ຫຼວງພະບາງ ສະເໜີເຈົ້າຂອງຕະຫຼາດທົ່ວແຂວງ ຫຼຸດຄ່າເຊົ່າແມ່ຄ້າ

  ພະແນກອຸດສາຫະກໍາ ແລະການຄ້າແຂວງຫຼວງພະບາງ ໄດ້ອອກໜັງສືສະເໜີເລກທີ 664/ພອຄ.ຫຼ.ບ ລົງວັນທີ 30 ເມສາ 2021 ນີ້ເຖິງຫົວໜ້າຫ້ອງການອຸດສາຫະກໍາ ແລະການຄ້າ 11ເມືອງ ແລະ ຫ້ອງການນະຄອນ, ເຈົ້າຂອງຕະຫຼາດຂະໜາດນ້ອຍ, ກາງ ແລະ ຂະໜາດໃຫຍ່ໃນທົ່ວແຂວງຫຼວງພະບາງເພື່ອໃຫ້ຄົ້ນຄວ້າຜ່ອນຜັນຫຼຸດຄ່າບໍລິການ-ເກັບຈ່າຍລາຍວັນໃຫ້ແມ່ຄ້າໃນຊ່ວງການແຜ່ລະບາດໂຄວິດ-19.

  ທ່ານ ສຸລິໄຊ ຫົງສາຄອນ ຮອງຫົວໜ້າພະແນກອຸດສາຫະກໍາ ແລະການຄ້າ ແຂວງຫຼວງພະບາງກ່າວວ່າ: ອີງຕາມຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 15/ນຍ,ລົງວັນທີ 21 ເມສາ 2021 ແລະດໍາລັດຂອງນາຍົກລັດຖະມົນຕີສະບັບເລກທີ 474/ນຍ ລົງວັນທີ 18 ພະຈິກ 2010 ວ່າດ້ວຍການຄຸ້ມຄອງລາຄາສິນຄ້າ ແລະຄ່າບໍລິການຊຶ່ງຖືກກັບສະພາບການໃນປະຈຸບັນຫຼາຍແຂວງໃນທົ່ວປະເທດຂອງລາວເຮົາເວົ້າລວມ, ເວົ້າສະເພາະກໍແມ່ນແຂວງຫຼວງພະບາງໄດ້ມີຜູ້ຕິດເຊື້ອພະຍາດໂຄວິດ-19 ແລະໄດ້ມີມາດຕະການລອ໋ກດາວ (Lockdown), ໄດ້ເຮັດໃຫ້ພໍ່ແມ່ປະຊາຊົນບັນດາເຜົ່າ ແລະຜູ້ປະກອບການທຸລະກິດຄ້າຂາຍແມ່ນໄດ້ກັກໂຕຢູ່ເຮືອນຢູ່ພາຍໃນບ້ານບໍ່ສາມາດອອກໄປເຮັດວຽກ, ສ້າງລາຍໄດ້, ດໍາເນີນທຸລະກິດ, ຈັບຈ່າຍຊື້ສິນຄ້າ ແລະບໍລິການໄດ້ຢ່າງປົກກະຕິຊຶ່ງສົ່ງຜົນກະທົບໂດຍກົງຕໍ່ການດໍາລົງຊີວິດປະຈໍາວັນ.

 ດັ່ງນັ້ນພະແນກອຸດສາຫະກໍາ ແລະການຄ້າແຂວງຈຶ່ງໄດ້ອອກໜັງສືສະເໜີເຖິງເຈົ້າຂອງຕະຫຼາດຂະໜາດນ້ອຍ, ກາງ ແລະຂະໜາດໃຫຍ່ໃນທົ່ວແຂວງຫຼວງພະບາງເພື່ອປຶກສາຫາລືຄົ້ນຄວ້າຮ່ວມກັນກ່ຽວກັບນະໂຍບາຍຜ່ອນຜັນດ້ານລາຄາ ແລະຄ່າບໍລິການຕະຫຼາດໂດຍສະເພາະແມ່ນນະໂຍບາຍຫຼຸດອັດຕາຄ່າເຊົ່າຫ້ອງ ແລະ ຄ່າເກັບຈ່າຍລາຍວັນໃຫ້ກັບບັນດາແມ່ຄ້າຊາວຂາຍເປັນຕົ້ນແມ່ນກຸ່ມຂາຍສິນຄ້າປະເພດອາຫານແລະພືດຜັກຕ່າງໆທີ່ມາໃຊ້ບໍລິການຢູ່ໃນຂອບເຂດຕະຫຼາດຂອງຕົນເພື່ອເປັນການ ຊ່ວຍຫຼຸດຜ່ອນລາຍຈ່າຍຂອງແມ່ຄ້າກໍຄືໃຫ້ກໍາລັງໃຈແມ່ຄ້າໃນໄລຍະການລະບາດພະຍາດໂຄວິດໃນຮອບນີ້ໃຫ້ຜ່ານວິກິດໄປພ້ອມກັນ.

แชร์