ເຈົ້າໜ້າທີ່ເດັດຂາດຈະບໍ່ລະເວັ້ນທຸກຄົນຕົ້ນເຫດແຜ່ໂຄວິດໃນລາວ

   ວັນທີ 5 ພຶດສະພາ 2021, ໃນການຖະແຫຼງຂ່າວກ່ຽວກັບສະພາບການລະບາດຂອງໂຄວິດ-19 ຢູ່ ສປປ ລາວ ຂອງຄະນະສະເພາະກິດ, ທ່ານ ພົນຕີ ຄຳກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕຳຫຼວດກະຊວງປ້ອງກັນຄວາມສະຫງົບໄດ້ຖະແຫຼງຂ່າວກ່ຽວກັບຄວາມຄືບໜ້າໃນການສືບສວນ-ສອບສວນບຸກຄົນກຸ່ມຄົນທີ່ເປັນຕົ້ນເຫດຂອງການແຜ່ເຊື້ອໂຄວິດ-19 ໃນ ສປປ ລາວ ຕັ້ງແຕ່ຕົ້ນເດືອນເມສາ 2021 ໂດຍຢໍ້າວ່າຈະບໍ່ມີການລະເວັ້ນເດັດຂາດຜູ້ທີ່ກະທຳຜິດດັ່ງກ່າວບໍ່ວ່າຈະເປັນບຸກຄົນໃດ, ຄົນລາວ ຫຼື ຄົນຕ່າງປະເທດກໍຕາມ. ທ່ານ ພົນຕີ ຄຳກິ່ງ ກ່າວວ່າໃນຕົ້ນເດືອນເມສາ 2021 ໄດ້ມີບຸກຄົນ-ກຸ່ມຄົນ ຈຳນວນໜຶ່ງຊຶ່ງມີທັງຄົນລາວ, ຄົນຕ່າງປະເທດໄດ້ເຄື່ອນໄຫວລະເມີດລະບຽບກົດໝາຍ, ຈຳນວນໜຶ່ງລັກລອບເຂົ້າອອກຕາມຊາຍແດນ ສປປ ລາວ ກັບປະເທດໃກ້ຄຽງຊຶ່ງເປັນພື້ນທີ່ທີ່ມີການແຜ່ລະບາດຂອງພະຍາດໂຄວິດ-19 ຢ່າງຮຸນແຮງ.

   ພ້ອມກັນນີ້ກໍມີບາງບຸກຄົນພາຍໃນປະເທດຂາດສະຕິໃນການປະຕິບັດນະໂຍບາຍ-ມາດຕະການສະກັດກັ້ນທີ່ພາກສ່ວນກ່ຽວຂ້ອງແຕ່ລະຂັ້ນວາງອອກດ້ວຍການກະທຳຕ່າງໆເຊັ່ນ: ໃຫ້ການຊ່ວຍເຫຼືອ,ປົກປິດ ແລະຮ່ວມກັນກະທຳຜິດນຳເອົາເຊື້ອພະຍາດໄປແຜ່ລະບາດໃນສະຖານທີ່ຊຸມຊົນເປັນຕົ້ນແມ່ນສະຖານບັນເທີງ, ຮ້ານ ອາຫານ, ຮ້ານກິນດື່ມ, ຮ້ານບໍລິການຕ່າງໆລວມທັງສະຖານທີ່ທ່ອງທ່ຽວອື່ນໆຊຶ່ງເປັນສາເຫດກໍ່ໃຫ້ເກີດການແຜ່ລະບາດຂອງພະຍາດໂຄວິດ-19 ຮອບໃໝ່ຢູ່ ສປປ ລາວ ເປັນວົງກວ້າງ ແລະເພີ່ມຂຶ້ນຢ່າງຕໍ່ເນື່ອງ.

   ທ່ານ ພົນຕີ ຄຳກິ່ງ ກ່າວຕື່ມວ່າການກະທຳດັ່ງກ່າວນັ້ນສົ່ງຜົນກະທົບທັງທາງກົງ-ທາງອ້ອມຕໍ່ຄວາມບໍ່ສະຫງົບ-ຄວາມ ບໍ່ເປັນລະບຽບຮຽບຮ້ອຍຂອງສັງຄົມ, ສົ່ງຜົນກະທົບເຖິງການພັດທະນາເສດຖະກິດ-ສັງຄົມຕະຫຼອດຮອດການດຳລົງຊີວິດຂອງປະຊາຊົນບັນດາເຜົ່າ, ຜ່ານການສືບສວນ-ສອບສວນຂອງເຈົ້າໜ້າທີ່ຈຶ່ງຮູ້ໄດ້ວ່າກຸ່ມຄົນດັ່ງກ່າວມີອາຊີບເປັນກຳມະກອນ, ນັກຮຽນນັກສຶກສາ, ເຈົ້າໜ້າທີ່ຂອງລັດ, ໃນນັ້ນຈຳນວນໜຶ່ງກໍເປັນປະຊາຊົນຂອງລາວ ແລະຈຳນວນໜຶ່ງກໍເປັນຄົນຕ່າງປະເທດທີ່ເປັນປະເທດໃກ້ຄຽງມີຊາຍແດນຕິດຈອດກັນ.

