ລັດຖະບານອອກ 2 ມາດຕະການຄຸ້ມຄອງລາຍຈ່າຍຜ່າວິກິດໂຄວິດລະບາດ

   ເພື່ອຈັດຕັ້ງຜັນຂະຫຍາຍຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດ COVID-19 ໃນການຄຸ້ມຄອງງົບປະມານໂດຍສະເພາະແມ່ນມາດຕະການດ້ານລາຍຈ່າຍງົບປະມານໄລ ຍະການແຜ່ລະບາດຂອງພະຍາດ COVID-19 ປີ 2021 ໃນທົ່ວໂລກ ແລະພາຍໃນປະເທດເຮົາທີ່ມີການແຜ່ລະບາດເປັນວົງກວ້າງ ແລະບໍ່ທັນມີທ່າອ່ຽງຫຼຸດຜ່ອນລົງ ຊຶ່ງສ້າງຜົນກະທົບຢ່າງໜັກຕໍ່ເສດຖະກິດ-ສັງຄົມ, ການດຳລົງຊີວິດ ແລະ ລາຍຮັບງົບປະມານປະຈຳປີຢ່າງຫຼີກລ່ຽງບໍ່ໄດ້ສະນັ້ນລະຖະບານກໍຄືກະຊວງການເງິນຈຶ່ງໄດ້ອອກແຈ້ງການສະບັບເລກທີ 2084/ກງ ລົງວັນທີ 30 ເມສາ 2021 ເລື່ອງມາດຕະການຄຸ້ມຄອງ ແລະປະຕິບັດລາຍຈ່າຍງົບປະມານແຫ່ງລັດໄລຍະການແຜ່ລະບາດຂອງພະຍາດໂຄວິດ- 19 ປີ 2021.

  ໃນແຈ້ງການດັ່ງກ່າວໄດ້ກຳນົດອອກ 2 ມາດຕະການອັນທຳອິດແມ່ນມາດຕະການດ້ານລາຍຈ່າຍບໍລິຫານປົກກະຕິໂດຍເນັ້ນໃຫ້ຂະແໜງງົບປະມານແຫ່ງລັດ ແລະຄັງເງິນແຫ່ງຊາດກວດກາການອະນຸມັດ ແລະການເບີກຈ່າຍງົບປະມານຢ່າງລະອຽດ ແລະຮັດກຸມໂດຍເລັ່ງໃສ່ສະເພາະລາຍຈ່າຍທີ່ຈຳເປັນ, ວຽກງານຮີບດ່ວນໂດຍສຸມໃສ່ການຕອບໂຕ້ ແລະແກ້ໄຂການລະບາດຂອງພະຍາດ COVID19 ເປັນບຸລິມະສິດໄປຄຽງຄູ່ກັບການປະຕິບັດລາຍຈ່າຍເງິນເດືອນ, ເງິນນະໂຍບາຍຂອງພະນັກງານລັດ ຖະກອນ, ທະຫານ, ຕຳຫຼວດ ແລະພະນັກງານບຳນານຢ່າງເປັນປົກກະຕິ, ທັນເວລາ ແລະຊຳລະລາຍຈ່າຍໜີ້ສິນຕ່າງປະເທດ, ຕາມສັນຍາ, ພ້ອມທັງຕອບສະໜອງລາຍຈ່າຍເງິນບໍລິການທີ່ຈຳເປັນໃນການເຄື່ອນໄຫວຂອງກົງຈັກພັກ ແລະລັດຖະບານໃຫ້ສາມາດເຄື່ອນໄຫວໄດ້ເປັນຕົ້ນ: ຄ່າໄຟຟ້າ,ນໍ້າປະປາ,ໂທລະສັບ,ນໍ້າມັນບໍລິຫານ, ນໍ້າມັນຕິດພັນບຸກຄົນ ແລະລາຍຈ່າຍຕ່າງໆ ທີ່ຈຳເປັນໃຫ້ໄດ້ໂດຍພື້ນພານ; ບໍ່ອະນຸຍາດໃຫ້ບັນດາຫົວໜ່ວຍງົບປະມານສູນກາງ ແລະທ້ອງຖິ່ນສະເໜີອະນຸມັດບາງຮ່ວງລາຍຈ່າຍເຊັ່ນ: ລາຍຈ່າຍທີ່ຕິດພັນກັບການໄປວຽກທາງການພາຍໃນ ແລະຕ່າງປະເທດ, ການຈັດກອງປະຊຸມ-ສຳມະນາຕ່າງໆ, ລາຍຈ່າຍຮັບ ແຂກຕ່າງປະເທດ, ລາຍ ຈ່າຍຊື້ຊັບສົມບັດຄົງທີ່, ສ້ອມແປງ ແລະລາຍຈ່າຍ ອື່ນໆທີ່ບໍ່ຈຳເປັນໃນໄລຍະນີ້, ກໍລະນີສະ ເໜີງົບປະມານໄດ້ອະນຸມັດແລ້ວບໍ່ໃຫ້ຫົວ ໜ່ວຍງົບປະມານປະກອບໃບຖອນເງິນ, ສ່ວນເອກະສານທີ່ຫົວໜ່ວຍງົບປະມານໄດ້ປະກອບໃບຖອນເງິນຫາຄັງເງິນແຫ່ງຊາດແລ້ວແມ່ນໃຫ້ຄັງເງິນແຫ່ງຊາດໂຈະການເບີກຈ່າຍ; ໃນສະພາບທີ່ມີຄວາມຕ້ອງການງົບປະມານໃສ່ຕອບໂຕ້, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ COVID-19 ໃຫ້ຫົວໜ່ວຍງົບປະມານສູນກາງ ແລະ ທ້ອຖິ່ນໃຊ້ມາດຕະການຮັກສາຍແອວ ແລະຫຼຸດຜ່ອນງົບປະມານຂອງຕົນເອງລົງເພື່ອຫັນໄປສຸມໃສ່ຂະແໜງການທີ່ມີຄວາມຈຳເປັນໃນການນຳໃຊ້ງົບປະມານໂດຍສະເພາະແມ່ນຂະແໜງສາທາ ລະນະສຸກ, ປ້ອງກັນຊາດ, ປ້ອງກັນຄວາມສະຫງົບ, ຄະນະສະເພາະກິດ COVID19 ແລະຄະນະສະເພາະກິດຕ່າງໆ ທີ່ກ່ຽວຂ້ອງ; ຫົວໜ່ວຍງົບປະມານສູນກາງ ແລະທ້ອງຖິ່ນທີ່ມີລາຍຮັບວິຊາການ ແລະ ກອງທຶນມອບລາຍຮັບທີ່ຈັດເກັບໄດ້ເຂົ້າງົບປະມານໃຫ້ຄົບຖ້ວນ, ຈັດລຽງບຸລິມະສິດລາຍຈ່າຍຄືນໃໝ່ໂດຍໃຫ້ມີການປະຢັດມັດ ທະຍັດ ແລະມີສ່ວນເຫຼືອເພື່ອຊ່ວຍໜູນງົບປະມານລວມ.

