ກຸ່ມບໍລິສັດ ພູສີ ຊ່ວຍຫຼວງພະບາງຕ້ານໂຄວິດ

   ວັນທີ 5 ພຶດສະພາ 2021 ນີ້ທີ່ສູນປະຕິບັດງານຄະນະສະເພາະກິດຄວບຄຸມໂຄວິດ-19 ພະແນກສາທາລະນະສຸກ ແຂວງຫຼວງພະບາງ ກຸ່ມບໍລິສັດ ພູສີ ໄດ້ນໍາເອົາເຄື່ອງອຸປະກອນ, ເຄື່ອງດື່ມ, ອາຫານແຫ້ງ ແລະເງິນສົດເພື່ອສົມທົບວຽກງານຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ ແຂວງຫຼວງພະບາງລວມມູນຄ່າທັງໝົດ 50 ລ້ານກີບ.

   ສໍາລັບເຄື່ອງຊ່ວຍເຫຼືອທີ່ນໍາມາມອບໃນຄັ້ງນີ້ປະກອບມີ: ຜ້າອັດປາກຈໍານວນ 12.500 ອັນ, ເຄື່ອງວັດແທກອຸນຫະພູມ 3 ເຄື່ອງ, ໝີ່ 60 ແກັດ, ນໍ້າດື່ມ 50 ແກັດ ແລະ ເງິນສົດ 30 ລ້ານ, ລວມມູນຄ່າທັງໝົດ 50 ລ້ານກີບ ມອບໃຫ້ຄະນະສະເພາະກິດຄວບຄຸມໂຄວິດ-19 ຂັ້ນແຂວງຕາງໜ້າມອບຂອງ ທ່ານ ສີທອງ ພົມມະຈິດ ປະທານກຸ່ມບໍລິສັດພູສີກ່າວຮັບຂອງທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ,ຫົວໜ້າຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ມີຫົວໜ້າພະແນກສາທາລະນະສຸກແຂວງພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

  ໂອກາດນີ້ທ່ານຮອງເຈົ້າແຂວງຍັງໄດ້ກ່າວສະແດງຄວາມຂອບໃຈທີ່ທາງບໍລິສັດໄດ້ປະກອບສ່ວນໃນຄັ້ງນີ້ກໍຄືຫຼາຍໆພາກສ່ວນທີ່ໄດ້ເຂົ້າມາປະກອບສ່ວນຊຶ່ງອຸປະກອນດັ່ງກ່າວແມ່ນຈະໄດ້ນຳໄປແຈກຢາຍໃຫ້ຜູ້ທີ່ເຮັດວຽກສະເພາະກິດຢູ່ພາກສະໜາມຕາມຈຸດຕ່າງໆພາຍໃນແຂວງຫຼວງພະບາງ, ເມືອງ ແລະນະຄອນໃຫ້ທົ່ວເຖິງເພື່ອໃຫ້ການປະຕິບັດງານໃນການຕ້ານໂຄວິດ-19 ຮອບສອງນີ້ໄດ້ຜ່ານພົ້ນໄປໂດຍໄວ.

ຂ່າວ: ສີສຸວັນ

แชร์