ເອດີບີ ຄາດວ່າເສດຖະກິດລາວຈະຟື້ນໂຕຜ່າໂຄວິດ 4%

   ທະນາຄານພັດທະນາອາຊີ ຫຼື ADB ຄາດຄະເນເສດຖະກິດຂອງ ສປປ ລາວ ຄາດວ່າຈະຂະຫຍາຍໂຕໃນລະດັບ 4% ໃນປີ 2021 ແລະ 4,5% ໃນປີ 2022, ຊຶ່ງໄດ້ຮັບການສະໜັບສະໜູນຈາກການຜະລິດກະສິກຳທີ່ດີຂຶ້ນ ແລະການຜະລິດກະແສໄຟຟ້າທີ່ໜັ້ນທ່ຽງຊຶ່ງຈະທົດແທນການຟື້ນໂຕຊ້າຂອງຂະແໜງການບໍລິການທ່າມກາງສະພາບການລະບາດພະຍາດໂຄວິດ-19 ຂະນະທີ່ປີແລ້ວເສດຖະກິດລາວຫົດໂຕ 0,5% ຖ້າທຽບໃສ່ອັດຕາການຂະຫຍາຍໂຕທີ່ 4,7% ໃນປີ 2019. 

   ທ່ານ ນາງ ໂຊໂນມິ ທະນາກະ, ຜູ້ຕາງໜ້າ ADB ປະຈຳ ສປປ ລາວ ເປີດເຜີຍໃຫ້ຮູ້ເມື່ອວັນທີ 28 ເມສາ 2021 ນີ້ວ່າ “ການຂະຫຍາຍໂຕທາງເສດຖະກິດແມ່ນພວມໄດ້ຮັບແຮງເພີ່ມຂຶ້ນໃນ ສປປ ລາວ, ແຕ່ວ່າການລະບາດຮອບໃໝ່ຂອງພະຍາດໂຄວິດ-19, ພ້ອມດ້ວຍສິ່ງທ້າທາຍທາງດ້ານໂຄງສ້າງຈະເປັນໄພຂົ່ມຂູ່ຕໍ່ການຟື້ນຟູເສດຖະກິດຂອງປະເທດ,”

  ທ່ານໃຫ້ຮູ້ຕື່ມອີກວ່າ “ເລັ່ງການສັກວັກແຊງໂດຍໄວ, ໄປພ້ອມໆກັນກັບມາດຕະການທີ່ຈະເສີມສ້າງຄວາມເຂັ້ມແຂງໃນການບໍລິຫານຄຸ້ມຄອງເສດຖະກິດມະຫາພາກ ແລະພ້ອມທັງຍົກລະດັບຄວາມເຊື່ອໝັ້ນຂອງນັກລົງທຶນແມ່ນມີຄວາມຈຳເປັນເພື່ອສະໜັບສະໜູນການຟື້ນຟູເສດຖະກິດ ແລະປົກປ້ອງສະຫວັດດີພາບຂອງຄົວເຮືອນ.”

  ມາດຕະການທີ່ເຂັ້ມງວດຕໍ່ນັກທ່ອງທ່ຽວໃນປີ 2020 ປ້ອງກັນບໍ່ໃຫ້ເກີດວິກິດການທາງດ້ານສາທາລະນະສຸກຂະໜາດໃຫຍ່ໃນ ສປປ ລາວ ແຕ່ວ່າການຫຼຸດລົງຂອງຄວາມຕ້ອງການໃນການບໍລິໂພກພາຍໃນ ແລະຕ່າງປະເທດພາໃຫເກີດມີການວ່າງງານທີ່ເພີ່ມຂຶ້ນ, ການເງິນພາກລັດແມ່ນໄດ້ຮັບຜົນກະທົບໜັກໄປພ້ອມກັນກັບການຫຼຸດອັນດັບຄວາມໜ້າເຊື່ອຖືຂອງລັດຖະບານແຫ່ງ ສປປ ລາວ ລົງຈາກບັນດາອົງການຈັດລຳດັບເນື່ອງຈາກຄວາມກົດດັນດ້ານສະພາບຄ່ອງຈາກພາຍນອກທີ່ເພີ່ມຂຶ້ນທ່າມກາງທາງເລືອກໃນການກູ້ຢືມເພື່ອຊຳລະໜີ້ທີ່ມີຢູ່ຈຳກັດ. 

