ຫຼາຍພາກສ່ວນ ສືບຕໍ່ມອບເຄື່ອງ ແລະ​ເງິນ​ຊ່ວຍ​ເຫຼືອ​ຕ້ານ​ໂຄ​ວິດ-19

    ຕອນເຊົ້າວັນທີ 5 ພຶດສະພາ 2021 ທີ່ສຳນັກງານນາຍົກລັດຖະມົນຕີໄດ້ມີພິທີມອບ-ຮັບເຄື່ອງ ແລະເງິນ​ຊ່ວຍ​ເຫຼືອຈາກພາກສ່ວນຕ່າງໆ ໃຫ້ແກ່ລັດຖະບານລວມມູນຄ່າເກືອບ 9 ກວ່າຕື້ກີບ ແລະ 88.000 ໂດລາສະຫະລັດ ເພື່ອນຳໃຊ້ເຂົ້າໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.

   ໃນໂອກາດນີ້, ຕາງໜ້າໃຫ້ແກ່ລັດຖະບານ ແຫ່ງ ສປປ ລາວ ກ່າວຮັບໂດຍທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອປ້ອງກັນ,​ ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19; ມີຄະນະສະເພາະກິດ, ຜູ້ຕາງໜ້າກະຊວງ ແລະວິຊາການກ່ຽວຂ້ອງເຂົ້າຮ່ວມ. ການມອບການຊ່ວຍເຫຼືອຄັ້ງນີ້ປະກອບມີ 7 ພາກ​ສ່ວນ ຄື: ບໍລິສັດສະຕາ​ໂທລະ​ຄົມ (Unitel) ມອບເງິນ ຈຳນວນ 1,5 ຕື້ກີບ, ​ລະບົບ ICT ເພື່ອ​ນຳ​ໃຊ້​ເຂົ້າ​ໃນ​ການ​ຄຸ້ມ​ຄອງ​ການ​ສັກ​ວັກ​ຊີນ ມູນ​ຄ່າ 2,15 ຕື້​ກີບ, Data ແລະ Voice ເພື່ອ​ນຳ​ໃຊ້​ໂທ​ລະ​ສັບ ແລະອິນເຕີເນັດ ມູນຄ່າ 1,35 ຕື້ກີບ, ລວມມູນຄ່າທັງໝົດ 5 ຕື້ກີບ;

ໃນນາມສ່ວນຕົວກໍ່ຄືຄອບຄົວທ່ານ ຫວັງຊຸນ​ຄາຍ ມອບ​ເງິນ ຈຳນວນ 3 ຕື້​ກີບ; ບໍລິສັດ ຊິ​ສ​ເມ​ຕິກ ​ໄອ​ທີ ໂຊ​ລູ​ຊັ້ນ ຊຶ່ງ​ເປັນ​ບໍ​ລິ​ສັດ​ໃນ​ກຸ່ມບໍ​ລິ​ສັດ AIF Group ມອບ​ເງິນ ຈຳ ນວນ 1 ຕື້​ກີບ; ມູນ​ນິທິ​ພັດທະນາ​ລ້ານ​ຊ້າງ-​ແມ່​ຂອງ ມອບ​ຜ້າ​ປິດ​ປາກ-ດັງ ຈຳນວນ 200.000 ອັນ, ມູນ​ຄ່າ 88.000 ​ໂດ​ລາ​ສະຫະລັດ; ສະພາ​ການ​ຄ້າ ຟູ​ຈ້ຽນ ປະຈຳ ສປປ ລາວ ມອບ​ເງິນ ຈຳນວນ 116 ລ້ານ​ກີບ; ທ່ານ ກຽງ​ສັກ ສະຫວັນ​ວາລີ  ພ້ອມ​ດ້ວຍ​ຄອບຄົວມອບ​ເງິນ ຈຳນວນ 100 ລ້ານ​ກີບ; ​ແລະບໍລິສັດ ສະ​ໄກ ຂຸດ​ຄົ້ນ​ບໍ່​ແຮ່ ຈຳກັດ ມອບ​ເງິນ ຈຳນວນ 100 ລ້ານ​ກີບ.

 ໂອກາດດັ່ງກ່າວ,ທ່ານຮອງນາຍົກລັດຖະມົນຕີໄດ້ສະແດງຄວາມຂອບໃຈ ​ແລະຊົມ​ເຊີຍຕໍ່ບັນດາພາກສ່ວນຕະຫຼອດຮອດພະນັກງານ ແລະຄອບຄົວຂອງບັນດາພາກສ່ວນທີ່​ໄດ້ປະກອບສ່ວນມອບການຊ່ວຍເຫຼືອ​ເຂົ້າ​ໃນການຈັດຕັ້ງປະຕິບັດວຽກ​ງານ​ປ້ອ​ງກັນ, ສະກັດກັ້ນ, ຄວບ​ຄຸມ ແລະແກ້​ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ຄັ້ງນີ້.​ ການປະກອບສ່ວນດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງສະພາບການໃນປະຈຸບັນ, ຊຶ່ງໄດ້ສະແດງເຖິງສະຕິ​ຕື່ນ​ຕົວ​ທາງ​ການ​ເມືອງ, ຄວາມເສຍສະຫຼະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມສາມັກຄີເປັນເອກະພາບ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງ-ກຳລັງໃຈອັນໃຫຍ່ຫຼວງໃຫ້ແກ່ປະ​ເທດ​ຊາດ ​ແລະປະຊາຊົນໂດຍສະເພາະພະນັກງານແພດໝໍ ແລະເຈົ້າໜ້າທີ່ທຸກຄົນທີ່ພວມປະຕິບັດໜ້າທີ່ຕ້ານການແຜ່ລະບາດ ຂອງພະຍາດໂຄວິດ-19 ຢູ່ໃນທົ່ວປະເທດ, ພ້ອມ​ທັງໃຫ້ຄຳໝັ້ນສັນຍາວ່າ ຈະນໍາໃຊ້ເຄື່ອງ​ ແລະ ​ເງິນຊ່ວຍ​ເຫຼືອດັ່ງກ່າວ ໃຫ້ຖືກກັບຈຸດປະສົງເປົ້າໝາຍ ແລະ ເກີດປະ​

