ປົດຕຳແໜ່ງນາຍບ້ານໂພນສິມ ຫຼັງຈັດບຸນບັ້ງໄຟຊ້ວງໂຄວິດລະບາດ

  ທ່ານ ແຖ່ນແກ້ວ ພົມບິດາ ຮອງເຈົ້ານະຄອນໄກສອນ ພົມວິຫານ ຄະນະສະເພາະກິດປ້ອງກັນສະກັດກັ້ນຄວບຄຸມ ແລະແກ້ໄຂພະຍາດໂຄວິດ-19 ຂັ້ນ ແຂວງທັງເປັນປະທານຄະນະສະເພາະກິດປ້ອງກັນສະກັດກັ້ນຄວບຄຸມ ແລະແກ້ໄຂພະຍາດໂຄວິດ-19 ນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ລາຍງານຫຍໍ້ກ່ຽວກັບເຫດການບຸນບັ້ງໄຟຢູ່ບ້ານໂພນສິມໃນຄັ້ງວັນທີ 2 ພຶດສະພາ 2021 ໃຫ້ຮູ້ວ່າ:

   ການຈັດງານບຸນບັ້ງໄຟທີ່ບ້ານໂພນສິມ ນະຄອນໄກສອນ ພົມວິຫານ ແມ່ນອໍານາດການປົກຄອງບ້ານເຖົ້າແກ່ແນວໂຮມໄດ້ມີການກະກຽມຫ້າງຫາມາແຕ່ຕອນເຊົ້າຂອງວັນທີ 2 ພຶດສະພາ 2021 ມາເຖິງເວລາປະມານ 12 ໂມງ ໄດ້ມີການເຕົ້າໂຮມກັນຈຸດປະສົງແມ່ນຈະຈັດແບບກະທັດຮັດຕາມຮີດຕາມຄອງແຕ່ເມື່ອມີການເຕົ້າ ໂຮມກັນຈິ່ງໄດ້ມີປະຊາຊົນໃນບ້ານແຮ່ກັນມາເຕົ້າໂຮມກັນຫຼາຍຂຶ້ນ ແລະໄດ້ມີການແຮ່ອ້ອມສິມວັດໂພນສິມໜຶ່ງຮອບມີການດື່ມເຫຼົ້າເບຍ, ຫຼິ້ນນໍ້າເປື້ອນນໍ້າມັນ ແລະເສບແຫ່ຕາມຮີດຄອງປະເພນີທີ່ເຄີຍປະຕິບັດຜ່ານມາ, ຊຶ່ງມີຜູ້ເຂົ້າຮ່ວມປະມານ 200 ກວ່າຄົນ ( ມີແຕ່ປະຊາຊົນພາຍໃນບ້ານເພາະທາງບ້ານໄດ້ປິດບ້ານບໍ່ໃຫ້ຜູ້ອື່ນເຂົ້າໄປຮ່ວມນໍາ). 

