ລັດຖະມົນຕີ 2 ກະຊວງປ້ອງກັນປະເທດລາວ-ຫວຽດນາມ ປະຊຸມພົບປະທາງໄກ

   ກອງປະຊຸມພົບປະທາງໄກລະຫວ່າງລັດຖະມົນຕີກະຊວງປ້ອງກັນປະເທດລາວ-ຫວຽດນາມ ໄດ້ຈັດຂຶ້ນໃນວັນທີ 6 ພຶດສະພາ 2021 ຝ່າຍລາວນໍາໂດຍທ່ານ ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ຝ່າຍຫວຽດນາມນໍາໂດຍ ທ່ານ ພົນໂທ ຟານວັນຢາງ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ, ຊຶ່ງມີບັນດາສະຫາຍຄະນະນຳກະຊວງ, ຄະນະນໍາກົມໃຫຍ່, ຫ້ອງວ່າການກະຊວງ, ພະນັກງານວິຊາການທັງສອງຝ່າຍເຂົ້າຮ່ວມ.

   ໃນວາລະດໍາເນີນກອງປະຊຸມທັງສອງຝ່າຍໄດ້ພ້ອມກັນສະຫຼຸບຕີລາຄາຄືນໝາກຜົນຂອງການຈັດຕັ້ງປະຕິບັດແຜນການພົວພັນຮ່ວມມືວຽກງານຮອບດ້ານຂອງສອງກະຊວງປ້ອງກັນປະເທດໃນໄລຍະທີ່ຜ່ານມາ ແລະວາງແຜນການຮ່ວມມືໃນຕໍ່ໜ້າ,ພ້ອມກັນສືບຕໍ່ຈັດຕັ້ງຜັນຂະຫຍາຍບັນດາອະນຸສັນຍາການຮ່ວມມືຮອບດ້ານລະຫວ່າງສອງຊາດ, ສອງກອງທັບລາວ-ຫວຽດນາມ ໃຫ້ປາກົດຜົນເປັນຈິງ, ນອກຈາກນີ້ສອງລັດຖະມົນຕີຍັງໄດ້ສົນທະນາໂອ້ລົມແລກປ່ຽນບົດຮຽນການປ້ອງກັນຕ້ານສະກັດກັ້ນ ການແຜ່ລະບາດຂອງພະຍາດຂອງໂຄວິດ-19.

   ໂອກາດດຽວກັນນີ້, ທ່ານຮອງນາຍົກລັດຖະມົນຕີ ແຫ່ງ ສປປ ລາວ ກໍໄດ້ຕາງໜ້າໃຫ້ລັດຖະບານກໍຄືປະຊາຊົນບັນດາເຜົ່າສະແດງຄວາມຂອບໃຈ ແລະ ຮູ້ບຸນຄຸນອັນເລິກເຊິ່ງຢ່າງຈິງໃຈຕໍ່ພັກລັດຖະບານຫວຽດນາມກໍຄືປະຊາຊົນຫວຽດນາມທີ່ໃຫ້ການຊ່ວຍເຫຼືອໃນຫຼາຍດ້ານ,ໂດຍສະເພາະວຽກງານການຊ່ວຍເຫຼືອດ້ານທຶນຮອນ,ວັດຖຸອຸປະກອນການແພດ, ລວມເຖິງຊ່ຽວຊານການແພດແກ່ ສປປ ລາວ.

  ການພົບປະໃນຄັ້ງນີ້,ເປັນການພົບປະທາງໄກແບບໝົດຈິດໝົດໃຈຖານສະຫາຍອ້າຍນ້ອງຮ່ວມອຸດົມການດຽວກັນ, ຊຶ່ງມັນສະແດງໃຫ້ເຫັນເຖິງຄວາມໄວ້ເນື້ອ ເຊື່ອໃຈຂອງທັງສອງຊາດ, ສອງກອງທັບທີ່ຍາມໃດກໍມີການຖະນຸຖະໜອມ ແລະເຊີດຊູເສີມຂະຫຍາຍມູນເຊື້ອແຫ່ງຄວາມສາມັກຄີພິເສດລະຫວ່າງສອງຊາດ, ສອງກອງທັບ ແລະປະຊາຊົນສອງຊາດລາວ-ຫວຽດນາມ ທີ່ແໜ້ນແຟ້ນ ແລະຈະເລີນງອກງາມຂຶ້ນເລື້ອຍໆນັ້ນໄດ້ສືບຕໍ່ຂະຫຍາຍຕົວຍິ່ງໆຂຶ້ນ.

ຂ່າວ: ໜັງສືພິມກອງທັບ

• 10/05/2021