   ສຳລັບມາດຕະການທີ 2 ແມ່ນມາດຕະການດ້ານລາຍຈ່າຍເງິນລົງທຶນພາຍໃນຂອງລັດໂດຍກະຊວງການເງິນກຳນົດແຜນລາຍຈ່າຍເງິນລົງທຶນພາຍໃນຂອງລັດບ້ວງເລື່ອນຈ່າຍຈາກປີ 2020 ຈຳນວນ 700 ຕື້ກີບ ໃຫ້ສືບຕໍ່ປະຕິບັດການອະນຸມັດ ແລະເບີກຈ່າຍໃຫ້ສຳເລັດໃນ 6 ເດືອນຕົ້ນປີ 2021 ແຕ່ໃຫ້ໂຈກຊົ່ວຄາວເງິນສົ່ງເສີມວິຊາການທີ່ເປັນການລົງຊຸກຍູ້, ຕິດຕາມຂະແໜງການ ແລະທ້ອງຖິ່ນ; ແຜນລາຍຈ່າຍເງິນລົງທຶນພາຍໃນຂອງລັດບ້ວງແຜນປົກກະຕິ ປີ 2021 ຈຳນວນ 1.300 ຕື້ກີບ ໃຫ້ເລີ່ມປະຕິບັດແຜນພາຍຫຼັງກະຊວງແຜນການ ແລະການລົງທຶນແຈ້ງແຜນໂຄງການລົງທຶນລະອຽດບົນພື້ນຖານຄວາມອາດສາມາດຕົວຈິງຂອງງົບປະມານ; ໃຫ້ຂະແໜງການສູນກາງ ແລະທ້ອງຖິ່ນເປັນເຈົ້າການກວຄືນລາຍຈ່າຍທີ່ເຫັນວ່າສາມາດເຈລະຈາເລື່ອນ ຫຼືໂຈະການໃຊ້ຈ່າຍຜ່ອນໄດ້ນຳພາກສ່ວນກ່ຽວຂ້ອງເຊັ່ນ: ເງິນປະ ກອບສ່ວນທາງລົດໄຟ, ເງິນປະກອບສ່ວນບຳລຸງອົງການຈັດຕັ້ງສາກົນ ແລະອື່ນໆ ແລ້ວຈິ່ງໃຫ້ກະຊວງການເງິນໂດຍໄວ; ໃນກໍລະນີທີ່ສະພາບການແຜ່ລະບາດຂອງພະຍາດໂຄວິດ-19 ຍັງບໍ່ສາມາດຄວບຄຸມໄດ້ໃນໄລຍະອັນໃກ້ນີ້ ແລະລັດຖະບານຍັງສືບຕໍ່ (Lock down) ກະຊວງການເງິນຈະໄດ້ຄົ້ນຄວ້າ ແລະສະເໜີມາດຕະການຕໍ່ ລັດຖະບານໃນການຫຼຸດ, ໂຈະ ຫຼືສືບຕໍ່ເລື່ອນລາຍຈ່າຍຂອງຂະແໜງການສູນກາງ ແລະທ້ອງຖິ່ນລົງຕາມສະພາບການຈັດເກັບລາຍຮັບທີ່ບໍ່ສາມາດບັນລຸຕາມຄາດໝາຍທີ່ສະພາແຫ່ງຊາດຮັບຮອງ.

  ທັງນີ້ໃນແຈ້ງການສະບັບດຽວກັນໄດ້ເນັ້ນຕື່ມໂດຍໃຫ້ບັນດາກະຊວງ, ອົງການສູນກາງ, ນະຄອນຫຼວງ ແລະບັນດາແຂວງຊີ້ນຳຂະແໜງການກ່ຽວຂ້ອງໃນຄວາມຮັບ ຜິດຊອບຂອງຕົນເພື່ອຈັດຕັ້ງປະຕິບັດໃຫ້ເປັນເອກະພາບ ແລະມີປະສິດທິຜົນສູງ.

แชร์