2 ພາກສ່ວນມອບເຄື່ອງຊ່ວຍຫຼວງພະບາງຕ້ານໂຄວິດ

 ຕາງໜ້າສອງຫົວໜ່ວຍທຸລະກິດແຂວງຫຼວງພະບາງໄດ້ນໍາເຄື່ອງຊ່ວຍເຫຼືອມູນຄ່າ 110 ລ້ານກີບ ມາມອບໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງເພື່ອນໍາໃຊ້ອໍານວຍຄວາມສະດວກໃນການປະຕິບັດວຽກງານຂອງເຈົ້າໜ້າທີ່ສະເພາະກິດຂັ້ນແຂວງ, ເມືອງ, ນະຄອນ.

  ສໍາລັບເຄື່ອງຊ່ວຍເຫຼືອທີ່ນໍາມາມອບໃນວັນທີ 26 ເມສາ 2021 ນີ້ທີ່ສູນປະຕິບັດການພະແນກສາທາລະນະສຸກແຂວງ. ມີບໍລິສັດ DSK ຈຳກັດ ໄດ້ມອບນໍ້າດຶ່ມ ມູນຄ່າ 25 ລ້ານກີບ ແລະເງິນສົດ 25 ລ້ານ, ລວມມູນຄ່າທັງໝົດ 50 ລ້ານກີບ ແລະໂຮງງານຊີມັງນໍ້າຖ້ວມ ເມືອງນໍ້າບາກ ແຂວງຫຼວງພະບາງ ໄດ້ນຳເອົາຜ້າອັດປາກ ແລະເຈວລ້າງມືມູນຄ່າ 60 ລ້ານກີບ. ພ້ອມນີ້ ບໍລິສັດ ຢູນິເທວ ໄດ້ນໍາເອົາໂທລະສັບຈໍານວນ 4 ເຄື່ອງ ມາມອບໃຫ້ຄະນະສະເພາະກິດຄວບຄຸມໂຄວິດ-19.

  ເປັນກຽດກ່າວຮັບຂອງທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງທັງເປັນຫົວໜ້າຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ມີຫົວໜ້າພະແນກສາທາລະນະສຸກແຂວງພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

   ເຊິ່ງອຸປະກອນດັ່ງກ່າວແມ່ນຈະໄດ້ນຳໄປແຈກຢາຍໃຫ້ຜູ້ທີ່ເຮັດວຽກສະເພາະກິດຢູ່ຕາມຈຸດຕ່າງພາຍໃນແຂວງຫຼວງພະບາງໂດຍສະເພາະແມ່ນນະຄອນຫຼວງພະບາງໃຫ້ທົ່ວເຖິງ ແລະຖ້າຫາກບັນດາຫົວໜ່ວຍທຸລະກິດ, ຫ້າງຮ້ານ,ບຸກຄົນໃດຢາກປະກອບສ່ວນຊ່ວຍເຫຼືອກໍສາມາດເຂົ້າໄປບໍລິຈາກໄດ້ທີ່ສູນປະຕິບັດການພະແນກສາທາລະ ນະສຸກແຂວງໄດ້ຕະຫຼອດ 24 ຊົ່ວໂມງ.

ຂ່າວ: ສີສຸວັນ

แชร์