ ປະຈຳລາວ ຈຳກັດ, ທະນາ ຄານອຸດສາຫະກຳ ແລະການຄ້າຈີນ ຈຳ ກັດ ສາຂານະຄອນຫຼວງ, ທະນາຄານ ກະສິກອນໄທ ຈຳກັດ ແລະທະນາຄານສົ່ງເສີມກະສິກຳ; ຈັດຕັ້ງປະຕິບັດໂຄງການສິນເຊື່ອເພື່ອກະຕຸ້ນເສດຖະກິດຂອງ ສປປ ລາວ ໄດ້ແກ່ນະໂຍບາຍສິນເຊື່ອສົ່ງເສີມການຜະລິດໄຟຟ້າເພື່ອການສົ່ງ ອອກ, ສິນເຊື່ອເພື່ອສົ່ງເສີມການຜະລິດສິນຄ້າທົດແທນການນຳເຂົ້າ ແລະສິນເຊື່ອເພື່ອຊຸກຍູ້ການຜະລິດກະສິກຳເປັນສິນຄ້າສົ່ງອອກ.

  ທ່ານຮອງຜູ້ວ່າການ ທຫລ ໄດ້ແຈ້ງວ່າ: ສໍາລັບລູກຄ້າທີ່ມີເງື່ອນໄຂໄດ້ຮັບນະໂຍບາຍສິນເຊື່ອດັ່ງກ່າວແມ່ນໝາຍເຖິງບຸກຄົນ ຫຼືນິຕິບຸກຄົນທີ່ເປັນເຈົ້າຂອງ ຫຼືດໍາເນີນກິດຈະການທີ່ຕ້ອງຢຸດເຊົາກິດຈະການທັງໝົດ ຫຼືສ່ວນໃດສ່ວນໜຶ່ງເນື່ອງຈາກການປະຕິບັດມາດຕະການປ້ອງກັນຄວບຄຸມການແຜ່ລະບາດຂອງພະຍາດ COVID-19; ຜູ້ປະກອບອາຊີບອິດສະຫຼະທີ່ບໍ່ສາມາດປະກອບອາຊີບຂອງຕົນໄດ້ຕາມປົກກະຕິລວມທັງຜູ້ທີ່ໄດ້ຮັບຜົນກະທົບທາງອ້ອມ, ກ່ຽວກັບຂັ້ນຕອນໃນການຂໍຮັບນະໂຍບາຍຜ່ອນຜັນລູກຄ້າຕ້ອງ 1) ຂຽນໜັງສືສະເໜີເຖິງທະນາຄານ ຫຼືສະຖາບັນການເງິນທີ່ເປັນເຈົ້າໜີ້ຂອງຕົນເພື່ອຂໍນະໂຍບາຍ; 2) ປະກອບເອກະສານຢັ້ງຢືນຜົນກະທົບທີ່ຕົນໄດ້ຮັບໂດຍຢັ້ງຢືນຈາກອົງການຈັດຕັ້ງທີ່ກ່ຽວຂ້ອງສໍາລັບວິສາຫະກິດ ຫຼືອໍານາດການປົກຄອງບ້ານສໍາລັບບຸກຄົນທີ່ປະກອບອາຊີບອິດສະຫຼະ; 3) ປະກອບເອກະສານອື່ນໆທີ່ກ່ຽວຂ້ອງ; ສຳລັບທະນາຄານ ແລະສະຖາບັນການເງິນທີ່ໄດ້ຮັບການສະເໜີຈາກລູກຄ້າຂອງຕົນຈະດໍາເນີນການສໍາຫຼວດ, ເກັບກໍາຂໍ້ມູນໃຫ້ລະອຽດແລ້ວປະເມີນຜົນກະທົບຕາມກໍລະນີໜັກ-ເບົາແລ້ວປະຕິບັດນະໂຍບາຍຜ່ອນຜັນສິນເຊື່ອຕາມຄວາມເໝາະສົມ.

  ພ້ອມດຽວກັນນີ້, ທ່ານຮອງຜູ້ວ່າການ ທຫລ, ຍັງຮຽກຮ້ອງໃຫ້ບັນດາທະນາຄານທຸລະກິດ ແລະສະຖາບັນການເງິນທີ່ບໍ່ແມ່ນທະນາຄານພ້ອມກັນເປັນເຈົ້າການເຊື່ອມຊືມເຂົ້າໃຈນະໂຍບາຍສິນເຊື່ອດັ່ງກ່າວ ແລະເປັນເຈົ້າການປະຕິບັດນະໂຍບາຍດັ່ງກ່າວຢ່າງວ່ອງໄວ, ທັນສະພາບການ ແລະທົ່ວເຖິງຕາມສະພາບເງື່ອນໄຂຂອງລູກຄ້າທີ່ໄດ້ຮັບຜົນກະທົບຕົວຈິງ ແລະຮຽກຮ້ອງໃຫ້ລູກຄ້າສິນເຊື່ອທີ່ໄດ້ຮັບຜົນກະທົບມີຄວາມເຂົ້າໃຈແຈ້ງຕໍ່ນະໂຍບາຍຜ່ອນຜັນດ້ານສິນເຊື່ອດັ່ງກ່າວມີຄວາມຈິງໃຈ ແລະເປັນເຈົ້າ ການປະຕິບັດໃຫ້ຖືກຕ້ອງຕາມເງື່ອນໄຂທີ່ກຳນົດໄວ້, ຫຼີກເວັ້ນການສວຍໃຊ້ນະໂຍບາຍດັ່ງກ່າວເພື່ອເອື້ອອຳນວຍຜົນປະໂຫຍດແກ່ຕົນທີ່ບໍ່ສອດຄ່ອງກັບລະບຽບການວາງອອກລວມທັງການມີຄຳເຫັນປັ່ນປ່ວນສ້າງຄວາມເຂົ້າໃຈຜິດໃຫ້ແກ່ສັງຄົມ, ລູກຄ້າສິນເຊື່ອຂອງທະນາຄານທຸລະກິດ ແລະສະຖາບັນການເງິນທີ່ບໍ່ແມ່ນທະນາຄານທີ່ໄດ້ຮັບຜົນກະທົບຈາກການ ແຜ່ລະບາດຂອງພະຍາດດັ່ງກ່າວ ແລະຜູ້ທີ່ໄດ້ຮັບຜົນກະທົບທີ່ສົນໃຈຂໍສິນເຊື່ອເພີ່ມພາຍໃຕ້ໂຄງການສິນເຊື່ອຕາມຂໍ້ຕົກລົງ 318/ທຫລ ກໍ່ໃຫ້ປະສານກັບບັນດາທະນາຄານທຸລະກິດທີ່ເຂົ້າຮ່ວມໂຄງການ 16 ທະນາຄານຂ້າງເທິງນີ້, ສຳລັບຜູ້ທີ່ມີຄວາມສົນໃຈຕິດພັນກັບການປະຕິບັດນະໂຍບາຍຜ່ອນຜັນດ້ານສິນເຊື່ອຕາມຂໍ້ຕົກລົງ 238/ທຫລ ສາມາດປະສານກົມຄຸ້ມຄອງທະນາຄານທຸລະກິດ (ເບີ ໂທ: 021 219825) ແລະກົມຄຸ້ມຄອງສະຖາບັນການເງິນ (ເບີໂທ: 021 265715 ຫຼື 021 265712).

ຂ່າວ: ຣັດສະໝີ ດວງສັດຈະ

แชร์