ເຈົ້າແຂວງຈຳປາສັກ ຊຸກຍູ້ປ້ອງກັນໂຄວິດ-19

   ໃນວັນທີ 4 ພຶດສະພາ 2021 ຜ່ານມານີ້ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກພ້ອມ ທ່ານ ບຸນກອງ ສີຫາວົງ ອະດີດລັດຖະມົນຕີກະຊວງສາທາລະນະສຸກ ແລະຄະນະສະເພາະກິດຂັ້ນສູງກາງ, ຂັ້ນແຂວງໄດ້ລົງເຄື່ອນໄຫວຊຸກຍູ້ມາດຕະການສະກັດກັ້ນ, ຄວບຄຸມ ແລະຕ້ານການລະບາດຂອງພະຍາດໂຄວິດ-19 ທີ່ສະໂມສອນເມືອງບາງຈຽງ ຈະເລີນສຸກ, ໂດຍຕ້ອນຮັບ ແລະລາຍງານສະພາບການຈັດຕັ້ງປະຕິບັດມາດຕະການຕ່າງໆ ໃນຜ່ານມາຂອງ ທ່ານ ສົມລິດ ປັນທະບົວສີ ເຈົ້າເມືອງໆບາຈຽງຈະເລີນສຸກ.

   ໃນການລົງເຄື່ອນໄຫວໃນຄັ້ງນີ້ທ່ານ ບຸນກອງ ສີຫາວົງ ກ່າວວ່າ: ຄະນະພັກ-ອຳນາດການປົກຄອງເມືອງກໍ່ຄືສາທາລະນະສຸກເມືອງບາຈຽງໄດ້ຂຶ້ນແຜນກຳນົດເປົ້າ ໝາຍກຸ່ມສ່ຽງທີ່ຕ້ອງໄດ້ຮັບການສັກວັກແຊງໂດຍສະເພາະແມ່ນທ່ານໝໍທີ່ປິ່ນປົວໃກ້ສິດກັບຄົນເຈັບ, ຜູ້ອາວຸໂສທີ່ມີອາຍຸ 60 ປີ ຂຶ້ນໄປ ແລະ ຜູ້ທີ່ມີພະຍາດຕິດໂຕ, ເອົາໃຈໃສ່ໃນການປະຊາສຳພັນໃຫ້ຄວາມເຂົ້າໃຈແກ່ປະຊາຊົນຕໍ່ມາດຕະການສະກັດກັ້ນ, ກັນການລະບາດ, ຄວບຄຸມ ແລະຕ້ານພະຍາດໂຄວິດ-19 ຕິດພັນກັບການປະຕິບັດທຳລາຍແຫຼ່ງເພາະພັນໜອນນໍ້າຍຸງລາຍ ແລະຕິດພັນກັບການປະຕິບັດ 11 ຕົວຊີ້ວັດຂອງກະຊວງສາທາລະນະສຸກ.

  ສ່ວນທ່ານເຈົ້າແຂວງຈຳປາສັກໄດ້ກ່າວວ່າ: ແຂວງຈຳປາສັກ ໄດ້ເນັ້ນໃຫ້ຄະນະພັກເລຂາຄະນະບໍລິຫານງານພັກແຂວງເຈົ້າແຂວງໆຈຳປາສັກສືບຕໍ່ເພີ່ມທະວີບັນດາມາດຕະການສະກັດກັ້ນ, ກັນການລະບາດ, ຄວບຄຸມ ແລະຕ້ານການລະບາດພະຍາດໂຄວິດ-19, ສືບຕໍ່ເພີ່ມທະວີວຽກງານປ້ອງກັນຊາດ ແລະກວດກາການອອກ-ເຂົ້າເມືອງຂອງປະຊາຊົນ, ຊີ້ ນໍາໆພາປະເມີນຜົນການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ, ຄຳສັ່ງ 4 ຂອງແຂວງຕິດພັນກັບການປະເມີນສັງລວມໃນການກະຕຸ້ນເສດຖະກິດ-ສັງຄົມໄປພ້ອມໆກັນ ແລະຕິດພັນກັບການປຸກລະດົມໃນທົ່ວສັງຄົມປະກອບສ່ວນເຂົ້າໃນວຽກງານສະກັດກັ້ນ, ຄວບຄຸມ ແລະຕ້ານພະຍາດໂຄວິດ-19.

ຂ່າວ: ແຂວງຈຳປາສັກ

แชร์