ຍອດສະສົມລາວຕິດໂຄວິດ 966 ຄົນ ຂະນະທີ່ 73,1 ພັນຄົນສັກວັກແຊງແລ້ວ

  ຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ໄດ້ຖະແຫຼງຕໍ່ສື່ມວນຊົນປະຈຳວັນຈັນ ວັນທີ 3 ພຶດສະພາ ປີ 2021 ນີ້ວ່າສະພາບການລະບາດຂອງພະຍາດ COVID-19 ຢູ່ໃນໂລກ, ຮອດປະຈຸບັນທົ່ວໂລກມີການລາຍງານການຕົວເລກຜູ້ຕິດເຊື້ອສະສົມທັງໝົດ 153,4 ລ້ານຄົນ, ເສຍຊິວິດສະສົມ 3,2 ລ້ານຄົນ ແລະປີ່ນປົວຫາຍດີ 131,4 ລ້ານຄົນ; ປະເທດອາເມລິກາຍັງເປັນອັນດັບໜຶ່ງຜູ້ຕິດເຊື້ອສະສົມເກືອບ 33 ລ້ານກວ່າຄົນ ແລະເສຍຊີວິດສະສົມຫຼາຍກວ່າ 5,9 ແສນຄົນ; ອັນດັບສອງແມ່ນປະເທດອິນເດຍມີຜູ້ຕິດເຊື້ອສະສົມເກືອບ 19 ລ້ານກວ່າຄົນ ແລະເສຍຊີວິດສະສົມ 2,1 ແສນຄົນ.

   ສຳລັບ ສປປ ລາວ ມາຮອດປະຈຸບັນມີລາຍງານຜູ້ຕິດເຊື້ອທັງໝົດ 966 ຄົນ ( ໃໝ່ 33) ບໍ່ມີຜູ້ເສຍຊີວິດ, ໃນຈຳນວນຜູ້ຕິດເຊື້ອທັງໝົດແມ່ນໄດ້ຮັບການປິ່ນປົວຫາຍດີ 60 ຄົນ, ຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ໃນແຕ່ລະແຂວງຈຳນວນ 907 ຄົນ ເຊັ່ນ:

  • - ນະຄອນຫຼວງວຽງຈັນ 599 ຄົນ (ໃໝ່ 16)
  • - ແຂວງຈຳປາສັກ 121 ຄົນ (ໃໝ່ 4) ສຳລັບຄົນເຈັບແຂວງເຊກອງແມ່ນນອນປິ່ນປົວຢູ່ແຂວງຈຳປາສັກ
  • - ແຂວງບໍ່ແກ້ວ 98 ຄົນ (ໃໝ່ 7)
  • - ແຂວງສະຫວັນນະເຂດ 31 ຄົນ (ໃໝ່ 3)
  • - ແຂວງຫຼວງພະບາງ 13 ຄົນ
  • - ແຂວງວຽງຈັນ 13 ຄົນ
  • - ແຂວງສາລະວັນ 7 ຄົນ - ແຂວງຫຼວງນໍ້າທາ 6 ຄົນ
  • - ແຂວງອຸດົມໄຊ 8 ຄົນ (ໃໝ່ 3)
  • - ແຂວງຜົ້ງສາລີ 3 ຄົນ
  • - ແຂວງໄຊຍະບູລີ 3 ຄົນ
  • - ແຂວງບໍລິຄຳໄຊ 3 ຄົນ
  • - ແຂວງຄຳມ່ວນ 1 ຄົນ
  • - ແຂວງຊຽງຂວາງ 1 ຄົນ

       ຄົນເຈັບທຸກຄົນແມ່ນມີສຸຂະພາບຮ່າງກາຍ ແລະສຸຂະພາບຈິດສົມບຸນປົກກະຕິ ແລະທຸກຄົນແຂງແຮງດີ.

       ຢ່າງໃດກໍຕາມມາຮອດວັນທີ 1 ພຶດສະພາ 2021 ຕົວເລກຜູ້ທີ່ໄດ້ຮັບການສັກຢາວັກແຊງທົ່ວປະເທດລວມແລ້ວທັງໝົດ 73,1 ພັນຄົນ ແລະຈະເລັ່ງສືບຕໍ່ສັກໃຫ້ຕາມແຜນການທີ່ລັດຖະບານໄດ້ວາງເອົາໄວ້.

แชร์