ຫົງສາ ທຳລາຍອາຫານແຊ່ແຂງ 45 ກິໂລ

ໜ່ວຍງານສະເພາະກິດຂອງເມືອງຫົງສາ ໄດ້ເອົາໃຈໃສ່ຄຸ້ມຄອງ, ກວດກາຢ່າງເປັນປົກກະຕິການຈໍາໜ່າຍເຄື່ອງອຸປະໂພກ, ບໍລິໂພກເພື່ອຮັບປະກັນຄຸນນະ ພາບ ແລະຄວາມປອດໄພຕໍ່ຜູ້ຊົມໃຊແຕ່ກໍຍັງກວດພົບສິນຄ້ານຳເຂົ້າຜິດກົດໝາຍວາງຈໍາໜ່າຍຢູ່ຕາມທ້ອງຕະຫຼາດ ແລະ ຮ້ານຄ້າຕ່າງໆຈໍານວນໜຶ່ງ, ຍ້ອນຜູ້ບໍລິການຄ້າຂາຍໄດ້ເບິ່ງແຕ່ທາງດ້ານຜົນກໍາ ໄລຂອງທຸລະກິດ.

  ດັ່ງເມື່ອບໍ່ດົນມານີ້, ໜ່ວຍງານສະເພາະກິດຄຸ້ມຄອງ, ກວດກາການຄ້າ ເມືອງຫົງສາ ແຂວງໄຊຍະບູລີ ໄດ້ລົງເຄື່ອນໄຫວກວດກາສິນຄ້າຫ້າມນຳເຂົ້າໃນໄລຍະນີ້ເຊັ່ນ: ປະເພດອາຫານທະເລສົດ, ຊີ້ນສັດ-ເຄື່ອງໃນສັດຕ່າງໆທີ່ແຊ່ແຂງ ແລະກວດກາລາຄາສິນຄ້າຢູ່ໃນທ້ອງຕະຫຼາດພາຍໃນເມືອງໂດຍສະເພາະແມ່ນບັນດາຮ້ານຄ້າ ແລະຮ້ານອາຫານຕາມເທສະບານເມືອງລວມທັງໝົດ 20 ຮ້ານເປົ້າໝາຍຊຶ່ງການກວດກາໄດ້ພົບເຫັນຮ້ານທີ່ມີສິນຄ້າຫ້າມນຳເຂົ້າຈຳນວນ 3 ຮ້ານ ມີ 5 ລາຍການ ເຊັ່ນ: ກຸ້ງ 15 ກິໂລ, ປາມຶກ 16,5 ກິໂລ, ປູມ້າ 5 ກິໂລ, ຕີນໄກ່ 6,5 ກິໂລ, ເຄື່ອງໃນງົວແຊ່ແຂງ 2 ກິໂລ ລວມທັງ ໝົດ 45 ກິໂລ ມູນຄ່າ 1 ລ້ານກວ່າກີບ.

  ຕໍ່ກັບຮ້ານຄ້າທີ່ກວດພົບເຫັນ 3 ຮ້ານດັ່ງກ່າວນີ້, ທາງໜ່ວຍງານສະເພາະກິດຂອງເມືອງແມ່ນໄດ້ເຮັດບົດບັນທຶກພ້ອມທັງສຶກສາອົບຮົມກ່າວເຕືອນໂດຍຊ້ອງໜ້າເຈົ້າ ໜ້າທີ່ກ່ຽວຂ້ອງ ແລະຢຶດສິນຄ້າເພື່ອມາທຳລາຍຖິ້ມ.

  ໃນວັນດຽວກັນນີ້ຈຶ່ງໄດ້ຈັດພິທີທໍາລາຍສິນຄ້າຕ້ອງຫ້າມດັ່ງກ່າວຢູ່ທີ່ຫ້ອງການອຸດສາຫະກໍາ ແລະການຄ້າເມືອງໂດຍການເຂົ້າຮ່ວມຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ, ທ່ານ ສິງຄຳ ມານິດ ຫົວໜ້າອຸດສາຫະກໍາແລະການຄ້າເມືອງຫົງສາມີຫົວໜ້າ-ຮອງຫົວໜ້າຫ້ອງການ, ໜ່ວຍງານສະເພາະກິດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວ: ກິດຕິສັກ ບົວໄລ

แชร์