ເຊກອງ ກວດ 64 ຕົວຢ່າງບໍ່ພົບໂຄວິດ

   ທ່ານ ດຣ ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງເຊກອງ, ຮອງປະທານຄະນະສະເພາະກິດຂັ້ນແຂວງໄດ້ຖະແຫຼງຂ່າວກ່ຽວກັບການຕິດຕາມເຝົ້າລະວັງການແຜ່ລະບາດຂອງພະຍາດໂຄວິດ-19 ໃນວັນທີ 5 ພຶດສະພາ 2021 ວ່າ: ສະພາບການລະບາດຂອງເຊື້ອພະຍາດ COVID-19 ຢູ່ ສປປ ລາວ ມາຮອດວັນທີ 5 ພຶດສະພາ 2021 ມີຜູ້ຕິດເຊື້ອສະສົມທັງໝົດ 1.072 ຄົນ (ໃໝ່ 46 ຄົນ), ບໍ່ມີຜູ້ເສຍຊີວິດ, ໃນຈໍານວນຜູ້ຕິດເຊື້ອທັງໝົດແມ່ນໄດ້ຮັບການປິ່ນປົວຫາຍດີແລ້ວ 99 ຄົນ ແລະຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກໍານົດໄວ້ໃນແຕ່ລະແຂວງຈໍານວນ 973 ຄົນ.

  ສະເພາະແຂວງເຊກອງມີກໍລະນີຕິດເຊື້ອສະສົມ 1 ກໍລະນີ (ໃໝ່ບໍ່ມີ) ເປັນຄົນຈີນເຮັດວຽກຢູ່ບໍລິສັດບໍ່ແຮກະອວງເຂດ 5 ເມືອງກະລຶມ, ປະຈຸບັນແມ່ນນອນປິ່ນປົວຢູ່ແຂວງຈໍາປາສັກ ເຊິ່ງນັບແຕ່ວັນທີ 26 ເມສາ-5 ພຶດສະພາ 2021 ທົ່ວແຂວງມີກໍລະນີສົງໃສ ແລະ ໄດ້ເກັບຕົວຢ່າງສົ່ງໄປກວດຢູ່ສູນວິເຄາະໂຮງໝໍແຂວງຈໍາສັກທັງໝົດຈໍາ ນວນ 251 ຕົວຢ່າງ, ໃນນີ້ໄດ້ຮັບຜົນກວດວິເຄາະແລ້ວຈໍານວນ 64 ຕົວຢ່າງ (ບໍ່ພົບເຊື້ອ) ແລະຍັງເຫຼືອ 187 ຕົວຢ່າງ (ແມ່ນລໍຖ້າຜົນກວດ).

   ແນວໃດກໍດີເຖິງວ່າແຂວງເຊກອງບໍ່ມີກໍຕິດເຊື້ອເພີ່ມແຕ່ຄະນະພັກ ແລະຄະນະສະເພາະກິດຂັ້ນແຂວງກໍໄດ້ເອົາໃຈໃສ່ປະຕິບັດມາດຕະການປ້ອງກັນ ແລະກຽມຄວາມພ້ອມຮອບດ້ານເພື່ອຮັບມືຕອບ ແລະໂຕ້ການລະບາດຂອງພະຍາດໂຄວິດ-19 ເປັນຕົ້ນແມ່ນຕັ້ງຈຸດກວດຕິດຕາມຄົນເຂົ້າ-ອອກແຂວງລວມມີ 5 ຈຸດ, ກະກຽມສູນຈໍາກັດບໍລິເວນ 7 ສູນ,ກຽມຫ້ອງປະຕິບັດການສຸກເສີນສໍາລັບຜູ້ທີ່ສົງໃສມີອາການເຂົ້າກັບນິຍາມ COVID-19 ຢູ່ໂຮງໝໍແຂວງຈໍານວນ 15 ຫ້ອງ;ພ້ອມນັ້ນກໍໄດ້ມີການກະກຽມບຸກຄະລາກອນ, ອຸປະກອນການແພດ, ການກະກຽມສະຖານທີ່ປິ່ນປົວ (ຖ້າມີກໍລະນີຕິດເຊື້ອ) ແລະອື່ນໆ.

  ໂອກາດນີ້, ທ່ານ ດຣ. ຄໍາໄຫຼ ສັນຕິພູມ ກໍໄດ້ຮຽກຮ້ອງໃຫ້ທຸກພາກສ່ວນທົ່ວແຂວງເອົາໃສ່ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ, ຖ້າຫາກມີຄວາມຈໍາເປັນເດີນທາງໃຫ້ໃສ່ຜ້າປິດປາກ-ປິດດັງ,ລາງມືດ້ວຍເຫຼົ້າ 70 ອົງສາ ຫຼືເຈວລ້າງມື,ບໍ່ຄວນເດີນທາງໄປສະຖານທີ່ທີ່ມີການລະບາດ ແລະມີຄົນແອອັດ; ພ້ອມນີ້ທ່ານຍັງໄດ້ເຊີນຊວນປະຊາຊົນບັນດາເຜົ່າຜູ້ທີ່ມີອາຍຸ 18 ປີຂຶ້ນ ໃຫ້ໄປຮັບການສັກວັກຊິນປ້ອງກັນພະຍາດໂຄວິດ-19 ຕາມສະຖານທີ່ສາທາລະນະສຸກກໍານົດໄວ້.

(ຂ່າວ-ພາບ : ສັນຍາ)

แชร์