ຊ່ວງປີໃໝ່ລາວ ນວ ພົບຜູ້ລະເມີດລະບຽບພັນກວ່າຄົນ

   ໃນໄລຍະສະເຫຼີມສະຫຼອງສົ່ງທ້າຍປີເກົ່າ ແລະຕ້ອນຮັບປີໃໝ່ລາວ ພສ 2564 ນັບແຕ່ວັນທີ 11-18 ເມສາ2021 ພະແນກຕໍາຫຼວດຈະລາຈອນ ປກສ ນະຄອນ ຫຼວງວຽງຈັນ ໄດ້ຕັ້ງຈຸດກວດກາຕາມສາຍທາງຕ່າງໆເພື່ອອໍານວຍຄວາມສະດວກ ແລະບັງຄັບໃຊ້ກົດໝາຍ,ຈາກການຈັດຕັ້ງປະຕິບັດດັ່ງກ່າວສາມາດກວດພົບຜູ້ລະເມີດກົດລະບຽບຈະລາຈອນ 1.000 ກວ່າຄົນ.

  ພັທ ວິລະພົງ ສະເໜ່ຫາ ຫົວໜ້າພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນໄລຍະສະເຫຼີມສະຫຼອງສົ່ງທ້າຍປີເກົ່າ ແລະຕ້ອນຮັບປີໃໝ່ລາວໄດ້ກະກຽມກໍາລັງຕໍາຫຼວດຈະລາຈອນ 600 ກວ່າສະຫາຍ ປະຈໍາການຄອບເຫດ 10 ຈຸດ, ສາຍກວດຕາມສາຍທາງ 10 ໜ່ວຍ, ກວດກາ 8 ຈຸດ ແລະຈຸດລະບາຍລົດຢູ່ວັດມີ 9 ວັດ; ຈາກການຈັດຕັ້ງປະຕິບັດສະພາບການສັນຈອນຢູ່ນະຄອນຫຼວງວຽງຈັນ ໃນຕົວເມືອງແຕ່ລະເສັ້ນທາງເບົາບາງ, ແຕ່ການສັນຈອນຢູ່ນອກເມືອງເປັນຕົ້ນແມ່ນເສັ້ນທາງເລກ 10, ເລກ 11 ແລະເລກ ທີ 13 ໃຕ້, ເພື່ອອໍານວຍຄວາມສະດວກສະບາຍໃຫ້ຜູ້ຂັບຂີ່ທັງເປັນການຫຼຸດຜ່ອນອຸບັດຕິເຫດທີ່ຈະເກີດ ຂຶ້ນຕາມທ້ອງຖະໜົນເຈົ້າໜ້າທີ່ຕໍາຫຼວດຈະລາຈອນໄດ້ຕັ້ງຈຸດກວດກາຢູ່ເສັ້ນທາງເລກທີ 11 ເຂດ ບ້ານປາກຕອນ,ເສັ້ນທາງ 13 ເໜືອ ເຂດບ້ານໜອງສະ, ເສັ້ນທາງເລກ 10 ເຂດບ້ານຂຸດສາມບາດ, ເສັ້ນທາງເລກທີ 13 ໃຕ້ ເຂດບ້ານສົມສະຫວາດ, ເສັ້ນທາງທ່າເດື່ອໜ້າສວນວັດທະນະທໍາ-ຢູ່ຫຼັກ 3 ແລະເສັ້ນທາງ 450 ປີ.

