ຮອງປະທານປະເທດ ເຮັດວຽກຢູ່ໄຊຍະ

 ວັນທີ 21 ເມສາ 2021, ທ່ານ ບຸນທອງ ຈິດມະນີ ຮອງປະທານປະເທດພ້ອມຄະນະໄດ້ຢ້ຽມຢາມ ແລະເຮັດວຽກຢູ່ແຂວງໄຊຍະບູລີ,ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍການນໍາຂອງແຂວງໃຫ້ການຕ້ອນຮັບຢ່າງອົບອຸ່ນ.

  ກ່ອນອື່ນ ທ່ານ ພົງສະຫວັນ ສິດທະວົງ ໄດ້ໃຫ້ກຽດຂຶ້ນລາຍງານກ່ຽວກັບການກະກຽມເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ,ທ່ານໄດ້ກ່າວວ່າ: ພາຍຫຼັງໄດ້ຮັບຄຳສັ່ງຂອງຄະນະເລຂາທິການສູນກາງພັກວ່າດ້ວຍການຈັດຕັ້ງເຊື່ອມຊຶມ ແລະຜັນຂະຫຍາຍມະຕິ XI ຂອງພັກ, ຄະນະປະຈໍາພັກແຂວງກໍ່ໄດ້ຮີບຮ້ອນຄົ້ນຄວ້າເຊື່ອມຊຶມໃຫ້ກໍາມະການພັກແຂວງເພື່ອຫັນເປັນອັນລະອຽດ, ພ້ອມທັງໄດ້ອອກຄໍາແນະນໍາຂອງຄະນະປະຈໍາພັກແຂວງວ່າດ້ວຍການຈັດຕັ້ງປະຕິ ບັດຄໍາສັ່ງເລກທີ 38/ຄລສພ, ແຕ່ງຕັ້ງຄະນະຮັບຜິດຊອບນໍາເຜີຍແຜ່ເຊື່ອມຊຶມຢູ່ບັນດາພະແນກການ, ອົງການ, ກົມກອງອ້ອມຂ້າງແຂວງ ແລະ 11 ເມືອງທົ່ວແຂວງ, ຕິດພັນກັບການຈັດຕັ້ງປະຕິບັດມະຕິ VII ຂອງອົງຄະນະພັກແຂວງ,ໂດຍໄດ້ສ້າງແຜນການ ແລະຕາຕະລາງໃນການດຳເນີນການເຜີຍແຜ່ເຊື່ອມຊຶມ ແລະຜັນຂະຫຍາຍຢ່າງລະອຽດຊຶ່ງຈະລົງເຜີຍແຜ່ຢູ່ຂັ້ນແຂວງດຳເນີນ 2 ຊຸດ: ຊຸດທີ 1 ພະນັກງານການນຳຫຼັກແຫຼ່ງ, ຊຸດທີ 2 ພະນັກງານລັດຖະກອນທົ່ວໄປ, ຢູ່ຂັ້ນເມືອງແບ່ງອອກເປັນ 2 ຊຸດ: ຊຸດທີ 1 ພະນັກງານຫຼັກແຫຼ່ງອອມຂ້າງເມືອງ, ຊຸດທີ 2 ເຜີຍແຜ່ໃຫ້ພະນັກງານລັດຖະກອນອ້ອມຂ້າງເມືອງ ແລະປະຊາຊົນໃນທົ່ວແຂວງ.

  ພ້ອມດຽວກັນທ່ານເຈົ້າແຂວງກໍ່ໄດ້ລາຍງານສະພາບການຂະຫຍາຍຕົວຂອງເສດຖະກິດໃນທົ່ວແຂວງ, ການເຝົ້າລະວັງ, ຕ້ານ ແລະສະກັດກັ້ນພະຍາດໂຄວິດ-19, ໃນ 1 ປີຜ່ານມາ ເສດຖະກິດ ຂອງແຂວງຍັງສືບຕໍ່ຂະຫຍາຍຕົວຢ່າງ ຕໍ່ເນື່ອງ, ອັດຕາການເຕີບໂຕຂອງເສດ ຖະກິດຢູ່ໃນລະດັບ 4,8% ແລະສ້າງມູນຄ່າເພີ່ມລາຄາໃນປີໄດ້ປະມານ 10.706 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 3.031 ໂດລາສະຫະລັດ, ຜ່ານການປະຕິບັດບັນດາມາດຕະການຕ້ານ ແລະສະກັດກັ້ນພະຍາດໂຄວິດ-19 ມາຮອດປະຈຸບັນແຂວງໄຊຍະບູລີຍັງມີສູນກັກກັນແຮງງານທີ່ຂ້າມມາແບບຖືກຕ້ອງຈໍານວນ 2 ສູນ ມີຈໍານວນແຮງງານກັກກັນຍັງຄ້າງສູນທັງໝົດ 41 ຍິງ 6 ຄົນ.

  ຈາກນັ້ນ ທ່ານ ບຸນທອງ ຈິດມະນີ ກໍ່ໄດ້ໂອ້ລົມພ້ອມທັງໄດ້ເນັ້ນໜັກໃຫ້ການນໍາແຂວງເອົາໃຈໃສ່ຄົ້ນຄົ້ວບັນດາເນື້ອໃນຂອງມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກໃສ່ກັບມະຕິກອງປະຊຸມຂອງແຂວງ, ອັນໃດທີ່ເຫັນວ່າຍັງບໍ່ທັນຄືກັນແມ່ນໃຫ້ປັບເຂົ້າກັນຢ່າງລະອຽດ, ເນັ້ນບັນຫາສໍາຄັນ, ສ້າງເປັນແຜນການ, ແຜນງານ, ເປັນໂຄງການແຕ່ລະໄລຍະເພື່ອພ້ອມກັນຈັດຕັ້ງປະຕິບັດໃຫ້ໄປລວງດຽວກັນ ແລະສໍາເລັດຕາມຄາດໝາຍທີ່ວາງໄວ້, ພ້ອມທັງຈັດຕັ້ງປະຕິບັດຕົວຈິງໄປພ້ອມ ແລະມີການຕິດຕາມ, ກວດກາ ແລະສະຫຼຸບຖອດຖອນບົດຮຽນ.

ຂ່າວ: ອຸ່ນເຮືອນ ໂພທິລັກ

แชร์