ພົບ 2 ກໍລະນີໃໝ່ຕິດໂຄວິດ ຄະນະສະເພາະກິດປະເມີນລາວສ່ຽງສູງຈະລະບາດໃນຊຸມຊົນ

  ສະພາບການລະບາດຂອງພະຍາດໂຄວິດ-19 ຢູ່ປະເທດເຮົາຍັງຄົງເປັນບັນຫາທີ່ໜ້າເປັນຫ່ວງຫຼ້າສຸດວັນທີ 20 ເມສາ 2021 ພົບກໍລະນີໃໝ່ຜູ້ຕິດເຊື້ອອີກ 2 ຄົນ ດ້ານຄະນະສະເພາະກິດປະເມີນການລະບາດຮອບນີ້ອາດມີຄວາມສ່ຽງສູງທີ່ຈະເກີດຂຶ້ນໃນຊຸມຊົນໂດຍສະເພາະບັນດາແຂວງມີຊາຍແດນຕິດຈອດກັບປະເທດໃກ້ຄຽງທີ່ມີການລະບາດຍ້ອນຍັງປາກົດເຫັນການລັກລອບເຂົ້າມາຢູ່ທັງນີ້ຮຽກຮ້ອງໃຫ້ເຈົ້າໜ້າທີ່ກ່ຽວຂ້ອງເຂັ້ມງວດລາດຕະເວນ ແລະພໍ່ແມ່ປະຊາຊົນລາວກໍຈົ່ງຊ່ວຍເປັນຫູເປັນ ຕາໃຫ້ກັບເຈົ້າໜ້າທີ່.

  ຢ່າງໃດກໍຕາມທ່ານ ພູທອນ ເມືອງປາກ ຫົວໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ກ່າວວ່າ: ປະຈຸບັນປະເທດໃກ້ຄຽງແມ່ນມີການລະບາດຢ່າງກວ້າງຂວາງ ແລະກໍຍັງມີຜູ້ລັກເຂົ້າມາປະເທດເຮົານັບວ່າເປັນຄວາມສ່ຽງຈະແຜ່ລາມເຂົ້າປະເທດເຮົາຄະນະສະເພາະກິດໄດ້ປະເມີນຄວາມສ່ຽງໃນແຕ່ລະວັນ ແລະຂໍທິດຊີ້ນຳຈາກລັດຖະບານໃນການຍົກລະດັບມາດຕະການປ້ອງກັນຄວບຄຸມ ແລະແກ້ໄຂການລະບາດ.

  ຜູ້ຕິດເຊື້ອໂຄວິດຢູ່ປະເທດເຮົາມີການເພີ່ມຂຶ້ນຢ່າງວ່ອງໄວພາຍໃນເດືອນເມສາມີ 11 ຄົນ ແລະກະຈາຍໄປຫຼາຍແຂວງມາຮອດປະຈຸບັນຮອດ 6 ແຂວງ ໂດຍສະເພາະແມ່ນແຂວງທີ່ລຽບຕາມລຳແມ່ນໍ້າຂອງ ແລະມີຄວາມຫຍຸ້ງຍາກທີ່ຄະນະສະເພາະກິດຈະເກັບກຳຂໍ້ມູນຂອງຜູ້ສຳຜັດໃກ້ຊິດກັບຜູ້ຕິດເຊື້ອນັ້ນເພື່ອມາກວດຫາເຊື້ອ ແລະກັກບໍລິເວນເພື່ອສະກັດກັ້ນການແຜ່ລະບາດ.

  ທັງນີ້ທ່ານ ພູທອນ ເມືອງປາກ ໃຫ້ເຫດຜົນວ່າ: 1, ມີແຮງງານລາວກັບຄືນມາປະເທດລາວຈາກປະເທດທີ່ມີການລະບາດໃນຊຸມຊົນຢ່າງກວ້າງຂວາງຈຳນວນຫຼາຍ ແລະໄດ້ນຳເອົາເຊື້ອເຂົ້າມານຳ 2, ບາງຈຳນວນລັກເຂົ້າເມືອງໂດຍບໍ່ຖືກຕ້ອງແລ້ວເຄື່ອນໄຫວໃນສັງຄົມຢ່າງປົກກະຕິໃນຫຼາຍແຂວງຫຼາຍສະຖານທີ່ທີ່ມີມວນຊົນເປັນຈຳ ນວນຫຼາຍ; 3, ຜູ້ຕິດເຊື້ອຍັງມີການເຊື່ອງອຳ ຫຼືບໍ່ເປີດເຜີຍປະຫວັດການເຄື່ອນໄຫວຂອງຕົນກ່ອນຈະມີອາການສະແດງອອກ ແລະຫຼັງສະແດງອອກ.

