ຫຼາຍພາກສ່ວນຊ່ວຍເມືອງບາຈຽງຕ້ານໂຄວິດ

   ຫລາຍພາກສ່ວນຍັງສຶບຕໍ່ໃຫ້ການຊ່ວຍເຫລືອທັງເງິນສົດ ແລະເຄື່ອງບໍລິໂພກ ແລະອຸປະໂພກໃຫ້ແກ່ອໍານາດການປົກຄອງເມືອງບາຈຽງຈະເລີນສຸກ ແຂວງຈຳປາສັກເຂົ້າໃນການຄວບຄຸມ, ຕ້ານ ແລະສະກັດກັ້ນການແຜ່ເຊື້ອພະຍາດໂຄວິດ-19.

   ເພື່ອເປັນການປະກອບສ່ວນທາງດ້ານວັກຖຸ ແລະຈິດໃຈໃນການສະກັດກັ້ນ, ກັນການລະບາດ, ຄວບຄຸມ ແລະຕ້ານພະຍາດໂຄວິດ-19 ພາຍໃນເມືອງບາຈຽງຈະເລີນສຸກ ແຂວງຈໍາປາສັກ, ດັ່ງນັ້ນໃນວັນທີ 6 ພຶດສະພາຜ່ານມານີ້ຫຼາຍພາກສ່ວນຍັງສືບຕໍ່ມອບເຄື່ອງຊ່ວຍເຫຼືອແກ່ເມືອງໃນນັ້ນປະກອບມີຄື: ສະຫະກອນຜູ້ຜະລິດກາເຟພູພຽງບໍລະເວນມອບເງິນສົດຈໍານວນ 10 ລ້ານກີບ, ສະພາປະຊາຊົນແຂວງຈໍາປາສັກ ມອບນໍ້າດື່ມ 40 ແກັດ, ຜ້າອັດປາກ-ດັງ ຈໍານວນ 100 ກັບ, ເຈວລ້າງມື 96 ກວດລວມມູນຄ່າ 4 ລ້ານກີບ, ບໍລິສັດ ຢາງກາວຊູຫວຽດນາມ-ລາວ ມອບໝໍ້ຫຸງເຂົ້າ 2 ໜ່ວຍ ມີມູນຄ່າ 1 ລ້ານກີບ.

   ໃນພິທີທ່ານ ສົມລິດ ປັນທະບົວສີ ເຈົ້າເມືອງໆບາຈຽງຈະເລີນສຸດໄດ້ກ່າວຄວາມຂອງໃຈຕໍ່ພາກສ່ວນທີ່ໃຫ້ການຊ່ວຍເຫຼືອ ແລະ ພ້ອມຢໍ້າວ່າຈະນໍາເງິນ, ເຄື່ອງບໍລິໂພກ ແລະອຸປະໂພກດັ່ງກ່າວນໍ້າໃຊ້ເຂົ້າໃນວຽກການຄວບຄຸມ, ຕ້ານ ແລະສະກັດກັ້ນພະຍາດດັ່ງກ່າວໃຫ້ເກີດມີປະໂຫບດສູງສຸດ.

ໂດຍ: ໂພທິລາດ

แชร์