ຕົ້ນເຜິ້ງ ໂຈະເຂົ້າ-ອອກ ດອນກາງຂອງ

  ໂດຍປະຕິບັດຕາມທິດຊີ້ນໍາຂອງຄະນະສະເພາະກິດຂັ້ນເມືອງເພື່ອເພີ່ມທະວີມາດຕະການປ້ອງກັນ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ບໍ່ໃຫ້ເຂົ້າ ມາແຜ່ລະບາດຢູ່ເມືອງຕົ້ນເຜິ້ງກໍ່ຄືແຂວງບໍ່ແກ້ວຕອນແລງວັນທີ 21 ເມສາ 2021 ນີ້ອໍານາດການປົກຄອງ ບ້ານໃຫຍ່ຕົ້ນເຜິ້ງ ສົມທົບກັບຫ້ອງການທີ່ກ່ຽວຂ້ອງຂອງເມືອງໄດ້ລົງຕິດຕາມກວດກາສວນຜັກຂອງພໍ່ແມ່ປະຊາຊົນ ບ້ານໃຫຍ່ ຕົ້ນເຜິ້ງ ຈໍານວນ 12 ຄອບຄົວ ຢູ່ດອນກາງແມ່ນໍ້າຂອງພ້ອມທັງແຈ້ງໃຫ້ພໍ່ແມ່ປະຊາຊົນໄດ້ຮັບຮູ້ ແລະເຂົ້າໃຈ ທົ່ວເຖິງກັນວ່າເລີ່ມແຕ່ວັນທີ 23 ເມສາ 2021 ນີ້ຈະໄດ້ມິການໂຈະຊົ່ວຄາວການ ທຳການຜະລິດ ແລະການເດີນເຮືອເຂົ້າອອກຕາມເຂດດອນກາງແມ່ນໍ້າຂອງໂດຍໃຫ້ນໍາເອົາເຮືອໄປຈອດລວມຢູ່ຕາມຈຸດທີ່ທາງອຳນາດການປົກຄອງບ້ານໄດ້ກຳນົດໃຫ້ ຫຼືເອົາຂຶ້ນຝັ່ງຈົນກວ່າສະພາບການຈະກັບເຂົ້າສູ່ປົກກະຕິສ່ວນປະຊາຊົນຜູ້ທີ່ມີຄວາມຈຳເປັນຕ້ອງເຝົ້າສວນ ແລະສັດລ້ຽງຂອງຕົນແມ່ນຕ້ອງໄດ້ອາໃສຢູ່ເທິງດອນນີ້ກ່ອນຫ້າມອອກຈາກດອນເຂົ້າໃນເມືອງທັງນີ້ກໍ່ເພື່ອເປັນການສະກັດກັ້ນການລັກລອບເຂົ້າເມືອງ ແລະນໍາເຂົ້າສິນຄ້າແບບຜິດກົດໝາຍຕາມແນວຊາຍແດນ.

  ເນື່ອງຈາກປະຈຸບັນສະພາບການແຜ່ລະບາດຂອງພະຍາດໂຄວິດ-19 ຢູ່ ບັນດາປະເທດໃນໂລກພາກພື້ນ ແລະປະເທດເພື່ອນບ້ານໃກ້ຄຽງຍັງການແຜ່ລະບາດເພີ່ມຂຶ້ນຢ່າງຮຸນແຮງ ແລະແຜ່ອອກເປັນວົງກວ້າງໂດຍສະເພາະຢູ່ ສປປ ລາວ ຂອງພວກເຮົາປະຈຸບັນໄດ້ເກີດມີການລະບາດໃນຊຸມຊົນຢູ່ນະຄອນຫຼວງວຽງຈັນທີ່ກວດພົບຜູ້ຕິດເຊື້ອໃໝ່ພາຍໃນມື້ດຽວເຖິງ 26 ກໍລະນີ ທີ່ມີປະຫວັດສຳຜັດໃກ້ຊິດກັບຜູ້ຕິດເຊື້ອທີ 59. 

  ດັ່ງນັ້ນໂດຍປະຕິບັດຕາມທິດຊີ້ນໍາຂອງຄະນະສະເພາະກິດຂັ້ນເມືອງທາງອຳນາດການປົກຄອງບ້ານ ແລະຫ້ອງການທີ່ກ່ຽວຂ້ອງຈຶ່ງຈໍາເປັນຕ້ອງປະຕິບັດມາດຕະການດັ່ງກ່າວເພື່ອປ້ອງກັນໄວ້ແຕ່ຫົວທີບໍ່ໃຫ້ເຊື້ອພະຍາດໂຄວິດ19 ເຂົ້າມາແຜ່ລະບາດຢູ່ໃນເມືອງຕົ້ນເຜິ້ງກໍ່ຄືແຂວງບໍ່ແກ້ວຂອງພວກເຮົາ ແລະ ໃຫ້ພໍ່ແມ່ປະຊາຊົນຜູ້ທີ່ເຮັດສວນຢູ່ເຂດດັ່ງກ່າວເຂົ້າໃຈ, ທຸກຄົນໃນສັງຄົມຈຶ່ງຂໍຮຽກຮ້ອງໃຫ້ບັນດາເຈົ້າຂອງສວນໝົດທຸກຄົນປະຕິບັດຕາມມາດຕະການທີ່ຄະນະສະເພາະກິດຂັ້ນເທິງວາງອອກຢ່າງເຂັ້ມງວດຖ້າຫາກມີການຝ່າຝືນແມ່ນຈະໄດ້ດຳເນີນຕາມລະບຽບກົດໝາຍ.

ຂ່າວ: ອຸໄທ ພູມມາ.  

แชร์