ໄຊຍະ ກໍ່ສ້າງຕໍ່ເຕີມຫ້ອງວິເຄາະໂຄວິດ

  ພິທີເຊັນສັນຍາໂຄງການກໍ່ສ້າງສ້ອມແປງ-ຕໍ່ເຕີມຫ້ອງວິເຄາະວັນນະໂລກ ແລະໂຄວິດ-19 ລະຫວ່າງພະແນກສາທາລະນະສຸກແຂວງໄຊຍະບູລີ ແລະບໍລິສັດດວງຈັນຮຸ່ງເຮືອງ ຈໍາກັດຜູ້ດຽວ ໄດ້ຈັດຂຶ້ນໃນວັນທີ 23 ເມສາ 2021 ທີ່ຫ້ອງປະຊຸມພະແນກສາທາລະນະສຸກແຂວງເຂົ້າຮ່ວມມີ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ທ່ານ ດຣ ນາງ ໄກຍະສອນ ສີດາ ຫົວໜ້າພະແນກສາທາລະນະສຸກແຂວງ, ທ່ານ ດວງສະໝອນ ບົວມະນີຈັນ ອໍານວຍການບໍລິສັດ ດວງຈັນຮຸ່ງເຮືອງ ຈໍາກັດ ຜູ້ດຽວ, ມີຫົວໜ້າ, ຮອງຫົວໜ້າຂະແໜງການ, ອໍານວຍການໂຮງໝໍແຂວງ ແລະພະນັກງານວິຊາການແພດໝໍເຂົ້າຮ່ວມເປັນສັກຂີພິຍານ.

  ທ່ານ ດວງສະໝອນ ບົວມະນີຈັນ ອໍານວຍການບໍລິສັດ ດວງຈັນຮຸ່ງເຮືອງ ຈໍາກັດຜູ້ດຽວ ໃຫ້ຮູ້ວ່າ: ໂຄງການກໍ່ສ້າງສ້ອມແປງ-ຕໍ່ເຕີມຫ້ອງວິເຄາະວັນນະໂລກ ແລະໂຄວິດ-19 ແຂວງໄຊຍະບູລີ ຕັ້ງຢູ່ບ້ານນາເລົາ ເມືອງໄຊຍະບູລີ ແຂວງໄຊຍະບູລີ ໂດຍແມ່ນພະແນກສາທາລະນະສຸກແຂວງໃນນາມເຈົ້າຂອງໂຄງການເປັນຜູ້ວ່າຈ້າງ ບໍລິສັດ ດວງຈັນຮຸ່ງເຮືອງ ຈໍາກັດຜູ້ດຽວ ເປັນຜູ້ຮັບເໝົາກໍ່ສ້າງ. ໜ້າວຽກຂອງໂຄງການທີ່ທາງເຈົ້າຂອງໂຄງການໄດ້ຮັບຮອງຢ່າງເປັນທາງການມີ: ຮື້ຖອນຫຼັງຄາດ້ານທີ່ຈະຕໍ່ເຕີມ, ວຽກດິນ, ວຽກເບຕົງ, ວຽກກໍ່, ໂບກ, ຕິດຫຼ່ຽມ ແລະຕິດບົວ, ວຽກຫຼັງຄາ ແລະເພດານ, ວຽກຕິດກະໂລ່, ວຽກຕິດຕັ້ງປະຕູ ແລະປ່ອງຢ້ຽມ, ວຽກໄຟຟ້າ ແລະວຽກສີລວມມູນຄ່າຂອງວຽກໂຄງການທັງໝົດຈໍານວນ 283,9 ລ້ານກີບ.