ໂຫຍດ​ສູງ​ສຸດໂດຍສະເໜີໃຫ້ບັນດາພາກສ່ວນທີ່ໄດ້ມອບການຊ່ວຍເຫຼືອໃນຄັ້ງນີ້ຈົ່ງພ້ອມກັນຕິດຕາມ ​ແລະ ຊຸກຍູ້-ສົ່ງ​ຂ່າວ ການນຳໃຊ້ເຄື່ອງ ແລະ ເງິນດັ່ງກ່າວໃຫ້ມີຄວາມໂປ່ງໃສ, ໄປຮອດໄປເຖິງເປົ້າໝາຍ,ສອດຄ່ອງກັບເນື້ອໃນຈິດໃຈຂອງການຊ່ວຍເຫຼືອຢ່າງແທ້ຈິງ. ໃນໂອກາດດຽວກັນ,ທ່ານຮອງນາຍົກລັດຖະມົນຕີຍັງໄດ້ຮຽກຮ້ອງມາຍັງທຸກພາກສ່ວນໃນສັງຄົມເພີ່ມທະວີຄວາມເປັນ​ຈິດ​ໜຶ່ງ​ໃຈ​ດຽວ​ກັນຮ່ວມ​ກັບ​ລັດ​ຖະ​ບານເປັນ​ເຈົ້າ​ການປະ​ຕິ​ບັດ​ບັນ​ດາມາດ​ຕະ​ການປ້ອງກັນ, ສະ​ກັດ​ກັ້ນ, ຄວບ​ຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຢ່າງ​ເຂັ້ມ​ງວດ​ປະກອບສ່ວນເຮັດໃຫ້ການປະຕິບັດພາລະກິດຕ້ານພະຍາດໂຄວິດ-19 ຄັ້ງນີ້ ໄດ້ຮັບຜົນສຳເລັດຢ່າງຈົບງາມເວົ້າລວມ,ເວົ້າສະເພາະແມ່ນສະເໜີໃຫ້ບັນດາພາກສ່ວນທີ່ເຂົ້າມອບການຊ່ວຍເຫຼືອຈົ່ງຊ່ວຍປຸກລະດົມ, ອະທິບາຍຊີ້ແຈງໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນໄດ້ຮັບຮູ້ ແລະ ເຂົ້າໃຈເຖິງຄວາມອັນຕະລາຍຂອງເຊື້ອພະຍາດໂຄວິດ-19, ລວມທັງເຫດຜົນ ແລະຄວາມຈຳເປັນທີ່ລັດຖະບານຕ້ອງວາງນະໂຍບາຍຕ່າງໆ

ເພື່ອຕ້ານການແຜ່ລະບາດຂອງພະຍາດດັ່ງກ່າວ, ພ້ອມທັງສະເໜີໃຫ້ເອົາໃຈໃສ່ຄຸ້ມຄອງ, ເບິ່ງແຍງດູແລພະນັກງານເຫຼົ່ານັ້ນໃຫ້ມີສຸຂະພາບແຂງແຮງ, ປອດໄພຈາກເຊື້ອພະຍາດຕ່າງໆ, ເຂົ້າຮ່ວມ ແລະສະໜັບສະໜູນການຈັດຕັ້ງປະຕິບັດແນວທາງນະໂຍບາຍຂອງພັກ ແລະລັດເຮົາ. ນອກນັ້ນ, ທ່ານຮອງນາຍົກລັດຖະມົນຕີຍັງ​ໄດ້​ແຈ້ງ​ໃຫ້​ຊາບກ່ຽວ​ກັບ​ສະພາບ​ການ​ແຜ່ລະບາດຂອງ​ພະຍາດ​ໂຄ​ວິດ-19 ຢູ່​ໃນ​ໂລກກໍ່ຄືພາຍ​ໃນສປປ ລາວ, ລວມທັງຄວາມ​ຄືບ​ໜ້າ​ການແກ້ໄຂ, ຂໍ້ຄົງຄ້າງ-ສິ່ງທ້າທາຍທີ່​ພວກ​ເຮົາ​ກຳ​ລັງ​ປະ​ເຊີນ. ​ເຖິງ​ຢ່າງ​ໃດ​ກໍ່​ດີ, ລັດຖະບານກໍ່​ຍັງ​ເຊື່ອ​ໝັ້ນ​ວ່າດ້ວຍຄວາມຕັດສິນໃຈສູງບວກກັບບົດຮຽນ, ປະສົບການ, ມູນເຊື້ອອັນດີງາມ ແລະຄວາມສາມັກຄີເປັນປຶກ ແຜ່ນຂອງປວງຊົນລາວທັງຊາດຈະເຮັດໃຫ້ພວກເຮົາສາມາດຜ່ານຜ່າຄວາມຫຍຸ້ງຍາກ ແລະເອົາຊະນະເຊື້ອພະຍາດທີ່ຮ້າຍກາດດັ່ງກ່າວນີ້ໄດ້.

 (ພາບ-ຂ່າວ: ກົມປະຊາສຳພັນ ຫສນຍ).

แชร์