ສສງ ຫົວແຊເປີດໜ່ວຍບໍລິການປະທຸມພອນ

  ເປີດໃຫ້ບໍລິການຢ່າງເປັນທາງການແລ້ວສຳລັບໜ່ວຍບໍລິການສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນທີ່ເມືອງປະທຸມພອນ ແຂວງຈຳປາສັກ ຫຼັງທີ່ໄດ້ຮັບຄວາມສົນໃຈຈາກລູກຄ້າທັງນີ້ກໍເພື່ອອຳນວຍຄວາມສະດວກສະບາຍໃຫ້ແກ່ສະສະມາຊິກທີ່ນັບມື້ຫຼາຍຂຶ້ນ.

  ພິທີເປີດໜ່ວຍບໍລິການດັ່ງກ່າວຈັດຂຶ້ນໃນວັນທີ 9 ເມສາທີ່ຜ່ານມານີ້ທີ່ບ້ານຫຼັກ 48 ເມືອງປະທຸມພອນ,ໂດຍການເຂົ້າຮ່ວມຂອງທ່ານ ວຽງສະໄໝ ສີລິພອນພັນ ເຈົ້າ ເມືອງໆ ປະທຸມພອນ, ມີທ່ານ ຄຳມ່ວນຊາ ພິຈິກ ຮອງເຈົ້າເມືອງໆບາຈຽງຈະເລີກສຸກ, ມີທ່ານປະທານ, ທ່ານຜູ້ອຳນວຍການ ສສງ ຫົວແຊ ຈະເລີນ ພ້ອມດ້ວຍບັນດາແຂກຜູ້ໃຫຍ່ທີ່ກ່ຽວຂ້ອງເຂົ້າຮ່ວມ.

 ທ່ານ ຫຸນພັນ ອິນທະວົງ ປະທານສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນກ່າວວ່າ: ສສງ ຫົວແຊຈະເລີນແມ່ນຈຸດເລີມຕົ້ນມາຈາກກອງທຶນພັດທະ ນາບ້ານຫົວແຊໃນປີ 2005 ຜ່ານການເຄື່ອນໄຫວໄດ້ໄລຍະໜຶ່ງຈຶ່ງໄດ້ສະເໜີສ້າງຕັ້ງເປັນສະຫະກອນສິນເຊື່ອໃນປີ 2009, ໂດຍການໄດ້ຮັບອະນຸຍາດຈາກກົມຄຸ້ມ ຄອງທະນາຄານທຸລະກິດ ແລະສະຖາບັນການເງິນທະນາຄານແຫງ ສປປ ລາວ, ໂດຍມີສຳນັກງານຕັ້ງຢູ່ບ້ານຫົວແຊ ເມືອງບາຈຽງຈະເລີນສຸກ ແຂວງຈຳປາສັກ ຈຸດ ປະສົງ ແລະເປົ້າໝາຍແມ່ນເພື່ອຊຸກຍູ້ ແລະສົງເສີມຊີວິດການເປັນຢູ່ຂອງສະມາຊິກໃຫ້ດີຂຶ້ນດ້ວຍການສ້າງໂອກາດໃຫ້ເຂົາເຈົ້າສາມາດເຂົ້າເຖິງແຫຼ່ງທຶນເພື່ອຊຸກຍູ້ກິດ ຈະກຳສ້າງລາຍຮັບໃກ້ຄອບຄົວ,ທັງເຮັດໃຫ້ສະຫະກອນມີຄວາມຍືນຍົງດ້ວຍການໄຫຼລຽງທຸລະກິດມີຜົນກຳໄລທີ່ສາມາດກຸ້ມຕົນເອງ ແລະປະກອບສ່ວນຊ່ວຍເຫຼືອສັງຄົມໄດ້. 

  ການເປີດໜ່ວຍບໍລິການທີ່ເມືອງປະທຸມພອນນີ້ແມ່ນເພື່ອຂະຫຍາຍຖານບໍລິການໃຫ້ກວ້າງຂວາງອອກກວ່າເກົ່າເພື່ອອຳນວຍຄວາມສະດວກສະບາຍໃຫ້ແກ່ສະມາຊິກໃຫ້ສາມາດເຂົ້າມາໃຊ້ບໍລິການໄດ້ງ່າຍຂຶ້ນ ແລະສາມາດເຂົ້າເຖິງແຫຼ່ງທຶນໄດ້ກວ່າເກົ່າ, ໂດຍສະເພາະແມ່ນຜູ້ທີ່ເຮັດການຜະລິດປູກຝັງລ້ຽງພາຍໃນເມືອງດັ່ງກ່າວ.

  ທ່ານກ່າວຕື່ມອີກວ່າ: ສສງ ມີລາຍຮັບຈາກການດຳເນີນທຸລະກິດໃນປີ 2020 ທັງໝົດ 6.265 ລ້ານກີບ, ເມື່ອທຽບໃສ່ປີ 20219 ເພີ່ມ ຂຶ້ນ 21%; ລາຍຮັບຕົ້ນຕໍແມ່ນລາຍຮັບຈາກຄ່າທຳນຽມ ແລະ ດອກເບ້ຍເງິນຝາກຈຳນວນ 543 ລ້ານກີບ ແລະ ຮອດທ້າຍປີ2020 ສສງ ມີກຳໄລຈາກການດຳເນີນທຸລະກິດທັງໝົດ 2.009 ລ້ານກີບ ທຽບໃສ່ ປີ 2019 ຫຼຸດລົງ 8%; ສາເຫດຕົ້ນຕໍແມ່ນການຫຼຸດຜ່ອນດອກເບ້ຍເງິນກູ້ ແລະຍົກເວັ້ນຄ່າທຳນຽມເງິນກູ້ສຳລັບສະມາຊິກທີ່ກູ້ຢືມເງິນຊ່ວງພະຍາດໂຄວິດ-19 ລະບາດໜັກຊ່ວງເດືອນມີນາ-ເມສາ 2020.

แชร์