  ຢ່າງໃດກໍຕາມ, ເພື່ອເປັນການສະກັດກັ້ນການລະເມີດກົດລະບຽບຈະລາຈອນເຈົ້າໜ້າທີ່ກໍໄດ້ສຸມໃສ່ວຽກງານໂຄສະນາຕາມສາຍທາງ ແລະຈຸດຕ່າງໆ ເພື່ອເປັນການເຕືອນສະຕິຂອງຜູ້ໃຊ້ລົດ-ໃຊ້ຖະໜົນ, ແຕ່ກໍຍັງມີຜູ້ຂັບຂີ່ຈໍານວນໜຶ່ງຍັງລະເມີດກົດລະບຽບຈະລາຈອນທີ່ວາງອອກ; ໃນນັ້ນ, ຜ່ານການຈັດຕັ້ງປະຕິບັດເຈົ້າໜ້າທີ່ສາມາດພົບຜູ້ລ່ວງລະເມີດກົດລະບຽບຈະລາຈອນທັງໝົດ 1.073 ຄົນ ຍິງ 374 ຄົນ, ສຶກສາອົບຮົມ 928 ຄົນ ຍິງ 346 ຄົນ, ຂຽນໃບກ່າວເຕືອນ 27 ຄົນ ຍິງ 20 ຄົນ, ກັກໃບຂັບຂີ່ 77 ໃບ, ກັກທະບຽນ 41 ໃບ, ໃນນີ້, ຄວາມໄວເກີນ 227 ຄັນ; ລົດທີ່ລະເມີດລົດຈັກ 407 ຄັນ, ລົດກະບະ271 ຄັນ, ລົດເກັງ 177 ຄັນ, ລົດຕູ້-ລົດຈິບ 166 ຄັນ, ໂດຍສານ 29 ຄັນ, ລົດບັນທຸກສິນຄ້າ  21 ຄັນ  ແລະລົດພວງ 2 ຄັນ.

  ກໍລະນີ, ລ່ວງລະເມີດບໍ່ມີໃບຂັບຂີ່ 102 ຄັນ, ບໍ່ຖືກໃບຂັບຂີ່ 105 ຄົນ, ຂັບຂີ່ໝົດກໍານົດ 37 ຄົນ, ບໍ່ມີທະບຽນ  38 ຄົນ, ບໍ່ຖືກທະບຽນ 80 ຄົນ, ທະບຽນໝົດກໍານົດ 38 ຄັນ, ບໍ່ກວດກາ ເຕັກນິກ 86 ຄັນ, ເຕັກນິກໝົດກໍານົດ 47 ຄັນ, ບໍ່ມີໃບອະນຸຍາດແລ່ນລົດ 4 ຄັນ, ບໍ່ໃສ່ໜວກກັນ ກະທົບ 286 ຄັນ, ຂີ່ຊ້ອນສາມ 3 ຄັນ, ບໍ່ໃສ່ແວ່ນແຍງຂ້າງ14 ຄັນ, ດື່ມສິ່ງມຶນເມົາ 14 ຄົນ, ຄວາມ ໄວເກີນ 192 ຄົນ, ລ່ວງປ້າຍຫ້າມ 2 ຄັນ, ລ່ວງໄຟອໍານາດ 5 ຄັນ, ບໍ່ປົກຜ້າບັດ 2 ຄັນ, ບໍ່ຕິດປ້າຍ 3 ຄັນ, ລ້ຽວລົດບໍ່ຖືກຕ້ອງ 6 ຄັນ, ບໍ່ເສຍຄ່າທາງ 6 ຄັນ ແລະຕິດໄຟສະປອດໄລ 9 ຄັນ.

ພົ້ນເດັ່ນໃນວັນທີ 13 ເມສາ 2021, ເວລາ ປະມານ 12:00 ໂມງເຈົ້າໜ້າທີ່ກວດກາລົດຈັກໝາຍເລກທະບຽນ ດຣ 8039 ກໍາແພງນະຄອນຂັບຂີ່ໂດຍທ້າວຜາສຸກ ອາຍຸ 29 ປີ ພົບເຫັນຢາເສບຕິດ ຢາບ້າ ຈໍານວນ 43 ເມັດ ໄດ້ສົ່ງຕົວໃຫ້ ພາກສ່ວນກ່ຽວຂ້ອງດໍາເນີນຄະດີ.

แชร์