ຄຳມ່ວນ ເພີ່ມທະວີປ້ອງກັນໂຄວິດ

 ວັນທີ 27 ເມສາ 2021 ທີ່ຫ້ອງວ່າການເມືອງນາກາຍ ແຂວງຄໍາມ່ວນ ໄດ້ຈັດກອງປະຊຸມຂຶ້ນລະຫວ່າງການນໍາຂັ້ນແຂວງ ແລະຂັ້ນເມືອງຕໍ່ກັບມາດຕະການຄວບຄຸມ ປ້ອງກັນ ແລະສະກັດກັ້ນຈາກເຊື້ອຈຸລະໂລກສາຍພັນໃໝ່ໂຄວິດ-19 ໂດຍພາຍໃຕ້ການເປັນປະທານຂອງ ທ່ານ ພ/ວ ສົມແຄນ ອັບປະສອນ ຄະນະປະຈໍາພັກແຂວງ ຫົວໜ້າກອງບັນຊາການທະຫານແຂວງຄໍາມ່ວນ, ເຂົ້າຮ່ວມໂດຍທ່ານ ນາງ ບົວກາ ແກ້ວມະນີ ກໍາມະການພັກແຂວງເລຂາພັກເມືອງເຈົ້າເມືອງໆນາກາຍພ້ອມຄະນະ ສະເພາະກິດຕ້ານ ແລະສະກັດກັ້ນການແຜ່ລະບາດພະຍາດໂຄວິດ-19 ຂັ້ນເມືອງເຂົ້າຮ່ວມ.

  ທ່ານ ແສງແກ້ວ ພະຄຸນທອງ ຮອງເຈົ້າເມືອງໆນາກາຍໄດ້ລາຍງານຜົນການເຄື່ອນໄຫວຂອງຄະນະທີມງານລົງເຄື່ອນໄຫວຕ້ານ ແລະສະກັດກັ້ນພະຍາດລະບາດໂຄວິດ-19 ຢູ່ແຕ່ລະເຂດພາຍໃນເມືອງນາກາຍປະກອບມີ 14 ທ່ານ, ຍິງ 1 ທ່ານ, ກໍາມະການກອງເລຂາປະກອບມີ 9 ທ່ານ, ເມືອງນາກາຍມີດ່ານກວດຄົນເຂົ້າ-ອອກເມືອງ 1 ຈຸດ ທີ່ທາງລົງພູມີຜູ້ເດີນທາງເຂົ້າ-ອອກເມືອງນາກາຍທັງໝົດເຂົ້າ 239 ຄົນ, ຍິງ 81 ຄົນ, ອອກເມືອງ 108 ຄົນ, ຍິງ 37 ຄົນ, ມີເອກະສານ 5 ຄົນ ຊຶ່ງວັນທີ 21 ເມສາ 2021 ໄດ້ມີຈຳນວນພົນເຂົ້າເມືອງນາກາຍເພດຍິງ 2 ຄົນ, ໃນນັ້ນມາຈາກໄທ 1 ຄົນ ມາຈາກຈໍາປາສັກ 1 ຄົນ ແລະ ກວດ ແລະ ວັດແທກອຸນ ຫະພູມສອບຖາມປະຫວັດການເດີນທາງລະອຽດ.

  ວັນທີ 22 ເມສາ 2021: ຕິດຕາມຄົນເຂົ້າເມືອງໄດ້ເຂົ້າ 22 ຄົນ, ຍິງ 16 ຄົນ, ວັນທີ 23 ເມສາ 2021: ໄດ້ຮັບສາຍລາຍງານວ່າມີແຮງງານ ແລະນັກສຶກສາ ທີ່ມາຈາກແຂວງສະຫວັນນະເຂດ ຈຳນວນ 7 ຄົນ, ຍິງ 7 ຄົນ ແລະລົງເຮັດບົດບັນທຶກໃນຮ້ານກິນດື່ມໄດ້ 5 ຮ້ານ. ວັນທີ 24 ເມສາ 2021 ໄດ້ລົງສົມທົບກັບພາກ ສ່ວນທີ່ກ່ຽວຂ້ອງ ຕັ້ງດ່ານກວດກາຄົນເຂົ້າເມືອງໄດ້ 34 ຄົນ, ຍິງ 13 ຄົນ ແລະ ກວດພົບໃນນັ້ນນັກສຶກສາມາແຕ່ແຂວງສະຫວັນນະເຂດ ຈໍານວນ 2 ຄົນ,ວັນທີ 25 ເມສາ 2021: ໄດ້ຕັ້ງດ່ານກວດກາຄົນເຂົ້າເມືອງທັງໝົດມີ 88 ຄົນ ຍິງ 27 ຄົນ, ເດີນທາງອອກເມືອງແມ່ນ 71 ຄົນ ຍິງ 20 ຄົນ ແລະມີປະຊາຊົນບ້ານອຸດົມສຸກ ໄດ້ເຂົ້າກັກໂຕຢູ່ສູນຈໍານວນ 4 ຄົນ, ຍິງ 3 ຄົນ, ວັນທີ 26 ເມສາ 2021 ຈໍານວນຄົນເຂົ້າ ແມ່ນ 80 ຄົນ, ຍິງ 18 ແລະອອກເມືອງແມ່ນ 37 ຄົນ, ຍິງ 17 ຄົນ.

  ໃນກອງປະຊຸມຍັງໄດ້ມີການແລກປ່ຽນບົດຮຽນກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດໜ້າທີ່ວຽກງານຕ້ານ ແລະ ສະກັດກັ້ນພະຍາດໂຄວິດ-19 ແລະມີຄໍາເຫັນແລກປ່ຽນຕໍ່ກັບບັນຫາດັ່ງກ່າວໃນນັ້ນ ທ່ານນາງ ບົວກາ ແກ້ວມະນີ ຍັງໄດ້ເນັ້ນໜັກ ແລະອະທິບາຍຄວາມກະຈ່າງແຈ້ງຕື່ມຊຶ່ງທ່ານຍັງໄດ້ຍົກໃຫ້ເຫັນເຖິງຄວາມພ້ອມໃນການຮັບມືຕໍ່ກັບປາກົດການດັ່ງກ່າວ ແລະຕອນທ້າຍຍັງໄດ້ມີການມອບອຸປະກອນປ້ອງກັນພະຍາດໂຄວິດ-19 ເປັນຕົ້ນແມ່ນຜ້າອັດປາກຈຳນວນ 30 ກັບ ມູນຄ່າ 7,5 ແສນກີບ ເຈວລ້າງມືຈໍານວນ 10 ກວດ ມູນຄ່າ 2,5 ແສນກີບ ແລະເງິນສົດ 5 ລ້ານກີບ.

ຂ່າວ: ນາກາຍ

แชร์