   ໃນຈຳນວນ 11 ຄົນ 9 ຄົນ ແມ່ນມາຈາກປະເທດໃກ້ຄຽງໃນນັ້ນ 4 ຄົນ ເຂົ້າມາໂດຍບໍ່ຖືກຕ້ອງຊຶ່ງເປັນສະພາບການໃໝ່ໃນເດືອນເມສານີ້ເຮັດໃຫ້ເຊື້ອເພີ່ມຂຶ້ນຢ່າງວ່ອງໄວ ແລະກະຈາຍໄປຫຼາຍແຂວງ.

  ຈາກສະພາບດັ່ງກ່າວຄະນະສະເພາະກິດໄດ້ມີການປະເມີນຄວາມສ່ຽງ ແລະອາດມີຄວາມສ່ຽງສູງທີ່ຈະມີການລະບາດໃນຊຸມຊົນຂອງພວກເຮົາໂດຍສະເພາະນະຄອນ ຫຼວງວຽງຈັນ ສະຫວັນນະເຂດ ແລະສາລະວັນແມ່ນໄລຍະເພີ່ມທະວີການຄວບຄຸມຕອບໂຕ້.

   ສະນັ້ນຈື່ງຮຽກຮ້ອງຄະນະສະເພາະກິດຢູ່ທ້ອງຖິ່ນເພີ່ມທະວີປະຕິບັດບັນດາຄຳສັ່ງຄຳແນະນຳ ແລະແຈ້ງການຂອງຄະນະສະເພາະກິດຢ່າງເຂັ້ມງວດໂດຍສະເພາະຄຳຖະແຫຼງທ່ານນາຍົກ ແລະຮອງນາຍົກສຳຄັນແມ່ນ 1 ຕ້ອງເພີ່ມທະວີກວດກາລາດຕະເວນຕາມຊາຍແດນບໍ່ໃຫ້ມີຜູ້ລັກລອບເຂົ້າມາກໍລະນີພົບເຫັນໃຫ້ນຳມາກັກ ແລະກວດຫາເຊື້ອພະຍາດຂໍໃຫ້ພໍ່ແມ່ ແລະປະຊາຊົນເປັນຫູຕາຊ່ວຍເຈົ້າໜ້າທີ່ ຫຼືທ່ານໃດມີອາການກໍໃຫ້ມາກວດເບີ່ງອາການ 2, ສະເໜີໃຫ້ສະຖານທີ່ການແພດ ຫຼືໂຮງໝໍ ແຕ່ລະຂັ້ນຕ້ອງເພີ່ມທະວີຕິດຕາມຄົນເຈັບທີ່ມີອາການໄຂ້ ແລະມີອາການທາງລະບົບຫາຍໃຈ ຫຼືກ່ຽວຂ້ອງກັບພະຍາດໂຄວິດ-19 ຄວນແຍກອອກຕ້ອງກຽມຄວາມພ້ອມດ້ານສະຖານທີ່ດ້ານບຸກຄະລາກອນ ແລະ ອຸປະກອນຕ່າງໆ 3, ຄະນະສະເພາະກິດແຕ່ລະແຂວງຕ້ອງໄດ້ຂະຫຍາຍສະຖານບໍລິການໃຫ້ມີມາດຕະຖານ ແລະ ຮອງຮັບແຮງງານລາວທີ່ຈະກັບມາບໍ່ໃຫ້ມີຄວາມແອອັດ ແລະເຂັ້ມງວດບໍ່ໃຫ້ອອກຈາກສູນກ່ອນ 14 ວັນ 4, ຮຽກຮ້ອງກຸ່ມເປົ້າໝາຍສັກວັກແຊງໃນທົ່ວປະເທດໃຫ້ຮີບຮ້ອນໄດ້  ຕາມກຳນົດເວລາເພື່ອຫຼຸດຜ່ອນການລະບາດຄວາມຮ້າຍແຮງ  ແລະຮຽກຮ້ອງສັງຄົມຈົ່ງຕິດຕາມຂ່າວສານທາງການ.

  ສຳລັບຜູ້ຕິດໃໝ່ 2 ຄົນ ກໍລະນີທີ 59 ເປັນເພດຍິງອາຍຸ 25 ປີ ສັນຊາດລາວນັກສຶກສາປະຈຸບັນຢູ່ບ້ານໂພນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ມີກຸ່ມສຳຜັດເບື້ອງຕົ້ນ 19 ຄົນ ແລະກໍລະນີຢັ້ງຢືນທີ 60 ເປັນເພດຍິງເຊັ່ນກັນອາຍຸ 28 ປີ ສັນຊາດລາວເປັນແມ່ເຮືອນປະຈຸບັນຢູ່ບ້ານນາຊອນ ເມືອງນາຊາຍທອງ ນະຄອນ ຫຼວງວຽງຈັນສຳຜັດໃກ້ຊິດໃນເບື້ອງຕົ້ນ 4 ຄົນ.

แชร์