   ມາຮອດເວລາປະມານ 14 ໂມງ ທາງຄະນະນໍານະຄອນໄດ້ເຫັນເຫດການດັ່ງກ່າວໃນສື່ສັງຄົມອອນລາຍຈິ່ງໄດ້ຊີ້ນໍາໃຫ້ຄະນະສະເພາະກິດນະຄອນໄກສອນລົງກວດກາ ແລະສະຫຼາຍການຈັດງານດັ່ງກ່າວ, ເວລາ 15:30 ໂມງ ຄະນະປົກຄອງນະຄອນກໍ່ໄດ້ເອີ້ນຄະນະປົກຄອງບ້ານພ້ອມເຖົ້າແກ່ແນວໂຮມມາປະຊຸມກັນຢູ່ຫ້ອງການປົກຄອງບ້ານໂພນສິມ, ມີເຈົ້ານະຄອນ, ຮອງເຈົ້ານະຄອນ, ຜູ້ຊີ້ນໍາກຸ່ມບ້ານ, ຫົວໜ້າ ປກສ ແຂວງຕາງໜ້າຄະນະສະເພາະກິດແຂວງພ້ອມດ້ວຍນາຍບ້ານ, ຮອງນາຍບ້ານ, ເຖົ້າແກ່ແນວໂຮມບ້ານເຂົ້າຮ່ວມ, ໃນກອງປະຊຸມໄດ້ຮັບຟັງການລາຍງານຂອງນາຍບ້ານ ແລະຄະນະປົກຄອງບ້ານ,ແນວໂຮມບ້ານກ່ຽວກັບການຈັດງານບຸນບັ້ງໄຟຂອງບ້ານໂພນສິມຄັ້ງນີ້ອໍານາດການປົກຄອງກໍ່ເປັນເອກະພາບກັນວ່າການຈັດງານບຸນບັ້ງໄຟດັ້ງນີ້ແມ່ນການລັກເຮັດ ແລະເປັນການລະເມີດຕໍ່ຄໍາສັ່ງຂອງຂັ້ນເທິງ ແລະບໍ່ໄດ້ຮັບອະນຸຍາດຈາກເຈົ້ານະຄອນໄກສອນ ແຕ່ຢ່າງໃດ ແລະຜ່ານມາກໍໄດ້ຮັບຮູ້ວ່າການຂໍສະເໜີຈັດງານນັ້ນແມ່ນໄດ້ຖືກລົບລ້າງໄປໃນໂຕແລ້ວເພາະໄດ້ມີຄໍາສັ່ງຂອງທ່ານນາຍົກລັດຖະມົນຕີ ເລກທີ 15/ນຍ, ລົງວັນທີ 27 ເມສາ 2021, ຄໍາສັ່ງເພີ່ມເຕີມຂອງທ່ານເຈົ້າແຂວງ ເລກທີ 0776/ຈຂ.ສຂ, ລົງວັນທີ 24 ເມສາ 2021 ວ່າດ້ວຍການເຫັນດີໃຫ້ປິດແຂວງ ແລະຄໍາສັ່ງຂອງເຈົ້ານະຄອນໄກສອນ ພົມວິຫານ ເລກທີ 21/ ຈນ,ກສ,ລົງວັນທີ 25 ເມສາ 2021 ວ່າດ້ວຍການເຫັນດີຜິດນະຄອນໃນຂໍ້ 6 ຊຶ່ງ ຫ້າມບໍ່ໃຫ້ມີການຈັດກອງປະຊຸມ, ການໂຮມຊຸມນຸມ, ງານດອງ, ງານບຸນປະເພນີ, ງານທາງສາສະຫນາ,ງານລ້ຽງສ້າງສັນຕ່າງໆເປັນອັນລະອຽດຈະແຈ້ງແລ້ວ.

   ຕໍ່ກັບການລະເມີດລະບຽບການ, ຄໍາສັ່ງ, ຄໍາແນະນໍາຂັ້ນເທິງຂອງອໍານາດການປົກຄອງບ້ານໃນຄັ້ງນີ້ຄະນະພັກຄະນະປົກຄອງນະຄອນໄກສອນ ພົມວິຫານ ແມ່ນໄດ້ປະຊຸມຄົ້ນຄວ້າ ແລະ ເປັນເອກະພາບກັນປະຕິບັດວິໄນຕໍ່ຄະນະພັກຄະນະປົກຄອງບ້ານຕາມລະບຽບການຢ່າງເຂັ້ມງວດຄືໄດ້ປົດຕໍາແໜ່ງຜູ້ເປັນເລຂາຄະນະພັກຮາກ ຖານ, ເລຂາໜ່ວຍພັກທັງເປັນນາຍບ້ານໆໂພນສິມແລ້ວ ແລະຈະດໍາເນີນການປະຕິບັດລະບຽບຕໍ່ຜູ້ມີສ່ວນຮ່ວມໃນການລະເມີດຄັ້ງນີ້ຕໍ່ໄປຕາມການຕົກລົງເຫັນດີຂອງຄະນະພັກຄະນະປົກຄອງນະຄອນໄກສອນ ພົມວິຫານ.

    ສໍາລັບການປ້ອງກັນຄວບຄຸມສະກັດກັ້ນ ແລະແກ້ໄຂການແຜ່ລະບາດຂອງພະຍາດໂຄວິດແມ່ນໄດ້ສັ່ງປິດການເຂົ້າອອກບ້ານໂພນສິມແຕ່ຕອນແລງຂອງ 2 ເມສາ 2021 ເປັນຕົ້ນມາບໍ່ໃຫ້ຄົນໃນອອກບ້ານ ແລະບໍ່ໃຫ້ຄົນນອກເຂົ້າໃນບ້ານເປັນເວລາ 14 ວັນ ແລະ ໃຫ້ພະນັກງານແພດໝໍໃນໂຮງໝໍນ້ອຍຂອງບ້ານຕິດຕາມເບິ່ງອາການຂອງປະຊາຊົນຖ້າມີອາການຜິດປົກກະຕິໃຫ້ກວດກາພະຍາດ ແລະກວດຫາເຊື້ອຕໍ່ໄປ.

แชร์