ຫວຽດນາມ ຊ່ວຍລາວຕ້ານໂຄວິດ-19

  ສສ ຫວຽດນາມ ໄດ້ມອບເງິນສົດ 5 ແສນໂດລາ ພ້ອມສົ່ງທີມແພດຊ່ຽວຊານ 35 ທ່ານ ແລະອຸປະກອນການແພດປະະກອບມີ: ເຄື່ອງຊ່ວຍຫາຍໃຈຈຳນວນ 200 ເຄື່ອງ, ທາດຂ້າເຊື້ອພະຍາດຈຳນວນ 10 ພັນກິໂລກຣາມ, ຜ້າອັດປາກດັງ ຈໍານວນ 2 ລ້ານອັນ ແລະອື່ນໆໃຫ້ແກ່ພັກ, ລັດ ແລະປະຊາຊົນລາວເພື່ອນຳໃຊ້ເຂົ້າໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຮອບໃໝ່ຢູ່ ສປປ ລາວ.

    ພິທີມອບ-ຮັບການຊ່ວຍເຫຼືອດັ່ງກ່າວ, ໄດ້ຈັດຂຶ້ນວັນທີ 4 ພຶດສະພາ 2021 ທີ່ສະໜາມບິນສາກົນວັດໄຕ, ຕາງໜ້າກ່າວມອບໂດຍ ທ່ານ ໂຕແອັງຢຸງ ຮອງລັດຖະ ມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ແລະຕາງໜ້າລັດຖະບານລາວກ່າວຮັບໂດຍທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີແຫ່ງ ສປປ ລາວ ໂດຍມີຄະນະນໍາຂອງບັນດາກະຊວງ ແລະພະນັກງານທີ່ກ່ຽວຂ້ອງເຂົ້າຮ່ວມ. 

   ທ່ານ ກິແກ້ວ ໄຂຄໍາພິທູນ ຕາງໜ້າໃຫ້ພັກ, ລັດ ແລະປະຊາຊົນລາວສະແດງຄວາມຂອບໃຈເປັນຢ່າງສູງໂດຍຜ່ານທ່ານຮອງລັດຖະມົນຕີ ໂຕແອັງຢຸງ ໄປຍັງພັກ, ລັດ ຖະບານ ແລະ ປະຊາຊົນຫວຽດນາມອ້າຍນ້ອງທີ່ເວລາໃດກໍມີຄວາມເປັນຫ່ວງເປັນໄຍ ແລະ ໃຫ້ການຊ່ວຍເຫຼືອອັນລໍ້າຄ່າແກ່ພັກ, ລັດຖະບານ ແລະ ປະຊາຊົນລາວມາຕະຫຼອດ.

   ການຊ່ວຍເຫຼືອໃນຄັ້ງນີ້, ໄດ້ປະກອບສ່ວນອັນສໍາຄັນສ້າງຂວັນກໍາລັງໃຈອັນໃຫຍ່ຫຼວງ ແລະເພີ່ມກໍາລັງແຮງໃຫ້ແກ່ບັນດາແພດໝໍຂອງລາວທີ່ມີຈຳນວນຈຳກັດທີ່ກໍາລັງເຮັດວຽກແຂ່ງຂັນກັບເວລາເພື່ອເບິ່ງແຍງປິ່ນປົວຜູ້ຕິດເຊື້ອທີ່ມີຈຳນວນເພີ່ມຂຶ້ນຫຼາຍໃນທຸກມື້. ພ້ອມນີ້, ກໍຈະເປັນຂວັນກໍາລັງໃຈອັນປະເສີດແກ່ຄົນເຈັບຜູ້ທີ່ກຳລັງ ປິ່ນປົວຢູ່ໃນໂຮງໝໍຕ່າງໆ ໃນຂອບເຂດທົ່ວປະເທດ. ສິ່ງເຫຼົ່ານີ້, ເປັນການສະແດງເຖິງນໍ້າໃຈເອື້ອເຟື້ອເພື່ອແຜ່ຂອງສະຫາຍຫວຽດນາມອ້າຍນ້ອງ, ສະແດງເຖິງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງລາວ ແລະຫວຽດນາມໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

   ກ່ອນໜ້ານີ້, ໃນປີ 2020 ສປປ ລາວ ກໍໄດ້ຮັບການຊ່ວຍເຫລືອຈາກສະຫາຍຫວຽດນາມມາແລ້ວຊຶ່ງເປັນການຊ່ວຍເຫຼືອທີ່ທັນການ ແລະມີປະສິດທິຜົນທີ່ສຸດຊ່ວຍໃຫ້ ສປປ ລາວ ສາມາດຄວບຄຸມການລະບາດຂອງເຊື້ອພະຍາດໂຄວິດ19 ໄດ້ໃນໄລຍະຜ່ານມາ.

ຂ່າວ: ສິງຄຳ ພາບ: ເກດສະໜາ

แชร์