    ການກະທຳຂອງພວກກ່ຽວເປັນການລະເມີດຕໍ່ກົດໝາຍຂອງ ສປປ ລາວ ເປັນການກະທຳຜິດຕໍ່ປະມວນກົດໝາຍອາຍາ, ກົດໝາຍວ່າດ້ວຍການເຂົ້າ-ອອກເມືອງ ແລະຄຸ້ມຄອງຄົນຕ່າງປະເທດ,ກົດໝາຍວ່າດ້ວຍການກັນ ແລະຄວບຄຸມພະຍາດຕິດຕໍ່ຊຶ່ງແນ່ນອນທີ່ສຸດວ່າເປົ້າໝາຍດັ່ງກ່າວຈະຕ້ອງຖືກດຳເນີນຄະດີຕາມຂະບວນການຍຸຕິທຳ.

    ໝາຍຄວາມວ່າອົງການສືບສວນສອບສວນຂອງເຈົ້າໜ້າທີ່ຕຳຫຼວດປະກອບສຳນວນຄະດີສັ່ງຟ້ອງສານ ແລະຕັດສິນລົງໂທດຕາມສະຖານຄວາມຜິດໜັກ ຫຼືເບົາຂອງແຕ່ລະຄົນສ່ວນກໍລະນີຄົນຕ່າງປະເທດກໍຕ້ອງດຳເນີນການຕາມກົນໄກສົ່ງໂຕຜູ້ຮ້າຍຂ້າມແດນຕາມສົນທິສັນຍາສອງຝ່າຍ.

   ແຕ່ເນື່ອງຈາກປະຈຸບັນການແຜ່ລະບາດຂອງພະຍາດໂຄວິດ-19 ໃນປະເທດເຮົາຍັງມີການຂະຫຍາຍຕົວຢູ່ ແລະກຸ່ມຄົນດັ່ງກ່າວຈຳນວນໜຶ່ງຢູ່ໃນໄລຍະຈຳກັດບໍລິເວນຢູ່ສູນ, ຈຳນວນໜຶ່ງກໍຍັງຮັບການປິ່ນປົວຢູ່ຕາມໂຮງໝໍຕ່າງໆສະນັ້ນຈຶ່ງບໍ່ສາມາດນຳຕົວມາສືບສວນສອບສວນຕາມຂັ້ນຕອນຂອງການດຳເນີນຄະດີໄດ້ຢ່າງເຕັມສ່ວນເຖິງແມ່ນວ່າຈະມີຈຳນວນໜຶ່ງທີ່ປິ່ນປົວຫາຍດີແລ້ວແຕ່ຍັງຕ້ອງຕິດຕາມໄປຕໍ່ອີກໄລຍະໜຶ່ງຕາມມາດຕະການທີ່ວາງອອກເມື່ອໃດພວກກ່ຽວທັງໝົດປິ່ນປົວຫາຍຂາດແລ້ວ, ເຈົ້າໜ້າທີ່ຈະສືບຕໍ່ນຳຕົວມາດຳເນີນຄະດີຕາມຂະບວນການຍຸຕິທຳຕາມສະຖານຄວາມຜິດໜັກ-ເບົາ ຂອງແຕ່ລະຄົນໂດຍຈະບໍ່ມີການລະເວັ້ນເດັດຂາດເຖິງວ່າກຸ່ມຄົນດັ່ງກ່າວຈະເປັນເຈົ້າໜ້າທີ່ລັດ, ເປັນກຳມະກອນ, ນັກສຶກສາ, ເປັນປະຊາຊົນທົ່ວໄປຈະແມ່ນຄົນລາວ ຫຼື ຄົນຕ່າງປະເທດກໍຕ້ອງປະຕິບັດຕາມລະບຽບກົດໝາຍຂອງ ສປປ ລາວ ເພື່ອໃຫ້ຄວາມເປັນທຳແກ່ສັງຄົມ.

แชร์