ທະນາຄານລາວ-ຫວຽດ ມອບເຄື່ອງຊ່ວຍແພດຕ້ານໂຄວິດ

  ໃນວັນທີ 3 ພຶດສະພາ 2021 ຜ່ານມາ, ທີ່ຫ້ອງການກະຊວງສາທາລະນະສຸກ; ທະນາຄານຮ່ວມທຸລະກິດລາວຫວຽດ ຈໍາກັດ (LaoVietBank) ໄດ້ມອບເຄື່ອງຊ່ວຍເຫຼືອທາງການແພດໃຫ້ແກ່ກະຊວງສາທາລະນະສຸກເພື່ອນໍາໃຊ້ເຂົ້າໃນການສະກັດກັ້ນ ແລະປ້ອງກັນການລະບາດຂອງພະຍາດໂຄວິດ-19. ເຄື່ອງທີ່ນໍາມາມອບໃນຄັ້ງນີ້ປະກອບມີ: ຜ້າອັດປາກ, ເຫຼົ້າຂ້າເຊື້ອ, ເຄື່ອງວັດແທກອຸນຫະພູມ ແລະອື່ນໆລວມມູນຄ່າ 101,84 ລ້ານກີບ.

   ຕາງໜ້າມອບໂດຍທ່ານ ຫງວຽນ ດຶກ ຫວູ, ຜູ້ອຳນວຍການໃຫຍ່ທະນາຄານຮ່ວມທຸລະກິດລາວ-ຫວຽດ ຈໍາກັດ ແລະຮັບໂດຍ ທ່ານ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ. ອີກທັງໄດ້ມີການລາຍງານໃຫ້ກັບທ່ານລັດຖະມົນຕີກະຊວງສາທາລະນະສຸກຊາບວ່າໃນໄລຍະຜ່ານມາ, LaoVietBank ບໍ່ພຽງແຕ່ປະຕິບັດການຊ່ວຍເຫຼືອຢູ່ສຳນັກງານໃຫຍ່ແຕ່ LaoVietBank ຍັງມີການຊ່ວຍເຫຼືອຢູ່ບັນດາພະແນກສາທາລະນະສຸກຂັ້ນທ້ອງຖິ່ນ ແລະ ມີການຊ່ວຍເຫຼືອກັບບັນດາຫນ່ວຍງານທີ່ກ່ຽວຂ້ອງ ແລະບັນດາວັດໃນເຂດທ້ອງຖິ່ນທີ່ໄດ້ຮັບຜົນກະທົບນຳອີກດ້ວຍ.

 ນອກຈາກນັ້ນ, LaoVietBank ໄດ້ມີການປະຕິບັດຢ່າງເຄັ່ງຄັດບັນດາທິດຊີ້ນຳຂອງລັດຖະບານກໍ່ຄືທະນາຄານ ແຫ່ງ ສປປ ລາວ ໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19; ເຊິ່ງໃນນັ້ນ LaoVietBank ໄດ້ມີການມາດຕະການຮັບປະກັນຄວາມປອດໄພໃຫ້ກັບພະນັກງານ,ລູກຄ້າ ແລະຊຸມຊົນເປັນສຳ ຄັນ. ສ່ວນຢູ່ສຳນັກງານໃຫຍ່, ສາຂາ ແລະໜ່ວຍບໍລິການໃນທົ່ວປະເທດແມ່ນມີການຈັດສັນໃຫ້ມີການວັດແທກອຸນຫະພູມ, ສີດຢາຂ້າເຊື້ອຢ່າງເປັນປະຈຳ; ອີກທັງຍັງແນະນຳໃຫ້ລູກຄ້າທີ່ເຂົ້າໃຊ້ບໍລິການປະຕິບັດຕາມຂໍ້ກຳນົດໃນການປ້ອງກັນການລະບາດພະຍາດດ້ວຍການໃສ່ຜ້າອັດປາກ ແລະລ້າງມືກ່ອນເຂົ້າໃຊ້ບໍລິການ.

   ເວົ້າສະເພາະ, ພະນັກງານໃນທົ່ວລະບົບຂອງ LaoVietBank ແມ່ນມີການປະຕິບັດການປ່ຽນກັນເຮັດວຽກຢູ່ເຮືອນ ແລະ ມີການແຍກຈຸເຮັດວຽກ. ພະນັກງານ 100% ໃນເວລາເຮັດວຽກຢູ່ທະນາຄານແມ່ນໃສ່ຜ້າປິດປາກ,ເຮັດທຸລະກຳໂດຍຜ່ານແຜ່ນກັ້ນໃສ ແລະມີການຮັກສາໄລຍະຫ່າງເມື່ອເວລາເຮັດທຸລະກຳໃຫ້ລູກຄ້າ.

ນອກຈາກນັ້ນ, ຜູ້ບໍລິຫານຂອງ LaoVietBank ຍັງໄດ້ມີການສົ່ງເສີມ ແລະ ປຸກລະດົມໃຫ້ພະນັກງານໃນທົ່ວລະບົບເປັນເຈົ້າການໃນການສັກວັກແຊງ. ມາຮອດປະຈຸບັນ, ພະນັກງານພວກເຮົາໄດ້ສັກຢາວັກຊີນເຂັມທຳອິດແລ້ວເກືອບ 230 ຄົນ; ສ່ວນເຂັມທີສອງໄດ້ສັກວັກແຊງ ແລ້ວເກືອບ 70 ຄົນ ກວມອັດຕາເຖິງ ¾ ຫຼື ເທົ່າກັບ 75% ຂອງຈຳນວນພະນັກງານທັງໝົດ. ສ່ວນໃນກໍລະນີ, ທີ່ຍັງເຫຼືອແມ່ນບັນດາພະນັກງານທີ່ກຳລັງຖືພາ ແລະ ເງື່ອນໄຂສຸຂະພາບຍັງບໍ່ທັນສາມາດເຂົ້າຮັບການສັກວັກແຊງໄດ້. ຊຶ່ງຄາດວ່າຮອດທ້າຍເດືອນ 5/2021 ພະນັກງານເຫຼົ່ານັ້ນຈະໄດ້ຮັບວັກແຊງຕໍ່າສຸດ 98% ຂອງຈຳນວນພະນັກງານທັງໝົດ.

แชร์