ກອງປະຊຸມ ສສຂ ອຸດົມໄຊ ຈະພິຈາລະນາຮັບຮອງເອົາຫຼາຍບັນຫາ

  ທ່ານ ນາງ ຄຳພອນ ພິມມະຈັນ ຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງອຸດົມໄຊໄດ້ຖະແຫຼງຂ່າວການດໍາເນີນກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຊຸດທີ II ໃນວັນທີ 13 ເມສາຜ່ານມາທີ່ສະຖານີວິທະຍຸ, ໂທລະພາບແຂວງວ່າ: ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຊຸດທີ II ຈະໄດ້ໄຂຂຶ້ນໃນວັນທີ 21–22 ເມສາ 2021 ທີ່ສະໂມສອນໃຫຍ່ຂອງແຂວງ, ຊຶ່ງຈະໃຊ້ເວລາດໍາເນີນກອງປະຊຸມທັງໝົດ 2 ວັນ.

  ກອງປະຊຸມຄັ້ງນີ້ຈະໄດ້ຮັບຟັງການລາຍງານ, ພິຈາລະນາ ແລະຮັບຮອງເອົາບັນຫາສຳຄັນພື້ນຖານຂອງແຂວງດັ່ງນີ້: ຮັບຟັງລາຍງານຂອງຄະນະກໍາມະການເລືອກຕັ້ງຂັ້ນແຂວງກ່ຽວກັບຜົນສໍາເລັດຂອງການເລືອກຕັ້ງ ແລະຢັ້ງຢືນຄຸນລັກສະນະຂອງສະມາຊິກສະພາປະຊາຊົນແຂວງຊຸດທີ II; ພິຈາລະນາ ແລະຮັບຮອງໂຄງປະກອບກົງຈັກ ແລະບຸກຄະລາກອນຂອງສະພາປະຊາຊົນແຂວງ ຊຸດທີ II ເປັນຕົ້ນເລືອກຕັ້ງປະທານສະພາປະຊາຊົນແຂວງ ຊຸດທີ  II, ຕາມການສະເໜີຂອງຄະນະປະຈໍາສະພາປະຊາຊົນແຂວງ ຊຸດທີ I, ເລືອກຕັ້ງຮອງປະທານສະພາປະຊາຊົນແຂວງ ຊຸດທີ II ແລະຄະນະປະຈໍາສະພາປະຊາຊົນແຂວງ, ຕາມການສະເໜີຂອງປະທານສະ ພາປະຊາຊົນແຂວງ ຊຸດທີ II, ແຕ່ງ ຕັ້ງປະທານຄະນະກໍາມະການ, ເລຂາທິການ, ຮອງປະທານຄະນະກໍາມະການສະພາປະຊາຊົນແຂວງ ຊຸດທີII, ຕາມການສະເໜີຂອງຄະນະປະຈໍາສະພາປະຊາຊົນແຂວງຊຸດທີ II;ພິຈາລະນາ ແລະຮັບຮອງການເລືອກຕັ້ງທ່ານເຈົ້າແຂວງ;ຕາມການສະເໜີຂອງຄະນະປະຈໍາສະພາປະຊາຊົນແຂວງ; ພິຈາລະນາ ແລະຮັບຮອງໂຄງປະກອບກົງຈັກ ແລະບຸກຄະລາກອນຂອງອົງການປົກຄອງແຂວງ;ພິຈາລະນາ ແລະຮັບຮອງການເລືອກຕັ້ງບຸກຄະລາກອນຂອງອົງການໄອຍະການປະຊາຊົນແຂວງເລືອກຕັ້ງຫົວ ໜ້າອົງການໄອຍະການປະຊາຊົນ ແຂວງຕາມການສະເໜີຂອງຄະນະປະຈໍາສະພາປະຊາຊົນແຂວງ, ພິຈາລະນາ ແລະຮັບຮອງບົດລາຍງານກ່ຽວກັບວິໄສທັດແຜນພັດທະນາ 4 ໃຈກາງຂອງແຂວງອຸດົມໄຊ,ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ 5 ປີ ແລະການຈັດ ຕັ້ງປະຕິບັດແຜນງົບປະມານຂອງແຂວງ 5 ປີ (2016-2020) ແລະທິດທາງແຜນພັດທະນາເສດຖະກິດ-ສັງຄົມ ຂອງແຂວງ 5 ປີ ແລະ ແຜນງົບປະມານຂອງແຂວງ 5 ປີ (2021-2025), ແຜນການລົງທຶນ ແລະອື່ນໆໂດຍສັງເຂບ.

  ນອກຈາກນີ້ຍັງຈະໄດ້ພິຈາລະນາ ແລະຮັບຮອງ (ຮ່າງ) ແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະສິ່ງແວດລ້ອມແບບຮອບດ້ານຂອງແຂວງອຸດົມໄຊຮອດປີ 2030; ພິຈາລະນາ ແລະ ຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ແລະທິດທາງແຜນການເຄື່ອນ ໄຫວວຽກງານ 5 ປີ (2021-2025) ຂອງອົງການໄອຍະການປະຊາຊົນແຂວງ ແລະສານປະຊາຊົນແຂວງ; ພິຈາລະນາ ແລະຮັບຮອງບົດລາຍງານກ່ຽວກັບການເຄື່ອນໄຫວວຽກງານ 5ປີ (2016-2020) ສະພາປະຊາຊົນແຂວງຊຸດທີ I ແລະທິດທາງແຜນການ 5 ປີ (2021-2025) ຂອງສະພາປະຊາຊົນແຂວງຊຸດທີ II.

  ທ່ານ ນາງ ຄຳພອນ ພິມມະຈັນ ໃຫ້ຮູ້ຕື່ມວ່າ: ໃນໄລຍະດຳເນີນກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງ ຊຸດທີII, ຄະນະເລຂາທິການສະພາປະຊາ ຊົນແຂວງໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນເພື່ອຮັບເອົາຄຳຄິດຄຳເຫັນແລະຄຳສະເໜີໂດຍກົງຈາກປະຊາຊົນທີ່ຈະສົ່ງໄປຍັງກອງປະຊຸມຊຶ່ງບັນດາທ່ານ ສາມາດສົ່ງຄຳຄິດຄຳເຫັນ ແລະຄຳສະເໜີໄປຍັງກອງປະຊຸມໄດ້ຕາມວິທີລຸ່ມນີ້: ໂທລະສັບບໍ່ເສຍຄ່າໝາຍເລກ: 156, ສົ່ງເປັນຈົດໝາຍ ຫຼືເປັນລາຍລັກອັກສອນໄປທາງສະພາປະຊາຊົນແຂວງອຸດົມໄຊ, ຕັ້ງຢູ່ບ້ານນາເລົາ, ເມືອງໄຊ, ແຂວງອຸດົມໄຊ, ໃນໂມງລັດຖະການ,  ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຊຸດທີ II ຄັ້ງນີ້: ຜ່ານທາງ Facebook Live (ເຟສບຸກຖ່າຍຖອດສົດ) ຂອງສະຖານີວິທະຍຸ, ໂທລະພາບແຂວງ ແລະທາງລະບົບໂທລະໂຄ່ງ).

ຂ່າວ: ແຂວງອຸດົມໄຊ

แชร์