  ໃນການເຊັນສັນຍາຄັ້ງນີ້ຜູ້ຮັບເໝົາໂຄງການຕ້ອງປະຕິບັດຕາມໃບສັ່ງວຽກນັບແຕ່ວັນທີ 26 ເມສາ 2021 ເຖິງວັນທີ 26 ມິຖຸນາ 2021 (ກໍານົດ 2 ເດືອນ) ໃຫ້ສໍາເລັດ 100%, ດໍາເນີນການກໍ່ສ້າງ ແລະຕໍ່ເຕີມໂຄງການພາຍຫຼັງທີ່ໄດ້ເຊັນສັນຍາພ້ອມໃບສັ່ງວຽກ, ບໍລິສັດຜູ້ຮັບເໝົາກໍ່ສ້າງບໍ່ມີສິດມອບ-ໂອນຫຼືຂາຍ ໂຄງການດັ່ງກ່າວໃຫ້ບໍລິສັດອື່ນ, ບຸກຄົນອື່ນມາດໍາເນີນກິດຈະການແທນ, ສະໜອງວັດສະດຸກໍ່ສ້າງໃຫ້ພຽງພໍ ແລະຖືກກັບມາດຖານເຕັກນິກຕາມປະລັງເດີວີຄິດໄລ່ທີ່ໄດ້ກໍານົດໄວ້ໃນສັນຍາ, ຮັບປະກັນໃນການປະກອບນາຍຊ່າງ ແລະວິຊາການທີ່ໄດ້ມາດຖານໃນເວລາການກໍ່ສ້າງໃຫ້ພຽງພໍກັບໜ້າວຽກ ແລະຮັບປະກັນຕາມກໍານົດເວລາ, ບໍລິສັດຕ້ອງສ້າງແຜນວຽກເຄື່ອນໄຫວເປັນແຕ່ລະໄລຍະໂດຍແຈ້ງໃຫ້ເຈົ້າຂອງໂຄງການ ແລະວິຊາການປະຈໍາສະໜາມຮັບຊາບຢ່າງເປັນປົກກະຕິ, ພາຍຫຼັງການກໍ່ສ້າງສໍາເລັດ 100% ແລ້ວບໍລິສັດຜູ້ຮັບເໝົາຕ້ອງນໍາສະເໜີເປັນລາຍລັກອັກສອນເຖິງເຈົ້າຂອງໂຄງການກ່ອນ 10 ວັນ ເພື່ອກວດກາ ແລະ ກະກຽມມອບ-ຮັບໂຄງການຂອງເຈົ້າຂອງໂຄງການນໍາໃຊ້ຢ່າງເປັນທາງ ການ ແລະຕ້ອງຮັບປະກັນຄວາມປອດ ໄພໃນເວລາດໍາເນີນການກໍ່ສ້າງ. ຝ່າຍເຈົ້າ ຂອງໂຄງການ ແມ່ນມີສິດສັ່ງປ່ຽນຖ່າຍວັດສະດຸ, ອຸປະກອນການກໍ່ສ້າງຖ້າຫາກເຫັນວ່າບໍ່ຖືກຕາມຕິກນິກ (ເດີວີ), ມີສິດສັ່ງໂຈະ ຫຼືຍົກເລິກໂຄງການເມື່ອເຫັນວ່າຝ່າຍ (ຂ) ບໍ່ປະຕິບັດຕາມສັນຍາ, ມີໜ້າທີ່ຄຸ້ມຄອງ-ກວດກາການກໍ່ສ້າງແຕ່ລະໜ້າວຽກໃຫ້ຖືກຕ້ອງຕາມເດີວີທີ່ໄດ້ກໍານົດໄວ້, ມີໜ້າທີ່ກວດກາ ແລະຕິດຕາມການກໍ່ສ້າງໃຫ້ເປັນປົກກະຕິແຕ່ລະໄລຍະແລ້ວລາຍງານໃຫ້ຂັ້ນເຖິງຊາບເປັນແຕ່ລະໄລຍະ. 

  ຈາກນັ້ນ ທ່ານ ດຣ ນາງ ໄກຍະສອນ ສີດາ ຫົວໜ້າພະແນກສາທາລະນະສຸກແຂວງ ແລະ ທ່ານ ດວງສະໝອນ ບົວມະນີຈັນ ອໍານວຍການບໍລິສັດ ດວງຈັນຮຸ່ງເຮືອງ ຈໍາກັດຜູ້ດຽວ ໄດ້ລົງນາມເຊັນບົດບັນທຶກຮ່ວມກັນຢ່າງເປັນທາງການໂດຍຊ່ອງໜ້າບັນດາທ່ານທີ່ເຂົ້າຮ່ວມເປັນສັກຂີພິຍານ.

แชร์