ການເງິນເມືອງຈອມເພັດ ສະຫຼຸບວຽກງານປະຈຳປີ

 ເມື່ອບໍ່ດົນມານີ້ທີ່ສະໂມສອນຂອງເມືອງຈອມເພັດໄດ້ຈັດກອງປະຊຸມສະຫຼຸບວຽກງານການເງິນ ປະຈໍາປີ 2020 ແລະວາງທິດທາງແຜນການປີ 2021 ໂດຍການເປັນປະທານຂອງທ່ານ ເຢຍ ເລົ່າ ໄຊຍະວົງ ຫົວໜ້າຫ້ອງການການເງິນເມືອງ, ໃຫ້ກຽດເຂົ້າຮ່ວມຂອງ ທ່ານ ສອນເພັດ ພົງສຸທິ ຮອງເຈົ້າເມືອງ, ທ່ານນາງບົວຈີນຈິດຕະ ພອນຮອງຫົວໜ້າພະແນກການເງິນແຂວງຫຼວງພະບາງ, ມີຫົວໜ້າ-ຮອງຫົວໜ້າຫ້ອງການ ແລະວິຊາການທີ່ຮັບຜິດຊອບວຽກງານການເງິນເຂົ້າຮ່ວມ.

  ທ່ານ ບຸນນາກ ອຸທິການ ຮອງຫົວໜ້າຫ້ອງການໆເງິນເມືອງຈອມເພັດໄດ້ຂຶ້ນຜ່ານບົດສະຫຼຸບວຽກງານການເງິນປະຈຳປີ 2020 ແລະທິດທາງແຜນການປີ 2021  ຊຶ່ງໃຫ້ຮູ້ວ່າ, ແຜນລາຍຮັບພາຍໃນເມືອງແມ່ນ 2,7 ຕື້ກີບ, ປະຕິບັດໄດ້ 4 ຕື້ກວ່າກີບ ເທົ່າກັບ 149% ຂອງແຜນການ, ສ່ວຍສາອາກອນແຜນການແມ່ນ 2,46 ຕື້ກີບ, ປະຕິບັດໄດ້ 3,7 ຕື້ກີບເທົ່າກັບ 153% ຂອງແຜນ, ລາຍຮັບຈາກຊັບສິນຂອງລັດແຜນການແມ່ນ 245 ລ້ານ ກີບເທົ່າກັບ 103% ຂອງແຜນໃນນັ້ນສາມາດປະຕິບັດເກີນແຜນຈໍານວນ 1,33 ຕື້ກີບ ຂອງແຜນລາຍຮັບດຸນດ່ຽງເຄື່ອນຈາກແຂວງແຜນ 19,5 ຕື້ກີບເທົ່າກັບ 100% ຂອງແຜນ, ດ້ານລາຍຈ່າຍແຜນ 23 ຕື້ກວ່າກີບປະຕິບັດໄດ້ 22,33 ຕື້ກີບ ເທົ່າກັບ 96,15% ຈາກນັ້ນ, ຜູ້ເຂົ້າຮ່ວມກອງປະຊຸມກໍ່ໄດ້ພັດປ່ຽນກັນຂຶ້ນມີຄໍາເຫັນເຂົ້າໃນການຈັດຕັ້ງປະຕິບັດການເກັບລາຍຮັບຜ່ານມາເພື່ອເປັນທິດໃນການຈັດຕັ້ງປະຕິບັດໃນຕໍ່ໜ້າ. 

  ໂອກາດນີ້ສອນເພັດ ພົງສຸທິ ຮອງເຈົ້າເມືອງຈອມເພັດກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຕ່າງໆທີ່ທາງຄະນະພັກ-ຄະນະນໍາຫ້ອງການໆເງິນເມືອງຍາດມາໄດ້, ແລະເພື່ອເປັນການຊີ້ທິດເຍືອງທາງໃນການຈັດຕັ້ງປະຕິບັດແຜນງົບປະມານໃນຕໍ່ໜ້າໃຫ້ມີຄວາມຖືກຕ້ອງແລະສອດຄ່ອງນັ້ນ, ທ່ານໄດ້ຮຽກຮ້ອງໃຫ້ຄະນະນຳທຸກຂັ້ນພ້ອມກັນສຸມຈິດສຸມໃຈເຂົ້າໃນການຂຸດຄົ້ນລາຍຮັບແຕ່ຕົ້ນປີ,ປັບປຸງແບບແຜນວິທີເຮັດວຽກເປັນຕົ້ນການຈັດຕັ້ງປະຕິບັດດ້ານລາຍຮັບ-ລາຍຈ່າຍງົບປະມານໃຫ້ມີຄວາມເຂັ້ມແຂງ, ມີຜົນສຳເລັດເປັນກ້າວໆ. 

แชร์