ເຈົ້າແຂວງຄຳມ່ວນ ຕິດຕາມສູນປິ່ນປົວຜູ້ຕິດໂຄວິດ

   ວັນທີ 4 ພຶດສະພາ 2021 ທ່ານ ວັນໄຊ ພອງສະຫວັນ ເຈົ້າແຂວງໆ ຄໍາມ່ວນ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມແພດໝໍທີ່ກັກກັນຕົວຢູ່ຕຶກພຣະສົງພາຍຫຼັງສໍາເລັດຈາກການປິ່ນປົວຜູ້ຕິດເຊື້ອພະຍາດໂຄວິດ-19 ຮ່ວມຕ້ອນຮັບໃນຄັ້ງນີ້ມີ ທ່ານ ດຣ. ແກ່ນຈັນ ທອງສະຫວັດ ຫົວໜ້າພະແນກສາທາລະນະສຸກແຂວງພ້ອມຄະນະ.

  ການລົງໄປເຄື່ອນໄຫວຕິດຕາມສູນກັກກັນຜູ້ປິ່ນປົວພະຍາດໂຄວິດ- 19 ໃນຄັ້ງນີ້ແມ່ນໄດ້ຮັບຟັງການລາຍງານໂດຍຫຍໍ້ຈາກຄະນະກອງເລຂາປ້ອງກັນ, ຄວບຄຸມ ແລະຕ້ານການແຜ່ລະບາດຂອງພະຍາດໂຄວິດ-19 ວ່າ: ສໍາລັບແຂວງຄໍາມ່ວນມາຮອດປະຈຸບັນນີ້ກ່ຽວກັບມາດຕະການຄວບຄຸມ ແລະປ້ອງກັນພະຍາດໂຄວິດ-19 ແມ່ນໄດ້ມີຫຼາຍມາດຕະການໂດຍສະເພາະແມ່ນທາງໂຮງໝໍແຂວງຂອງພວກເຮົາເວລາມີຄົນເຈັບເຂົ້າ-ອອກກໍ່ຕ້ອງມີໜ່ວຍງານກັ້ນກອງຊຶ່ງໜ່ວຍງານນີ້ແມ່ນມີໜ້າທີ່ໃນການກວດ ແລະວັດແທກອຸນຫະພູມຂອງຜູ້ທີ່ເຂົ້າມາໃຊ້ບໍລິການຖ້າຫາກພົບເຊື້ອແມ່ນຈະໄດ້ສົ່ງເຂົ້າສູນທັນທີ.

   ໃນໄລຍະຜ່ານມານັບແຕ່ວັນທີ 1 ມັງກອນ ຈົນຮອດວັນທີ 30 ເມສາ 2021 ມີຈໍານວນຄົນເຂົ້າຮັກສາຕົວຢູ່ໃນສູນທັງໝົດ 1.339 ຄົນ ໂດຍໄດ້ກວດຫາເຊື້ອພະຍາດໂຄວິດ-19 ໝົດທຸກຄົນແຕ່ໄດ້ກວດພົບເຊື້ອພຽງແຕ່ 1 ກໍລະນີ ຊຶ່ງໄດ້ກວດພົບໃນວັນທີ 17 ເມສາ 2021 ໂດຍໄດ້ຖືກປິ່ນປົວນັບແຕ່ເວລານັ້ນເປັນຕົ້ນມາຕາມຫຼັກການຂອງອົງການອະນາໄມໂລກມາຮອດປະຈຸບັນອາການຂອງກໍລະນີທີ 50 ແມ່ນດີຂຶ້ນ.

   ທ່ານເຈົ້າແຂວງໆຄໍາມ່ວນກໍ່ໄດ້ຝາກຄວາມຢ້ຽມຢາມຖາມຂ່າວເຖິງພະນັກງານແພດໝໍຜ່ານທາງການນໍາຂອງພະແນກສາທາລະນະສຸກ ແລະໂຮງໝໍແຂວງພ້ອມທັງສະແດງຄວາມຍ້ອງຍໍຊົມເຊີຍ ແລະຂອບໃຈພະນັກງານແພດໝໍໝົດທຸກຄົນທີ່ໄດ້ທຸ່ມເທສະຕິປັນຍາ, ເຫື່ອແຮງ ແລະມີຄວາມຮັບຜິດຊອບສູງຕໍ່ພາລະກິດລວມຂອງຊາດກໍ່ຄືວຽກງານປ້ອງກັນ, ຄວບຄຸມ ແລະຕ້ານການແຜ່ລະບາດຂອງພະຍາດໂຄວິດ-19 ບໍ່ໃຫ້ແຜ່ຂະຫຍາຍວົງກວ້າງອອກໄປສູ່ເຂດອື່ນຊຶ່ງຈະສົ່ງຜົນເສຍຫາຍໜັກໜ່ວງເສດຖະກິດ-ສັງຄົມຂອງແຂວງ.

   ໃນໂກອາດມາເຄື່ອນໄຫວຕິດຕາມສູນກັກກັນປິ່ນປົວຜູ້ຕິດເຊື້ອພະຍາດໂຄວິດ-19 ທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນພ້ອມດ້ວຍຄະນະກໍ່ໄດ້ມອບເງິນຈໍານວນ 20 ລ້ານກີບ ໃຫ້ແກ່ໂຮງໝໍແຂວງຄໍາມ່ວນຊຶ່ງຮັບໂດຍທ່ານ ດຣ. ແກ້ວອຸດົມ ລອດທໍາມະວົງ ຜູ້ອໍານວນການໂຮງໝໍແຂວງຄໍາມ່ວນ.

ນອກຈາກນັ້ນຍັງມີທ່ານ ນາງ ຫງຽນ ທິ ເລສຸກ ປະທານບໍລິສັດເລສຸກການຄ້າ ແລະຂົນສົ່ງຈໍາກັດໄດ້ມອບເງິນປະກອບສ່ວນ ຈໍານວນ 5 ລ້ານກີບ ໃຫ້ແກ່ໂຮງໝໍແຂວງຄໍາມ່ວນເພື່ອນໍາໃຊ້ເຂົ້າໃນວຽກງານປ້ອງກັນ, ຄວບຄຸມ ແລະຕ້ານການແຜ່ລະບາດຂອງພະຍາດໂຄວິດ-19 ຕື່ມອີກ.

แชร์