ລັດເລັ່ງສັກວັກແຊງກັນໂຄວິດປະຊາຊົນຕື່ນຕົວເຂົ້າຕໍ່ແຖວ

  ນັບແຕ່ມີການກວດພົບຜູ້ຕິດເຊື້ອໂຄວິດ-19 ຮອບໃໝ່ຈົນຮອດມໍ່ໆມານີ້ໂດຍສະເພາະວັນທີ 21 ເມສາ 2021 ມີຍອດຜູ້ຕິດເຊື້ອຫຼາຍເຖິງ 28 ຄົນ ໃນມື້ດຽວໄດ້ເຮັດມວນຊົນຄົນໃນນະຄອນຫລວງວຽງຈັນຕື່ນຕົວອອກມາສັກຢາວັກແຊງກັນໂຄວິດຢ່າງຫຼວງຫຼາຍຕາມສະຖານທີ່ລັດຈັດກຽມໃຫ້ແຕ່ສິ່ງສຳຄັນໃຫ້ເວັ້ນໄລຍະຫ່າງ ແລະໃສ່ຜ້າອັດປາກທຸກຄົນທັງນີ້ລັດຈະເລັ່ງສັກໃຫ້ໄດ້ 22% ຂອງພົນລະເມືອງພາຍໃນປີນີ້.

  ຈາກສະພາບການລະບາດລັດຖະບານໄດ້ວາງມາດຕະການເລັ່ງສືບຕໍ່ສັກວັກແຊງກັນພະຍາດ COVID-19 ໂດຍສະເພາະກຸ່ມເປົ້າໝາຍບູລິມະສິດ ແລະຂະຫຍາຍໄປທຸກສາຂາອາຊີບ (ພະນັກງານລັດຖະກອນ, ທະຫານ, ຕຳຫຼວດ, ຄູ-ອາຈານ, ພະນັກງານຢູ່ສູນການຄ້າ, ໂຮງແຮມ, ຮ້ານອາຫານ, ພໍ່ຄ້າ-ແມ່ຄ້າຢູ່ຕະຫຼາດ,ສູນການຫຼິ້ນກີລາປະເພດຕ່າງໆໃຫ້ທົ່ວເຖິງຕາມແຜນທີ່ກຳນົດໄວ້.

 ໂດຍລັດຖະບານອຳນວຍຄວາມສະດວກໃຫ້ປະກອບການ ຫຼືບຸກຄົນທີ່ມີຄວາມປະສົງຢາກຊ່ວຍປະກອບສ່ວນຈັດຊື້ຢາວັກແຊງມາສີດໃຫ້ພະນັກງານຂອງບໍລິສັດຕົນເອງຫຼືເປົ້າໝາຍອື່ນໃນສັງຄົມໃຫ້ສະເໜີເຈດຈຳນົງມາຫາຄະນະສະເພາະກິດຕ້ານໂຄວິດ-19 ເພື່ອພິຈາລະນາດ່ວນເພື່ອຈະໄດ້ປຶກສາຫາລືກັນລາຍລະອຽດວ່າຈະຈັດຊື້ເທົ່າ ໃດ, ຍີ່ຫໍ້ໃດ ແລະ ສິດໃຫ້ເປົ້າໝາຍໃດ.

  ສະນັ້ນ,ຈຶ່ງຮຽກຮ້ອງທຸກພາກສ່ວນໃນສັງຄົມຕື່ນຕົວສະໝັກໃຈໃນການສັກວັກແຊງ, ໃນນັ້ນພະນັກງານ-ລັດຖະກອນ,ທະຫານ, ຕຳຫຼວດຕ້ອງເປັນແບບຢ່າງນຳໜ້າເພື່ອປ້ອງກັນຕົນເອງ, ຄອບຄົວ ແລະທົ່ວສັງຄົມທັງນີ້ລັດຈະຮີບຮ້ອນສັກວັກແຊງໃຫ້ພົນລະເມືອງຢູ່ ສປປ ລາວ ໃຫ້ໄດ້ຢ່າງໜ້ອຍ 22% ໃນປີ 2021 ຫຼືໄດ້ຫຼາຍກວ່າກໍ່ຍິ່ງດີ.

แชร์