ພົບແລ້ວ ຊາກເຮືອດຳນໍ້າຂອງອິນໂດເນເຊຍທະຫານຢູ່ໃນເຮືອເສຍຊີວິດທັງໝົດ

  ສຳນັກຂ່າວຕ່າງປະເທດລາຍງານວ່າ ພົນເອກ ຢູໂດ ມາກາໂນ ຜູ້ບັນຊາການກອງທັບເຮືອຂອງອິນໂດເນເຊຍຖະແຫຼງວ່າ: ພາບຖ່າຍຈາກກ້ອງໃນຫຸ່ນຍົນດຳນໍ້າເລິກ ພົບວ່າເຮືອດຳນໍ້າ Nanggala 402 ໄດ້ແຕກອອກເປັນ 3 ສ່ວນຂະໜາດໃຫຍ່ຈົມຢູ່ໃຕ້ທະເລໃນລະດັບຄວາມເລິກ 838 ແມັດ ຈາກຜິວນໍ້າໂດຍຈຸດເຮືອຈົມຢູ່ຫ່າງໄປທາງທິດໃຕ້ປະມານ 1.500 ແມັດ ຈາກຈຸດພິກັດສຸດທ້າຍທີ່ເຮືອລອຍລຳຢູ່ກ່ອນສູນຫາຍຂະນະເຂົ້າຮ່ວມການຝຶກຊ້ອມທາງຍຸດທະວິທີໃນທະເລທາງທິດເໜືອຂອງເກາະບາຫຼີ ເມື່ອວັນທີ 21 ເມສາ 2021.

  ທ່ານ ພົນເອກ ຮາດີ ທະຍາຢັນໂຕ ຜູ້ບັນຊາການທະຫານສູງສຸດຂອງອິນໂດເນເຊຍກ່າວວ່າ: ພາບຖ່າຍໃຕ້ນໍ້າທີ່ໄດ້ຮັບຢືນຢັນວ່າເຮືອດຳນໍ້ານັງກາລາ 402 ໄດ້ຈົມຢູ່ໃຕ້ທະເລແຕ່ບໍ່ແມ່ນສູນຫາຍຕາມທີ່ໃຫ້ຂ່າວໄປກ່ອນໜ້ານີ້ ແລະທະຫານທີ່ຢູ່ໃນເຮືອຈຳນວນ 53 ຄົນເສຍຊີວິດທັງໝົດ,ຫຸ່ນຍົນດຳນໍ້າເລິກທີ່ພົບຊາກເຮືອນັງກາລາ 402 ຈາກການບັນທຶກພາບເປັນຂອງເຮືອກູ້ໄພທາງທະເລຂອງ MV Swift Rescue ຂອງສິງກະໂປ.

   ສ່ວນເຮືອ KRI ຣີເກີ້ລ ຂອງອິນໂດເນເຊຍຄົ້ນຫາເຮືອດຳນໍ້າ ນັງກາລາ 402 ດ້ວຍການໃຊ້ເຄື່ອງໂຊນານໍ້າເລິກ ແລະວັດແທກຄວາມເຂັ້ມຂຸ້ນສະໜາມແມ່ເຫຼັກ (magnetometer).

 ຈົນເຖິງຂະນະນີ້ທາງການອິນໂດເນເຊຍຍັງບໍ່ຮູ້ສາເຫດທີ່ຊັດເຈນທີ່ເຮັດໃຫ້ເຮືອດຳນໍ້າລຳດັ່ງກ່າວຈົມລົງໃຕ້ທະເລ, ໂດຍກ່ອນໜ້ານີ້ກອງທັບເຮືອອິນໂດເນເຊຍສັນນິຖານວ່າອາດເກີດລະບົບໄຟຟ້າຂັດຂ້ອງພາຍໃນເຮືອເຮັດໃຫ້ເຮືອບໍ່ສາມາດລອຍລຳສູ່ຜິວນໍ້າໄດ້.

แชร์