   ຄາດວ່າຂະແໜງກະສິກຳຈະຟື້ນໂຕໃນລະດັບປານກາງໃນປີນີ້, ສ່ວນໃຫຍ່ແມ່ນຍ້ອນການຄ້າຂາຍສັດລ້ຽງ, ແຕ່ການປູກພືດເປັນສະບຽງອາຫານອາດຊັກຊ້າຍ້ອນສະ ພາບອາກາດເຢັນຂຶ້ນ ແລະການຂາດແຄນນໍ້າ, ການຂະຫຍາຍໂຕຂອງຂະແໜງອຸດສາຫະກຳຈະໄດ້ຮັບການຊຸກຍູ້ຈາກການຜະລິດກະແສໄຟຟ້າທີ່ເພີ່ມຂຶ້ນ, ສືບຕໍ່ການລົງທຶນເຂົ້າໃນພື້ນຖານໂຄງລ່າງຂະໜາດໃຫຍ່, ບໍ່ແຮ່ ແລະອະສັງຫາລິມະຊັບໃນຕົວເມືອງຄາດວ່າຈະເພີ້ມຂຶ້ນໃນປີ 2021 ແລະ2022 ທີ່ຈະຊ່ວຍການສ້າງວຽກເຮັດງານທຳ ແລະສະໜັບສະໜູນກຳລັງຊື້ຂອງຄົວເຮືອນ, ການຂະຫຍາຍໂຕຂອງຂະແໜງບໍລິການໃນປີ 2021 ຈະໄດ້ຮັບການສະໜັບສະໜູນຈາກການຟື້ນໂຕຂອງການຊົມໃຊ້ພາຍໃນປະເທດຈາກການສຳເລັດຂອງການລົງທຶນດ້ານພື້ນຖານໂຄງລ່າງທີເປັນຍຸດທະສາດເຊັ່ນ: ທາງດ່ວນວຽງຈັນ-ວັງວຽງ ຊຶ່ງຈະຊ່ວຍຊຸກຍູ້ອຸດສາຫະກຳ ການບໍລິການພາຍໃນປະເທດ, ຄາດວ່າການທ່ອງທ່ຽວຈາກຕ່າງປະເທດເພື່ອທຸລະກິດ ແລະການພັກຜ່ອນຈະກັບຄືນສູ່ ສະພາບປົກກະຕິໃນປີ 2022, ໂຕຂັບເຄື່ອນການຟື້ນໂຕຂອງເສດຖະກິດໃນໄລຍະກາງຄາດວ່າຈະແມ່ນການຂາຍສົ່ງ ແລະຂາຍຍ່ອຍ, ການຂົນສົ່ງ ແລະການສື່ສານ.

  ການເພີ່ມຂຶ້ນຂອງລາຄາອາຫານຍ້ອນພະຍາດ ແລະໄພພິບັດທາງທຳມະຊາດໄດ້ເຮັດໃຫ້ອັດຕາເງິນເຟີ້ຂອງ ສປປ ລາວ ຖີບໂຕສູງຂຶ້ນເປັນ 5,1% ໃນ ປີ 2020,ອັດ ຕາເງິນເຟີ້ຈະຫຼຸດລົງຢູ່ທີ່ 4,5% ໃນປີ 2021, ກ່ອນທີ່ຈະເພີ່ມຂຶ້ນທີ່ 5% ໃນປີ 2022, ຍ້ອນຄວາມກົດດັນຈາກລາຄາສິນຄ້ານຳເຂົ້າທີ່ໄດ້ຮັບຜົນກະທົບຈາກການຫຼຸດລົງຂອງຄ່າເງິນກີບແຕ່ໄດ້ຮັບການຊົດເຊີຍບາງສ່ວນຈາກການເພີ່ມຂຶ້ນຂອງການຜະລິດພາຍໃນປະເທດ.

  ບັນດາຂໍ້ຫຍຸ້ງຍາກທີ່ມີຢູ່ໃນການລະດົມທຶນພາຍໃນປະເທດ, ຊຶ່ງພົວພັນກັບສິ່ງທ້າທາຍດ້ານໂຄງສ້າງ ແລະທຳມາພິບານທີ່ອ່ອນແອ, ກຳລັງທະວີຄວາມຮຸນແຮງຂຶ້ນກວ່າເກົ່າຈາກການແຜ່ລະບາດພະຍາດໂຄວິດ-19, ການຂາດດູນງົບປະມານຂອງປະເທດຍັງມີແນວໂນມທີ່ສູງຢູ່ໃນໄລຍະເວລາອັນໃກ້ນີ້, ໂຄງສ້າງເສດຖະກິດມະຫາພາກຂອງ ສປປ ລາວ ຍັງມີຄວາມສ່ຽງສູງຢູ່, ເນື່ອງຈາກປະສົບບັນຫາຈາກຄວາມກົດດັນໃນການຊຳໜີ້ສິນທີ່ເພີ່ມຂຶ້ນ ແລະ ອັດຕາການກູ້ຢືມເພື່ອມາຊຳລະໜີ້ທີ່ມີທ່າອ່ຽງສູງຂຶ້ນ,ຈຳເປັນຕ້ອງສ້າງພື້ນທີ່ໃຫ້ແກ່ງົບປະມານເພື່ອຮອງຮັບການຂະຫຍາຍໂຕຫຼາຍຂຶ້ນ, ການປະຕິຮູບເພື່ອການຄຸ້ມຄອງ ແລະຄວາມໂປ່ງໃສດ້ານໜີ້ສາທາລະນະຫຼາຍຂຶ້ນແມ່ນມີຄວາມຈຳເປັນ.

แชร์